Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

⁺ SAulus auer hijghde noch dreyghinghen wt end moord teghen de leęrionghers des Heęren: end ghingk hén tot dem Ouerpriester, end begærde van hem brieuen na Damasco, an de

+ Act.8.a,3. end .22.a.4 end .26.b.9 Gal.1.c.13 1.Cor.15.a.9 1.Tim.1.c.13

[p. 216v]

Synagoghen:

2

Op dat, zo hy eęnighe dezes weghs vonde, het ware mannen of vrauwen, hy ze ghebonden brochte na Hierusalem.

3

^* In’t reyzen auer gheschiedde dat hy na by Damasco quam: ^‡ end snellick omblickte hem ^* eęn licht van dem hemel.

* Act.22.b.6

‡ 1.Cor.15.a.8 2.Cor.12.a.2

* Act.26.c.12

4

End hy viel ter ærden, end hoorde eęn stemm die dar zeyde tot hem: Saul Saul, wat veruolgst du my?

5

Hy auer zeyde: Heęr, wie bist du? De Heęr auer zeyde: Ick bin Iesus den du veruolgst: ^* Het is dy hard teghen prickels te streuen.

* Act.5.g.40

6

End hy zeyde mit beuen end vertzaghen: Heęr ^* wat wilt du dat ick doe? End de Heęr [zeyde] tot hem: Sta op, ga hén in de stad, end dy zal [daer] ghezegt werden wat du doen moest.

* Luc.3.c.10 Act.2.f.37 end .16.f 30

7

⁺De mannen auer die mit hem ouer wegh reyßden, stonden verslaghen, ^* dewijl zy wel de stemm hoorden, auer niemand anschauwden.

+ B

* Daniel.10.b.7

8

Saulus auer ward opghericht van der ærden, end als hy zyne ooghen opende, zagh hy niemand. Zy auer leydden hem by der hand, end brachten hem hén na Damascum.

9

End hy was dry daghen zonder zien, end at niet end dranck niet.

10

Dar was auer eęn leęriongher te Damasco mit name Ananias, tot welckem de Heęr zeyde im ghezichte: Anania. Hy auer zeyde: Zie, hier bin ick Heęr.

11

End de Heęr zeyde tot hem: Sta op,

[p. 217r]

ga hén in de steghe die dar heett de Rechte, end vraagh ten huyze Iude na eęnem mit name Saulus, ^* van Tarsen: want zie, hy bidt.

* Act.21.g.39 end .22.a.3

12

(End hy zagh im ghezichte eęnen man mit name Ananias, hénin kommen, end hem de hand oplegghen, op dat hy weder ziende werde.)

13

⁺Ananias auer andwordde: Heęr, ick heb van velen ghehoort van dezem manne, ^* hoe veel quaads hy dynen Heylighen ghedaen heeft te Hierusalem:

+ C

* Act.9.a.1 Gal.1.c.13 1.Cor.15.a.9 1.Tim.1.c.13

14

End hy heeft hier macht van den Ouerpriesteren, te binden alle die dynen naem anroupen.

15

De Heęr auer zeyde tot hem: Ga hén, ^* want deze is my eęn wtuerkoren vat, dat hy mynen naem draghe voor Heydenen end kœninghen end kinderen Israels.

* Act.13.a.2 end .22.e.21 Rom.1.a.1 Gal.1.c.15 end .2.b.8 Ephes.3.b.8 1.Tim.2.b.7 2.Tim.1.c.11

16

^‡ Want ick zal hem anwijzen hoe veel hy lijden moet vœr mynen naem.

‡ Act.21.b.11 2.Cor.11.f.23

17

^* Ananias auer ghingk hén, end quam in’t huyß, end leyde de handen op hem, end zeyde: Saul broeder, my heeft wtghezonden de Heęr Iesus, die van dy ghezien is op dem wegh, daer du hær quamst, op dat du weder ziende, end mit dem heylighen Gheęst veruult werdest.

* Act.22.c.12

18

End van stonden an vielen van zynen ooghen als schelffers, end hy ward ter stond weder ziende. End stond op, end ward ghedoopt.

19

End doe hy spijß ghenomen had, ward hy verstærckt. Saulus auer was zommighe daghen by den leęriongheren die te Damasco waren.

[p. 217v]

20

⁺End van stonden an predickte hy Christum in den Synagoghen dat de zelue Godes Zoon ware.

+ D

21

Zy entzettden zick auer alle die het hoorden, end zeyden: Is deze niet die te Hierusalem vernielde die dezen naem anriepen, end is daertoe hær kommen, dat hy ze ghebonden bringhe tot den Ouerpriesteren?

22

Saulus auer ward meęr end meęr verstærckt, end verwerrede de Iœden die te Damasco woonden, bewærende dat deze de ⁺ Ghezalfde ware.

+ Christus.

23

Auer na velen daghen hielden de Iœden t’zamen raad, dat zy hem ommbrochten.

24

Auer hœre laghen wurden Saulo kond ghedaen: ^* end zy verwaerden de poorten oock nacht end dagh, op dat zy hem doodden.

* 2.Cor.11.g.32

25

De leęrionghers auer namen hem by nacht, ^* end deden hem door den muer, end lieten hem in eęnem korf hénaf.

* Iosue.2.c.13 1.Sa.19.b.12

26

^‡ Saulus auer ghekommen tot Hierusalem, verzocht zick by den leęriongheren te ghezellen: ⁺ end zy vreęßden zick alle voor hem, dewijl zy niet gheloofden dat hy eęn leęriongher ware.

‡ Act.22.d.17

+ E

27

^* Barnabas auer nam hem op, end bracht hem tot den Apostelen: end vertelde hen hoe hy den Heęr ouer wegh ghezien, end hy mit hem ghesproken, end hoe hy te Damasco vrijmoedighlick ghehandelt hadde in dem name Iesu.

* Act.11.d.25

28

End hy was by hen, end ghingk wt end in te Hierusalem, end handelde vrijmoedighlick in dem name des Heęren

[p. 218r]

Iesu.

29

Oock sprack hy, end ⁺ beuraeghde zick mit den Grecisten: zy auer zochten hem te dooden.

+ Of, disputeerde.

30

Doe dit auer de broeders ghewaar wurden, leydden zy hem na Cesarien, end schickten hem wt na Tarsen.

31

Zo hadden nu de Ghemeynten vrede ouer gansch Iudéa end Galiléa end Samaria, end wurden ghebauwt, end ghinghen voord in der vreęzen des Heęren, end wurden vermeęrt mit dem troost des heyligen Gheęstes.

32

⁺Het gheschiedde auer doe Petrus ommhær wandelde tot allen, dat hy oock quam tot den heylighen die te Lydda woonden

+ F

33

Aldaer auer vand hy eęnen mensch mit name Eneas, die dar acht iaren lang te bedde gheleghen had, welcker was ghichtigh.

34

End Petrus zeyde tot hem: Enea, de Heęr Iesus Christus make dy ghezond: sta op, end maeck dijn bedde. End van stonden an stond hy op.

35

End hem zaghen alle die te Lydda end te ⁺ Sarona woonden, welcke zick bekeęrden tot dem Heęre.

+ anders. Assarona.

36

Te Ioppe auer was eęn leęrionghersse mit name Tabitha, welcke wtghelegt, heett ⁺ eęn Ree: deze was voll goeder wercken end aelmoessen die zy dede.

+ Of. Schærpzichtigh.

37

Het gheschiedde auer ten zeluen daghen dat zy kranck ward, end starf. End doe zy de zelue ghewasschen hadden, leyden zy ze op eęnen opperzaal.

38

⁺Dewijl auer Lydda na by Ioppe was,

+ G

[p. 218v]

end de leęrionghers hoorden dat Petrus aldaer was, schickten zy tot hem tweę mannen wt, end baden hem dat hy zick niet liete verdrieten tot hen te kommen.

39

Petrus auer stond op, end ghingk mit hen. End als hy daer kommen was, leydden zy hem hénop in den opperzaal: end alle de weduwen stonden rondomm hem, weęnden end toonden de rocken end kleęders, die Ree ghemaeckt had, de wijle zy by hen was.

40

Doe ze auer Petrus alle hénwt ghedreuen had, knielde hy neder, end bad: end wand zick tot dem lichame end zeyde: Tabitha, sta op. Zy auer opende hœre ooghen: end doe zy Petrum zagh, zettde zy zick op.

41

Hy auer gaf hœr de hand, end richtde ze op, end riep de Heylighen end de weduwen, end stelde ze [hen] leuendigh voor.

42

Dit auer ward kond door gansch Ioppe, end menighe gheloofden an den Heęre.

43

Het gheschiedde auer dat hy vele daghen te Ioppe bleef by eęnem Simon, die eęn lederbereyder was.