Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.viij.

1

⁺ SAulus auer had eęn welgheuallen an zynem dood. Dar ward auer ten zeluen daghe eęn groote veruolghing teghen de Ghemeynte die te Hierusalem was: ^* end zy wurden alle verstroeyt in de landen Iudée end Samarie, behaluen de Apostels.

+ Act.22 e.20

* Act.11.c.19

2

Auer Godureęzighe mannen bestelden t’zamen Stephanum [ten graue], ^* end maeckten eęn groot beklagh ouer hem.

* Gene.23.a.2 end .50.b.10 2.Sam.3.f.31

3

^‡ Saulus auer verwoestde de Ghemeynte, ghingk hén end hær in de huyzen, end toogh hærvoor mannen end vrauwen, end leuerde ze ouer in geuangniß.

‡ Act.9.a.1 end .22.a.4 end .26.b.9 Gal.1.c.13 1.Cor.15.b.9 1.Tim.1.c.13

4

^* Die nu verstroyet waren, reyßden ommhær, end euangelizeerden het word.

* Act.11.c.19

5

Philippus auer quam hénaf in eęn stad Samarie, end predickte hen van Christo.

[p. 214v]

6

End de scharen namen eęnmoedighlick waar, wat van Philippo ghezegt ward, ⁺ doe zy [hem] hoorden, end zaghen de teękens die hy dede.

+ B

7

^* Want veler bezetenen onreyne gheęsten riepen mit luyder stemmen, end voeren wt: end vele verlammden end krœpelen wurden ghezond ghemaeckt. End dar ward eęn groote blijschap in der zeluer stad.

* Marc.16.d.17 Act.5.c.16. end .16.d.18 end .19.b.12

8

Dar was auer eęn mann mit name Simon, die te voren in der stad ^* toouery dreef, end het volck Samarie ontßinnigh maeckte, end ⁺ gaf voor, hy ware wat groots,

* Act.13.a.6

+ Gr. zeyde

9

Welckem zy alle anhinghen van dem kleynsten an tot dem grootsten, end zeyden: Deze is de kracht Godes, de groote [kracht].

10

End zy waren hem alle toeghedaen, om dat hy ze langhe tijd mit tooueryen verdooft hadde.

11

Doe zy auer Philippo gheloofden, die dar euangelizeerde van dem kœningkrijcke Godes, end van dem name Iesu Christi, wurden ghedoopt oock mannen end vrauwen.

12

⁺Doe gheloofde oock Simon zelue, end ward ghedoopt, end hing Philippo an: end als hy schauwde de teękens end groote krachtighe daden die dar gheschiedden, entzettde hy zick.

+ C

13

Doe auer de Apostels hoorden die te Hierusalem waren, dat Samaria het word Godes anghenomen hadde, schick-

[p. 215r]

ten zy tot hen wt Petrum end Ioannem.

14

Welcke doe zy hénaf quamen, baden vœr ze, op dat zy den heylighen Ghęest entfinghen.

15

Want hy was noch niet ouer hœrer iemand gheuallen, mer waren alleęnlick ghedoopt in dem name des Heęren Iesu Christi.

16

Doe ^* leyden zy de handen op ze, end zy entfinghen den heylighen Gheęst.

* Act.6.b.6 end .13.a.3 end .19..a.6 1.tim.4.d.14 end .5.d.22 2.Tim.1.b.6

17

Doe auer Simon zagh, dat door het oplegghen der Apostelen handen de heylighe Gheęst ghegheuen ward, bood hy hen gheld an,

18

⁺End zeyde: Gheuet my oock deze macht, op dat zo wem ick de handen oplegghe, hy den heylighen Gheęst entfanghe.

+ D

19

Petrus auer zeyde tot hem: Dijn ziluer zy mit dy ter verdærfniß, ^* om dat du ghemeynt hebst dat Godes gaue door gheld te verwæruen zy.

* Matt.10.a.8

20

Du hebst gheęn deęl noch lot an dezem worde: want dijn hert is niet recht voor Gode.

21

Daerom doet ghemoedbetering van dezer dyner booßheyt, end bid God, of dy de ghedachteniß dijns herten mochte quijtghelaten werden.

22

Want ick zie dat du bist in eęner bitterer galle end verknoopinghe der ongherechtigheyt.

23

Simon auer andwordde end zeyde: ^* Biddet ghy vœr my tot dem Heęre, op dat der dinghen gheęn ouer my komme, daer ghy van ghezegt hebbet.

* Nu.21.b.7

24

⁺Doe zy nu betuyght end ghesproken

+ E

[p. 215v]

hadden het word des Heęren, keęrden zy weder na Hierusalem, end euangelizeerden velen Samaritischen vlecken.

25

Auer eęn Enghel des Heęren sprack tot Philippo, end zeyde: Sta op, end ga hén teghen’t Zuyden, op den wegh die dar afleydt van Hierusalem na [der stad] Gaza, die dar woest is.

26

End hy stond op, end ghingk hén: end zie, eęn Moormann eęn kamerær, end gheweldigh amptmann Candaces der kœninghinnen der Mooren: welcker [ghestelt] was ouer hœren ganschen schatt, ^* end was kommen tot Hierusalem an te bidden.

* Ioan.12.c.20

27

End hy keęrde weder, end zat op zynem waghen, end laß den Propheet Esaiam.

28

De Gheęst auer zeyde tot Philippo: Ga héntoe, end vough dy by dezem waghen.

29

⁺Philippus auer liep héntoe, end hoorde hem lezen den Propheet Esaiam, end zeyde: Uerstaast du oock wat du leeßt?

+ F

30

Hy auer zeyde: Hoe kann ick zo my niet iemand anleydet? End bad Philippum dat hy opklomme, end by hem zate.

31

Het inhold auer der Schrift die hy laß, was dit: ^* Hy is als eęn schaap ter slachtinghe hén gheleydt, end als eęn lamm voor zynem schærer stemmlooß, alzo heeft hy niet gheopent zynen mond.

* Esa.53.b.7

32

In zyner nederheyt is zijn gherichte ⁺ hén ghenomen: wie zal auer zijn gheboorte vertellen? want zijn leuen is van der ærden hén ghenomen.

+ of, verheuen

[p. 216r]

33

End de Kamerær andwordde Philippo, end zeyde: Ick bid dy, van wem zegt de Propheet dit? van hem zeluen, of van eęnighem anderen?

34

Philippus auer dede zynen mond open, end hief an van dezer Schrift, ^{+ *} end euangelizeerde hem Iesum.

+ G

* Lu.24.g.45

35

Als zy auer ouer wegh ghinghen, quamen zy an eęn water: end de Kamerær zeyde: Zie, hier is water, ^* wat verhindert dat ick niet ghedoopt werde?

* Act.10.g.47

36

Philippus auer zeyde: Gheloofst du van ganschem herten, zo magh het gheschiehen. Hy auer andwordde end zeyde: Ick ghelooue dat Iesus Christus, zy Godes Zoon.

37

End hiet den waghen still holden: end zy daelden beyde hénaf in het water oock Philippus end de Kamerær, end hy doopte hem.

38

Doe zy auer hærop quamen wt dem water, greep de Gheęst des Heęren Philippum hénwegh, end de Kamerær zagh hem niet meęr: end reyßde zynen wegh vroylick.

39

Philippus auer ward vonden in Azoto, end reyßde ommhær end euangelizeerde allen steden tot dat hy quam tot Cesarien.