Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

1

EEn mann auer ghenaemt Ananias zampt zynem wijue Saphira verkocht eęn ⁺ haue,

+ Gr. verkreghen goed.

2

End entrack wat van dem kooploon mit medeweten zijns wijfs, end bracht eęn deęl, end leyde’t an der Apostelen voeten.

3

Petrus auer zeyde: Anania, waerom heeft de Satan dijn hert veruult, dat du lieghen zoldest dem heilighen Gheęst, end entrecken van dem kooploon des ackers?

4

Bleef hy dy niet ganschlick, end doe hy verkocht was, was hy niet in dyner macht? waerom hebst du dit stuck in dynem herten voorghenomen? Du hebst niet den menschen, mer Gode gheloghen.

5

Doe auer Ananias deze worden hoorde, viel hy neder, end gaf den gheęst op. End dar quam eęn groote vreęze ouer alle die dit hoorden.

6

De ionghelinghen auer stonden op, end namen hem wegh, end droughen hem hénwt, end begrouuen hem.

7

⁺Het gheschiedde auer ouer eęn wijl by dryen vren daerna, dat oock zijn wijf hærin quam, end wist niet wat dar gheschiedt was.

+ B

8

Petrus auer andwordde hœr: Zeg my, of ghy den acker zo veel verkocht hebbet? Zy auer zeyde: Ia, alzo veel.

9

Petrus auer zeyde tot hœr: Waerom hebbet ghy ouer eęn ghedraghen onder v te verzoucken den Gheęst des Heęren?

[p. 208r]

zie, de voeten der, die dynen mann begrauen hebben, zijn voor der dœre, end zy zullen dy hénwt draghen. End van stonden an viel zy neder an zynen voeten, end gaf den gheęst op.

10

De ionghelinghen auer inghekomen, vonden ze dood: end droughen ze hénwt, end begrouuen ze by hœrem manne.

11

End dar quam eęn groote vreęze ouer de gansche Ghemeynte, end ouer alle die zulcks hoorden.

12

^* Dar gheschiedden auer vele teękens end zeldßame wonderheyden im volcke door der Apostelen handen. End zy waren alle eęnmoedighlick in ^* dem voorhuyze Salomonis.

* Marc.16.d.17 Act.2.g.43

* 1.Reg.6.a.3 Ioan.10.d.23 Act.3.b.11.

13

⁺Der anderen auer dorste zick niemand tot hen voeghen: mer het volck hield veel van hen.

+ C

14

^* Dar wurden auer dem Heęre meęr end meęr toeghedaen die dar gheloofden, ia oock menighten mannen end vrauwen:

* Act.2.g.47

15

Alzo dat zy de krancken op de straten hærwt droughen, end leyden ze op bedden end baaren, op dat, wanneęr Petrus quame, ten minsten zijn schaduwe hœrer iemand beschaduwede.

16

Dar quam oock eęn menighte der bygheleghener steden tot Hierusalem, end brachten krancken ^* end die van onreynen gheęsten ghepijnight waren, welcke alle ghezond wurden.

* Marc.16.d.17 Act.8.b.7. end .16.d.18 end .19.b.12

17

De Ouerpriester auer stond op, end alle die mit hem waren, welcke is de secte der Sadducéeren, end wurden voll ijuers:

[p. 208v]

18

End sloughen de handen an de Apostels, end leyden ze in eęn ghemeyne ⁺ gheuangniß.

+ Gr. bewaerniß

19

^+* Auer eęn Enghel des Heęren opende in der nacht de dœren der gheuangheniß, end leydde ze hærwt, end zeyde:

+ D

* Act.12.a.7 end .16.e.26

20

Gaet hén, staet end spreket in dem tempel tot dem volcke alle de worden dezes leuens.

21

Doe zy auer dit hoorden, ghinghen zy in der dagheraad in den tempel, end leęrden.

22

De Ouerpriester auer quam, end die mit hem waren, end riepen den raad te hoop, end den ganschen staat der olderen der kinderen Israels: end schickten hénwt tot den kærcker ze te halen.

23

Doe auer de dienaers daer quamen, vonden zy ze in der gheuangnisse niet: End keęrden weder, end boodschapten’t,

24

End zeyden: Den kærcker vonden wy wel ghesloten mit aller zekerheyt, end de wachters buyten staen voor den dœren: auer doe wy die opdeden, vonden wy niemand daerin.

25

⁺Doe auer deze worden hoorden oock de Priester end de Ouerheyt des tempels end de Ouerpriesters, wurden zy twijfelmoedigh ouer ze, wat daerwt werden zolde.

+ E

26

Doe quam dar eęn, end boodschapte hen end zeyde: Zie, de mannen die ghy in de gheuangniß ghelegt hebbet, zijn in dem tempel, staen end leęren het volck.

27

Doe ghingk de Ouerheyt [des tempels] mit den dienaren hén, end haelde

[p. 209r]

ze zonder gheweld: ^* want zy vreęßden zick voor dem volcke, op dat zy niet ghesteęnight wurden.

* Matt.21.c.26

28

End als zy ze brachten, stelden zy ze voor den raad. End de Ouerpriester vraeghde ze,

29

End zeyde: ^* Hebben wy v niet mit ghebode gheboden, dat ghy niet zoldet leęren in dezem name? end zie, ghy hebbet Hierusalem veruult mit uwer leęre, end willet dezes menschen bloed ouer ons bringhen.

* Act.4.d.18

30

Petrus auer andwordde end de Apostels, end zeyden: ^* Men moet Gode meęr ghehoorzaem zijn dan den menschen.

* Act.4.d.19

31

De God onzer Uaderen heeft Iesum opgheweckt, ^* welcken ghy mit gheweldigher hand ghedoodt hebbet end an het holt ghehanghen.

* Act.2.d.23

32

^* Dezen heeft God door zijn rechte hand verhooght tot eęnem Hertooghe end Zalighmaker, ⁺ te gheuen Israeli ghemoedbetering end quijtlating der zonden.

* Act.3.b.18 Philip.2.a.9

+ F

33

^* End wy zijn zyne tuyghen ouer deze worden, end oock de heilighe Gheęst, welcken God ghegheuen heeft den, die hem ghehoorzaem zijn.

* Ioan.15.d.26 27.

34

Doe zy auer dit hoorden, doorsneed het ze, end hielden raad ze te dooden.

35

Doe stond auer op in dem Raad eęn Phariséer, mit name ^* Gamaliel, eęn Wetleęraer zeęr achtbaer by allem den volcke, end hiet, men zolde de Apostels eęn weynigh doen hénwt gaen,

* Act.22.a.3

36

End zeyde tot hen: Ghy Israelitische

[p. 209v]

mannen, ziet vœr v zeluen toe an dezen menschen, wat ghy te doen hebbet.

37

^* Want voor dezen daghen stond Theudas op, end zeyde, hy ware wat, welckem anhing eęn ghetall mannen by vier honderd: die ghedoodt is, end alle die hem ghehoor gauen, zijn verstroeyt, ⁺ end tot niet gheworden.

* Act.21.g.38

+ G

38

Na dezem stond op Iudas de Galiléer in den daghen der beschrijuing, end maeckte veel volcks afualligh na zick: end hy is vergaen, end alle die hem ghehoor gauen wurden verstroeyt.

39

End nu zeg ick v, entholdet v van dezen menschen, end latet ze varen. ^* Want is deze raad of dit werck wt menschen, zo zal het ghebroken werden.

* Prou.21.d.30 Esa.8.b.10 Matt.15.b.13 Ioan.15.a.2

40

Is het auer wt Gode, zo konnet ghy’t niet breken, op dat ghy niet t’eęnigher tijd oock ^* Godsstormers beuonden werdet.

* Act.9.a.5 end .23.b.9

41

Zy auer vielen hem toe. End zy riepen de Apostels, ^* gheęsselden ze, end gheboden hen, zy zolden niet spreken in dem name Iesu: end lieten ze hén gaen.

* Matt.23.d.33

42

^* Zy auer ginghen vroylick van des Raads anghezichte, dat zy wærdigh gheweeßt waren vœr zynen naem smadigheyt te lijden.

* Matt.5.b.12

43

End zy hielden niet op, daghlicks in dem tempel end in den huyzen te leęren end te euangelizeren Iesum Christum.