Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

PEtrus auer end Ioannes ghinghen t’zamen hénop in den tempel ter vren des ghebeds, welcke was de neghende.

2

^* End eęn mann die dar krœpel was van zyner moeder lijue, ward ghedraghen, welcken zy daghlicks zettden voor des tempels dœre, die dar hiet de Schoone, dat hy aelmoessen begærde van den, die in den tempel ghinghen.

* Act.14.b.7

3

Doe hy nu zagh Petrum end Ioannem, dat zy wolden ten tempel hénin gaen, bad hy dat hy eęn aelmoesse entfinghe.

4

Petrus auer zagh hem staerlick an mit Ioanne, end zeyde: Zie ons an.

5

Hy auer hield zick [mit den ooghen] op ze, verwachtende dat hy wat van hen entfinghe.

6

Petrus auer zeyde: Ziluer end gold heb ick niet: wat ick auer heb, dat gheue ick dy. ^* In dem name Iesu Christi des Nazareners heff dy op, end wandel.

* Act.4.b.10

7

End hy greep hem by der rechter hand, end richtde hem op: End van stonden an wurden zyne zolen end kooten beuest:

8

⁺End sprang op, stond, end wandelde: end ghingk hénin mit hen in den tempel, wandelde, end sprang, end preeß God.

+ B

9

End het gansche volck zagh hem wandelen end God prijzen.

[p. 204v]

10

End zy kenden hem dat hy het was, die om aelmoessen zat voor der Schoone des tempels poorte: end zy wurden voll verwonderens end entzettens ouer dem, dat hem gheschiedt was.

11

Als nu auer de krœpel die ghezond ghemaeckt was, zick vast an Petrum end Ioannem hield, liep het gansche volck verbaaßt tot hen in het ^* voorhuyß dat dar gheheeten werdt Salomonis.

* 1.Reg.6.a.3 Ioan.10.d.23 Act.5.b.12

12

Als auer Petrus dit zagh, andwordde hy dem volcke: Ghy Israelitische mannen, wat verwonderet ghy v hierouer, of wat ziet ghy ons staerlick an, als hadden wy dezen doen wandelen door onze eyghene kracht of Godsuruchtigheyt?

13

^* De God Abrahams end Isaacs end Iacobs, de God onzer Uaderen heeft zynen Zoon Iesum verklaert, ⁺ welcken ghy ouergheleuert end verloochent hebbet voor dem anghezichte Pilati, doe de zelue ordeęlde dat men hem entslaen zolde.

* Act.5.e.31 Philip.2.a.9

+ C

14

^* Ghy auer verloochendet den Heylighen end gherechtighen, end begærdet dat men v eęnen mann, welcker eęn doodslagher was, schenckte.

* Matt.27.c.20 Marc.15.a.11 Luc.23.c.18 Ioan.18.g.40

15

Auer den Hertoogh des leuens dooddet ghy, welcken God opgheweckt heeft van den dooden, ^* deß zijn wy tuyghen.

* Act.1.b.8 end .2.e.32

16

End door het ghelooue an zynen naem heeft hy an dezem, den ghy anschauwet end kennet, zynen naem beuestight: end het ghelooue welck door hem is, heeft dezem ghegheuen deze volkommene ghezondheyt in uwer allen teghewordigheyt.

17

End nu broeders, ick weet ^* dat ghy het door onwetenschap ghedaen heb-

* Ioan.16.a.3 1.Cor.2.b.8 1.Tim.1.c.13

[p. 205r]

bet, ghelijckerwijß oock uwe ouersten.

18

God auer ^* wat hy door den mond aller zyner Propheten te voren verkondight heeft, [naemlick] dat Christus lijden moest, dat heeft hy alzo veruult.

* luc.24.d.24 Esa.50.b.6 end .53.b 5

19

^‡ Zo doet nu ghemoedbetering end bekeęret v, op dat uwe zonden wtghedelghet werden:

‡ Eccli.17.c.20

20

Teghen dat kommen de tijden der verkoeling van dem anghezichte des Heęren, end hy wtghezonden zal hebben den, ⁺ die v voorhén ghepredickt is gheweeßt, Iesum Christum.

+ D

21

Welcken de hemel innemen moet tot op de tijden der wederzetting aller dinghen die God ghesproken heeft door den mond aller zyner heiligher Propheten van eęwigheyt.

22

Want Moses heeft ghezegt tot den Uaderen: ^* Eęnen Propheet zal v de Heęr uwe God verwecken wt uwen broederen, gelijck als my: ^‡ den zeluen zullet ghy hooren in allem, dat hy tot v spreken zal.

* deu.18.d.15.18 Ioan 1.f.45 Act.7.e.37

‡ Matt.17.a.5 end .23.a.8.

23

Het zal auer gheschiehen, alle ziel die den zeluen Propheet niet ghehoort zal hebben, die zal wtgheroeyt werden wt dem volcke.

24

Ia oock alle Propheten van Samuel an, end daerna zo vele als’er ghesproken hebben, hebben oock te voren van dezen daghen verkondight.

25

Ghy zijt kinders der Propheten end des ⁺ Uerbonds dat God bestelt heeft tot onzen Uaderen, doe hy sprack tot Abraham: ^* End in dynem zade zullen ghezeghent werden alle gheslæchten op ærden.

+ of, testaments

* Gene.12.a.3 end .18.c.18 end .22.d.18 end .26.a.4 end .49.b.10 Eccli.44.d.21. Gal.3.b.8

26

Zo heeft God v ten eęrsten opgheweckt

[p. 205v]

zijn kind Iesum, end heeft hem wtghezonden v te zeghenen, op dat eęn ieghelick zick bekeęre van zynen booßheyden.