Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxi.

1

DAerna openbaerde zick Iesus wederom den leęriongheren an dem meer [der stad] Tiberias: hy openbaerde zick auer alzo.

2

Dar waren by den anderen t’zamen Simon Petrus end Thomas ghezegt Tweęlingk, end ^* Nathanael van Cana Galilée, end ^‡ de zoons Zebedei, end tweę anderen zyner leęriongheren.

* Ioan.1.g.45

‡ Matt.4.c.21 Marc.1.b.19

3

Simon Petrus zegt tot hen: Ick ga hén visschen. Zy zegghen tot hem: Wy kommen oock mit dy. Zy ghinghen hénwt, end traden ter stond hénop in het schip, end in dier nacht vinghen zy niets.

4

Doe nu auer de morghen kommen was,

[p. 198v]

stond Iesus op dem ouuer: auer de leęrionghers wisten niet dat het Iesus was.

5

Zo zegt Iesus tot hen: Kinderkens, hebbet ghy doch wat toespijzen? Zy andwordden hem: Neęn.

6

Hy auer zeyde tot hen: ^* Wærpet het nett ter rechter zijden des scheeps, end ghy zullet vinden. Doe worpen zy het, end konden’t nu niet langher trecken, voor der menighte der visschen.

* Luc.5.a.4

7

⁺Zo zegt die leęriongher ^* welcken Iesus lief had, tot Petro: Het is de Heęr. Doe nu Simon Petrus hoorde dat het de Heęr was, gordde hy het ouerhemde om, (want hy was naeckt) end warp zick in’t meer.

+ B

* Ioan.13.c.23 end .20.a.2

8

De andere leęrionghers auer quamen in dem scheepken an, (Want zy waren niet verr vam lande, mer omtrent tweę honderd cubitmaten) end toghen het nett mit den visschen.

9

Als zy nu aftraden op’t land, zien zy eęn koolvuer ligghen, end visch daerop ghelegt end brood.

10

^* Iesus zegt tot hen: Bringhet hær van den visschen die ghy nu gheuanghen hebbet.

* Luc.24.f.40

11

Simon Petrus trad hénop, end toogh het nett op’t land, voll grooter visschen, honderd dry end vijftigh. End hoewel dier zo vele waren, zo schœrde het nett niet.

12

Iesus zegt tot hen: Kommet, holdet het middaghmael. Niemand auer onder den leęriongheren dorste hem vraghen: wie bist du? dewijl zy wisten dat

[p. 199r]

het de Heęr was.

13

Zo kommt Iesus end neemt het brood, ⁺ end gheeft het hen, end deßghelijcken den visch.

+ anders. end doe hy danck ghezegt had gheeft. etc.

14

⁺Dit is nu het derdemael dat Iesus gheopenbaert is zynen leęriongheren, na dem hy van den dooden verrezen was.

+ C

15

Doe zy nu het middaghmael gheholden hadden, zegt Iesus tot Simon Petro: Simon [zoon] ⁺ Iona, hebst du my lieuer dan deze doen? Hy zegt tot hem: Ia, Heęr. Du weetst dat ick dy lief heb. Hy zegt tot hem: Weyd myne lammerkens.

+ anders. Ioanna

16

Wederom zegt hy andermael tot hem: Simon [zoon] ⁺ Iona, hebst du my lief? Hy zegt tot hem: Ia, Heęr. Du weetst dat ick dy lief heb. Hy zegt tot hem: ⁺ Weyd myne schapen.

+ anders. Ioanna.

+ Of, zy eęn hærder myner schapen

17

Hy zegt derdemael tot hem: Simon [zoon] ⁺ Iona, hebst du my lief? Petrus ward bedrouft dat hy derdemael tot hem zeyde, hebst du my lief: end zeyde tot hem: ^* Heęr du weetst alle dingk: du weetst dat ick dy lief heb. Iesus zegt tot hem: Weyd myne schapen.

+ anders. Ioanna

* Ioan.16.d.30

18

^* Amen amen ick zeg dy, doe du iongher warest, gorddest du dy zeluen, end wandeldest daer du hén woldest: wanneęr du auer veroldert zalt zijn, zalt du dyne handen wtstrecken, end eęn ander zal dy gorden, end voeren waer du niet hén wilt.

* Ioan.13.d.36 Act.12.a.4 2.Petr.1.c.14

19

Dit zeyde hy auer te beduyden mit welckem dood hy God heęrlich maken zolde. End doe hy dit ghezegt had, sprack

[p. 199v]

hy tot hem: Uolgh my na.

20

⁺Petrus auer wand zick omm, end ziet ^* den leęriongher volghen, den Iesus lief had, welcker oock in dem auendmael op zijn borst ⁺ leende, end zeyde: Heęr, wie is het die dy verraedt?

+ D

* Ioan.13.c.23 end .20.a.2 end .21.a.7

+ Gr. anuiel

21

Doe Petrus dezen zagh, zegt hy tot Iesu: Heęr, wat zal auer deze [doen]?

22

Iesus zegt tot hem: Zo ick will dat hy blijue tot dat ick komme, wat gaet het dy an? volgh du my na.

23

Zo ghingk deze rede wt onder den broederen, dat die leęriongher niet stærft: end Iesus zeyde niet tot hem, Hy stærft niet: mer, Zo ick will dat hy blijue, tot dat ick komme, wat gaet het dy an?

24

Deze is de leęriongher die van dezen dinghen tuyght, end heeft ze gheschreuen: end wy weten dat zijn tuyghniß waar is.

25

^* Dar zijn auer oock vele andere dinghen die Iesus ghedaen heeft, welcke zo zy elck byzonder beschreuen wurden, ick meyne dat de wæreld zelue de boucken niet vaten zolde, die te schrijuen waren. Amen.

* Ioan.20.g.30