Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiij.

1

⁺ VOor dem feęst auer des Pascha doe Iesus bekende dat zijn vre kommen was, dat hy wt dezer wæreld ghinghe tot dem Uader, na dem hy lief ghehadt hadde zyne die in der wæreld waren, zo heeft hy ze tot an het ende lief ghehadt.

+ Matt.26.a.2 Marc.14.a.1 Luc.22.a.1

2

End als het auendmael ghedaen was (^* doe nu de duuel hadde dem Iuda Simons Iscarioth in het hert ⁺ ghegheuen dat hy en verriede.)

* Luc.22.a.3 Ioan.13.c.27

+ Gr. ingheworpen

3

Dewijl Iesus wiste ^‡ dat hem de Uader alles in de handen ghegheuen hadde, ^* end dat hy van Gode wtghegaen ware, end dat hy tot Gode hén ginghe,

‡ Mat.11.d.27

* Ioan.16.d.28

4

Staet hy van dem auendmael op, end legt zyne kleęders af: end nam eęnen douck, end omgordde zick,

[p. 184r]

5

Daerna ghiett hy water in eęn becken, end begann den leęriongheren de voeten te wasschen, end te drooghen mit dem doucke daermit hy omghegordt was.

6

Zo kommt hy tot Simon Petrus, end de zelue zegt tot hem: Heęr, ^* wasschest du my de voeten?

* Matt.3.d.14

7

Iesus andwordde end zeyde tot hem: Wat ick doe, dat weetst du nu niet: du zalt het auer hiernamaels weten.

8

Petrus zegt tot hem: Du zalt my de voeten gheęnßinns wasschen in eęwigheyt. Iesus andwordde hem: Wassche ick dy niet, zo hebst du gheęn deęl mit my.

9

Simon Petrus zegt tot hem: Heęr, niet alleęnlick myne voeten, mer oock de handen end het hoofd.

10

⁺Iesus zegt tot hem: Wie ghewasschen is, die behouft niet dan de voeten te wasschen, mer hy is gansch reyn. ^* End ghy zijt reyn, mer niet alle.

+ B

* Ioan.15.a.3

11

^* Want hy wist den, die en verraden zolde: daerom zeyde hy, Ghy zijt niet alle reyn.

* Ioan.6.g.64

12

Doe hy nu hœre voeten ghewasschen had, end zyne kleęders ghenomen, ⁺ zat hy andermael an, end zeyde tot hen: Wetet ghy wat ick v ghedaen heb?

+ Gr. viel an

13

Ghy heetet my de Leęrmeęster, end ^* de Heęr, end ghy zegghet wel: want ick bin’t.

* 1.Cor.8.b.6 end .12.a.3 Philip.2.b.11

14

Zo dan ick de Heęr end de Leęrmeęster, uwe voeten ghewasschen heb, ^* zo moetet ghy oock malckanderen de voeten wasschen.

* Gal.6.a.1.2

[p. 184v]

15

^* Want eęn anwijzing heb ick v ghegheuen, op dat ghy doet ghlijckerwijß ick v ghedaen heb.

* 1.Petr.2.d.21 1.Ioan.2.a.6

16

Amen amen ick zeg v, ^* eęn dienstknecht is niet grooter dan zijn heęr, noch eęn wtghezonden grooter dan die en ghezonden heeft.

* Matt.10.c.24 Luc.6.f.40 Ioan.15.c.20

17

Zo ghy zulcks wetet, gheluckzaligh zijt ghy, zo ghy het doet.

18

Ick spreeck niet van v allen: ick weet welcke ick wtuerkoren heb: mer [het is] op dat de Schrift veruult werde, ^* Die mit my het brood eet, heeft zijn verssen teghen my opgheheuen.

* Psal.41.b.10 Mat.26.b.22 1.Ioan.2.c.19

19

^+‡ Uan nu zeg ick’t v eęr het gheschiehe: op dat, wanneęr het gheschiedt is, ghy gheloouet dat ick het bin.

+ C

‡ .Io.14.d.29 end .16.a.4

20

Amen amen ick zeg v, ^* wie dar anneemt den ick zenden zal, die neemt my an: wie auer my anneemt, die neemt den an, die my ghezonden heeft.

* mat.10.d.40 Luc.10.c.16

21

^* Doe Iesus zulcks ghezegt had ward hy beroert in dem gheęst, end betuyghde, end zeyde: Amen amen ick zeg v, eęn onder v zal my verraden.

* Mat.26.b.20 Mar.14.b.18 Luc 22.b.21 Act.1 c.17 1.Io.2.c.19

22

Zo zaghen de leęrionghers op malckanderen, end waren wanckelmoedigh van wem hy zeyde.

23

^* Dar was auer zyner leęriongheren eęn, die dar ⁺ anzat an den schood Iesu, welcken Iesus lief had:

* Ioan.20.a.2 end .21.a.7 d.20

+ Gr. anlagh.

24

Dezem nu wenckt Symon Petrus dat hy vraghen zolde, wie het ware daer hy van zeyde.

25

Deze auer viel op de borst Iesu, end zeyde tot hem: Heęr, wie is het?

[p. 185r]

26

Iesus andwordt: Die is het, dem ick de inghedopte bete gheuen zal. End hy dopte de bete in, end gaf ze Iude Simonis Iscarioth.

27

End na der bete voer de Satan in hem. Zo zeyde Iesus tot hem: Wat du doest, dat doe haestlick.

28

Dat zelue auer wist niemand der ⁺ anzittenden, waer toe hy dit hem ghezegt had.

+ Gr. anligghenden.

29

Want zommighe meynden, dewijl ^* Iudas den buydel hadde, dat hem Iesus zeyde: ⁺ Koop wat ons noodigh is op het feęst: of dat hy den armen wat gaue.

* Ioan.12.a.6

+ D

30

Doe hy nu de bete ghenomen had, ghingk hy van stonden an hénwt: het was auer ⁺ nacht doe hy hénwt ghingk.

+ Anders nacht. Doe hy nu hénwt ghegaen was, zegt Iesus, Nu is. etc.

31

Zo zegt Iesus, Nu is des menschen Zoon verklaert, end God is verklaert in hem.

32

Is God verklaert in hem, zo zal en oock God verklaren in zick zeluen, ^* end zal en terstond verklaren.

* Ioa.12.d.23 end .17.a.2

33

Kinderkens, noch eęn weynigh bin ick by v. ^‡ Ghy zullet my zoucken, end ghelijckerwijß ick den Iœden ghezegt heb, waer ick hén ga, daer konnet ghy niet kommen: zo zeg ick v nu oock.

‡ Ion.7.e.34 end .8.c.21

34

^* Eęn nieuw ghebod gheue ick v dat ghy malckanderen lief hebbet, ghelijckerwijß ick v lief ghehadt heb, dat ghy oock malckanderen lief hebbet.

* Leu.19.d.18 Mat.22.d.38 Ioan.15.b.12 Ephe.5.a.2 1.Thes.4.b.9 1.Petr.4.b.8 1.Ioa.3.d.23 end 4.d.21

35

^‡ Hieran zal eęn ieghelick bekennen dat ghy myne leęrionghers zijt, zo ghy liefde hebbet onder malckanderen.

‡ Ioan.2.a.5

36

Simon Petrus zegt tot hem: Heęr, waer

[p. 185v]

gaast du hén? Iesus andwordde hem: Daer ick hénga, kannst du my nu niet volghen: ^* auer du zalt my namaels volghen.

* Ioan.21.c.18 2.Petr.1.c.14

37

Petrus zegt tot hem: Heęr waerom kann ick dy nu niet volghen? ^‡ Ick zal mijn ziel vœr dy zetten.

‡ mat.26.d.34 Marc.14.c.29 Luc.22.d.33

38

Iesus andwordde hem: Zalt du dijn ziel vœr my zetten? ^* Amen amen ick zeg dy, dar zal gheęn haan krayen tot dat du my drijmael verloochent zalt hebben.

* Mat.26.d.33 Marc.14.c.30 Luc.22.d.34