Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

AMen amen ick zeg v, wie niet ter dœre hénin gaet in den schaapsstall, mer klimmt anderweghs hénin, die is eęn dief end moorder.

2

Wie auer ter dœre hénin gaet, die is de hærder der schapen.

3

Dezem doet de dœrwaerer op, end de schapen hooren zijn stemm: end hy roupt zyne eyghene schapen mit name, end

[p. 176v]

leydt ze hénwt.

4

End wanneęr hy zyne eyghene schapen heeft wtghelaten, zo gaet hy voor hen hén: end de schapen volghen hem na, want zy kennen zijn stemm.

5

Eęnem vrémden auer zullen zy niet nauolghen, mer zullen van hem vliehen: want zy kennen der vrémden stemm niet.

6

Dit spreeckword zeyde Iesus tot hen: Zy auer verstonden niet wat het was dat hy tot hen zeyde.

7

⁺Zo zeyde Iesus weder tot hen: Amen amen ick zeg v, ick bin de dœr tot den schapen.

+ B

8

Alle die voor my kommen zijn, die zijn dieuen end moorders: mer de schapen hebben ze niet ghehoort.

9

^* Ick bin de dœr: zo iemand door my ingaet, die zal zaligh werden: end hy zal ingaen end wtgaen, end weyde vinden.

* Ioan.14.a.6

10

De dief kommt niet dan dat hy stele end slachte end ommbringhe: Ick bin kommen op dat zy het leuen hebben, end oueruloedigher hebben.

11

^* Ick bin de goede hærder. De goede hærder stelt zijn ziel vœr de schapen.

* Esa.40.c.11 Ezech.34.f.23 Hebr.13.d.20 1.Pet.5.b.4

12

^‡ De huerlingk auer end die gheęn hærder is, deß de schapen niet eyghen zijn, ziet den wolf kommen, ⁺ end verlaett de schapen, end vliedt: end de wolf grijpt end verstroeyt de schapen.

‡ Zach.11.d.16

+ C

13

De huerlingk auer vliedt, want hy is eęn huerlingk, end past op de schapen niet.

14

Ick bin de goede hærder, ^* end kenne myne [schapen], end werde ghekennt

* 2.Tim.2.c.19

[p. 177r]

van den mynen.

15

^* Ghelijckerwijß my de Uader kennt, kenne ick oock den Uader, end ick stelle mijn ziel vœr de schapen.

* Matt.11.d.27 Luc.10.c.22 Ioan.6.e.46 end .7.d.29 end .8.c.19

16

Oock heb ick andere schapen die niet zijn wt dezem stalle: end die moet ick hærtoe bringhen, end zy zullen mijn stemm hooren, ^* end dar zal werden eęn kudde [end] eęn hærder.

* Ezec.37.f.22

17

Daerom heeft my de Uader lief, ^* om dat ick mijn ziel hén stelle, op dat ick ze weder neme.

* Esa.53.d.12

18

Niemand neemt ze van my, mer ick stell ze hén van my zeluen. ^* Ick heb macht ze hén te stellen, ⁺ end ick heb macht ze weder te nemen: dit ghebod heb ick entfanghen van mynem Uader.

* Ioan.2.c.19

+ D

19

^* Doe ward dar wederom eęn tweędracht onder den Iœden om dezer worden willen.

* Ioan.7.b.12 end .9.c.16

20

Uele auer wt hen zeyden: ^* Hy heeft eęnen duuel, end is ontzinnigh: Wat hooret ghy en?

* Ioan.7.c.20 end .8.f.48

21

Anderen zeyden: Dit zijn gheęne worden eęnes bezetenen: kann oock eęne duuel der blinden ooghen openen?

22

Het was auer ^* Uernieuwing [feęst] te Hierusalem, end het was winter.

* 1.Machab.4 g.59

23

End Iesus wandelde in dem tempel in ^* dem voorhuyze Salomonis.

* 1.Reg.6.a.3 Act.3.b.11 end .5.b.12

24

⁺Zo omringden en de Iœden end zeyden tot hem: Hoe lang holdest du onze ziel op? bist du ⁺ de Ghezalfde, zo zeg het ons vrij hærwt.

+ E

+ Christus

25

Iesus andwordde hen: Ick heb’t v ghezegt, end ghy gheloouet niet: ^* De

* Ioan.5.f.36

[p. 177v]

wercken die ick doe in mijns Uaders name, deze tuyghen van my.

26

Auer ghy gheloouet niet, want ghy zijt niet van mynen schapen, ghelijckerwijß ick v ghezegt heb.

27

^* Myne schapen hooren mijn stemm, end ick kenn ze, end zy volghen my na:

* Ioan.8.f.47

28

End ick gheue hen het eęwigh leuen: ^* end zy zullen niet vergaen in eęwigheyt: end niemand zal ze wt myner hand rucken:

* Ioan.6.d.39 end .17.c.12 end .18.b.9

29

Mijn Uader die ze my ghegheuen heeft, is grooter dan alle: end niemand kann ze wt mijns Uaders hand rucken.

30

^* Ick end de Uader zijn eęn.

* Esa.54.b.5 Ioan.5.c.19 end .14.b.9 end .17.a.5

31

^+‡ Zo droughen de Iœden weder steęnen, dat zy en steęnighden.

+ F

‡ Ioan.8.g.59 end .11.a.8

32

Iesus andwordde hen: Uele goede wercken heb ick v ghetoont van mynem Uader: om welckes der zeluer wercken willen steęnighet ghy my?

33

De Iœden andwordden hem, end zeyden: Om des goeden wercks willen steęnighen wy dy niet, ^* mer om der Godslastering willen: end om dat du, die du eęn mensch bist, dy zeluen God makest.

* Ioan.5.c.18.

34

Iesus andwordde hen: Is’er niet gheschreuen in uwer Wet, ^* Ick heb ghezegt, ghy zijt Goden?

* Psal.82.a.5

35

Zo zy die goden gheheeten heeft tot welcken het word Godes gheschiedt is, end de Schrift niet ghebroken kann werden:

36

Zegghet ghy [tot dem] den de Ua-

[p. 178r]

der geheylight end in de wæreld wtghezonden heeft, Du spreeckst Godslastering, om dat ick ghezegt heb, Ick bin Godes Zoon?.

37

^* Doe ick niet de wercken mijns Uaders, zo gheloouet my niet.

* Ioan.15.d.24

38

Doe ick ze auer, hoewel ghy my niet gheloouet, zo gheloouet doch den wercken: op dat ghy bekennet end gheloouet dat de Uader in my is, end ick in hem.

39

^* Zy zochten en weder gheuanglick te nemen: hy auer entghingk wt hœren handen.

* Luc.4.e.29 Ioan.8.g.59

40

End hy toogh weder hén ouer den Iordan an de plaetß ^* daer Ioannes eęrst doopte, end bleef aldaer.

* Ioan.1.d.28 end .3.c.23

41

End vele quamen tot hem, end zeyden: Ioannes heeft ia gheęn teęken ghedaen, auer alles wat Ioannes van dezem ghezegt heeft, dat was waar.

42

End menighe aldaer gheloofden in hem.