Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

ENd als Iesus voorby hén ghingk, zagh hy eęnen mensch blind van der gheboorten an.

2

End zyne leęrionghers vraeghden hem, end zeyden: Rabbi, wie heeft ghezondight, deze of zyne olders, dat hy blind zolde gheboren werden?

3

Iesus andwordde: Noch deze heeft ghezondight, noch zyne olders: ^* mer [het is gheschiedt,] op dat de wercken Godes openbaer wurden an hem.

* Ioan.11.a.4

4

^* Ick moet wercken de wercken deß die my ghezonden heeft, zo lang het dagh is: De nacht kommt wanneęr niemand wercken kann.

* Ioan.5.c.19

[p. 174v]

5

Zo lang ick bin in der wæreld, bin ick ^* eęn licht der wæreld.

* Ioan.1.b.9 end .8 b.12. end 12.e.35.g.46 Esa.42.b.6 end .49.b.6 Luc.2.e.32 Act.13.b.47

6

Doe hy zulcks ghezegt had, spoogh hy op de ærde, end maeckte slijck wt dem speęcksel, end streeck het slijck op des blinden ooghen,

7

End zeyde tot hem: Ga hén, wasch dy in dem baadwater van Siloam, welcke wtghelegt werdt Wtghezonden. ⁺ Zo ghingk hy hén, end wiesch zick, end quam ziende.

+ B

8

Auer de nabuers end die hem te voren ghezien hadden dat hy blind was, zeyden: Is deze niet die dar zat end bedelde?

9

Zommighe zeyden: Hy is het. Andere auer: Hy is hem ghelijck. Hy zeyde: Ick bin’t.

10

Doe zeyden zy tot hem: Hoe zijn dyne ooghen gheopent?

11

Hy andwordde end zeyde: De mensch die Iesus heett, maeckte slijck, end bestreeck myne ooghen, end zeyde tot my: Ga hén tot dem baadwater van Siloam, end wasch dy. Ick auer ghingk hén, end wiesch my, end ward ziende.

12

Zo zeyden zy tot hem: Waer is die? Hy zegt: Ick weet het niet.

13

⁺Zy bringhen hem die te voren blind gheweeßt was, tot den Phariséeren.

+ C

14

^* Het was auer Sabbath doe Iesus het slijck maeckte, end zyne ooghen opende.

* Ioan.5.b.9 Matt.12.a.1 Marc.2.g.23 Luc.6.a.1

15

Andermael dan vraeghden hem oock de Phariséers, hoe hy ware ziende ghe-

[p. 175r]

worden. Hy auer zeyde tot hen: Hy leyde my slijck op de ooghen, end ick wiesch my, end ick zie.

16

Doe zeyden zommighe wt den Phariséeren: Deze mensch is niet van Gode, want hy holdt den Sabbath niet. Andere zeyden: ^* Hoe kann eęn zondigh mensch zulcke teękens doen? ^‡ End dar was eęn tweędracht onder hen.

* Ioan.3.a.2 end .9.f.33

‡ Ioan.7.b.12 end .10.d.19

17

Zy zegghen weder tot dem blinden: Du, wat zegst du van hem, dat hy dyne ooghen gheopent heeft? Hy auer zeyde: ^* Hy is eęn Propheet.

* Luc.7.c.16. end .24.c.18 Ioan.4.c.19 end .6.b.14

18

De Iœden auer gheloofden niet van hem, dat hy blind gheweeßt end ziende gheworden ware, ⁺ tot dat zy riepen de olders deß, die ziende gheworden was,

+ D

19

End vraeghden ze end zeyden: Is deze uwe zoon den ghy zegghet, hy zy blind gheboren? Hoe ziet hy dan nu?

20

Zyne olders andwordden hen, end zeyden: Wy weten dat deze onze zoon is, end dat hy blind gheboren is:

21

Hoe hy auer nu ziet, weten wy niet: of wie zyne ooghen gheopent heeft, weten wy niet. Hy heeft [zijn] olderdom, vraghet hem: hy zal vœr zick spreken.

22

Zulcks zeyden zyne olders, om dat zy zick vreęßden voor den Iœden. ^* Want de Iœden hadden nu ouer eęn ghedraghen: zo iemand hem vœr ⁺ den Ghezalfden belede, dat hy van der Synagoghe afghezondert zolde werden.

* Ioan.11.g.57 end .12.f.42

+ Christum.

23

Daerom zeyden zyne olders: Hy heeft

[p. 175v]

[zijn] olderdom, vraghet hem.

24

⁺Zo riepen zy ten anderen mael den mensch die blind gheweeßt was, end zeyden tot hem, ^* Gheef Gode eer: wy weten dat deze mensch eęn zondaer is.

+ E

* Iosue.7.c.19

25

Zo andwordde hy end zeyde: Of hy eęn zondaer is, weet ick niet: eęn dingk weet ick, dat ick blind was, end nu zie ick.

26

Zy auer zeyden wederom tot hem: Wat dede hy dy? hoe opende hy dyne ooghen?

27

Hy andwordde hen: Ick heb’t v alrede ghezegt, end ghy hebbet niet ghehoort. Wat willet ghy’t wederom hooren? willet ghy oock zyne leęrionghers werden?

28

Doe besmadighden zy hem, end zeyden: Zy du zijn leęriongher, wy zijn Mosis leęrionghers.

29

⁺Wy weten dat God mit Mose ghesproken heeft, dezen auer weten wy niet van waer hy is.

+ F

30

De mensch andwordde end zeyde tot hen: Uoorwaer hierin is eęn wonderbaer dingk, dat ghy niet wetet van waer hy is, end [nochtans] hy heeft myne ooghen gheopent.

31

Wy weten auer ^* dat God de zondaers niet hoort, mer zo iemand eęn vereęrer Godes is, end zynen will doet, dezen hoort hy.

* Michee.3.b.4

32

Uan der ⁺ wæreld an is het niet ghehoort gheweeßt, dat iemand eęns blindgheborenen ooghen gheopent hebbe.

+ Gr. eęwe

33

^* Wenn deze van Gode niet ware, zo

* Ioan.3.a.2 end .9.c.16

[p. 176r]

konde hy niets doen.

34

Zy andwordden, end zeyden tot hem: Du bist ganschlick in zonden gheboren, end leęrest du ons? End zy worpen hem hénwt.

35

Iesus hoorde dat zy hem hénwt gheworpen hadden, end doe hy hem vand, ⁺ zeyde hy tot hem: Gheloofst du in den Zoon Godes?

+ G

36

Hy andwordde, end zeyde: Heęr, wie is het, op dat ick in hem ghelooue?

37

Iesus auer zeyde tot hem: Oock hebst du hem ghezien ^* end die mit dy spreeckt, die is het.

* Ioan.4.d.26

38

Hy auer zeyde: Heęr, ick ghelooue: end bad hem an.

39

End Iesus zeyde: ^* Ick bin kommen tot eęnem gherichte in deze wæreld, ^‡ op dat die dar niet zien ziehen: end die dar zien, blind werden.

* Ioan.3.b.17 end .12.g.47

‡ Matt.13.b.13

40

End zulcks hoorden zommighe der Phariséeren die by hem waren, end zeyden tot hem: Zijn wy oock blind?

41

Iesus zeyde tot hen: Waret ghy blind zo haddet ghy gheęn zonde: nu auer zegghet ghy, Wy zien: daerom blijft uwe zonde.