Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vij.

1

ENd daerna had Iesus zynen wandel in Galiléa: want hy wolde in Iudéa niet ommhær wandelen, om dat de Iœden hem zochten te dooden.

2

^* Der Iœden feęst auer [naemlick] de Huttuesting was naby.

* Leui.23.f.34

3

Doe zeyden zyne broeders tot hem: Maeck dy op van hier, end ga hén in Iudéam, op dat oock dyne leęrionghers anschauwen dyne wercken die du doest.

4

Want niemand doet iet heymelick, end zouckt zelue vrijmondigh te zijn. Zo du zulcks doest, zo maeck dy zeluen openbaer voor der wæreld.

[p. 169r]

5

Want oock zyne broeders gheloofden niet in hem.

6

Zo zegt Iesus tot hen: Myne tijd is noch niet kommen, uwe tijd auer is altijd bereyd.

7

^* De wæreld kann v niet haten, my auer haatt zy, om dat ick van hœr tuyghe dat hœre wercken booß zijn.

* Ioan.15.c.19

8

⁺Gaet ghy hénop op dit feęst: ick ga noch niet hénop op dit feęst: ^* want myne tijd is noch niet veruult.

+ B

* Ioan.8.c.20

9

Doe hy auer dit hen ghezegt had, bleef hy in Galiléa.

10

Als auer zyne broeders waren hénop ghegaen, doe ghingk hy oock hénop tot dem feęst, niet openbaerlick, mer als heymelick.

11

Doe zochten hem de Iœden op dem feęst, end zeyden: ^* Waer is die?

* Ioan.11.g.56

12

^‡ End dar was eęn groote murring van hem onder den scharen: Want zommighe zeyden, ^* Hy is goed: Andere auer zeyden, Neęn: mer hy veruoert de schare.

‡ Ioan.9.c.16 end .10.d.19

* mat.21.d 46 Luc.7.c.16 Ioan.6.b.14 end .7.f.40

13

^‡ Niemand nochtans sprack vrijwt van hem, om der vreęzen willen der Iœden.

‡ Ioa.12.f.42

14

Als nu auer het midden des feęsts was, ghingk Iesus hénop in den tempel, end leęrde.

15

End de Iœden verwonderden zick, end zeyden: Hoe kann deze gheschriften, dar hy ze doch niet gheleęrnt heeft?

16

⁺Iesus andwordde hen, end zeyde: ^* Mijn leęre is niet myne, mer deß die my ghezonden heeft.

+ C

* Ioan.3.b.11 end .8.d.28 end .12.g.49 end .14.b.10 d.24

[p. 169v]

17

Zo iemand will des zeluen wille doen, die zal bekennen van der leęre of zy wt Gode zy, of, of ick van my zeluen spreke.

18

Wie van hem zeluen spreeckt, die zouckt zijn eyghen eęr: wie auer zouckt de eęr deß die hem ghezonden heeft, deze is waerachtigh, end gheęn ongherechtigheyt is in hem.

19

^* Heeft v niet Moses de Wet ghegheuen, end [nochtans] niemand van v doet de Wett? ^‡ waerom zoucket ghy my te dooden?

* Exod.24.a.3 Act.7.g.53

‡ Mat.12.b.14 Marc 3.a.6 Ioan.5.c.18 end .10.g.39 end .11.f.47

20

De schare andwordde, end zeyde: ^* Du hebst eęnen duuel: wie zouckt dy te dooden?

* Ioan.8.f.48 end .10.d.20

21

Iesus andwordde, end zeyde tot hen: Eęn werck heb ick ghedaen, end ghy verwonderet v alle.

22

Daerom heeft v Moses ghegheuen ^* de Besnijdeniß, (niet dat zy wt Mose zy, ^‡ mer wt den vaderen,) end [nochtans] ghy besnijdet eęnen mensch op dem Sabbath.

* Leui.12.a.3

‡ Gen.17.b.10

23

⁺Zo eęn mensch de besnijdeniß anneemt op dem Sabbath, ⁺ op dat de Wet Mosi niet ghebroken werde: toornet ghy ouer my dat ick eęnen ganschen mensch hebbe op dem Sabbath ghezond ghemaeckt?

+ G

+ Of. alzo dat. etc.

24

^* Richtet niet na dem anzien, mer richtet eęn oprecht gherichte.

* Deu.1.c.16

25

Doe zeyden zommighe wt den Hierusalemschen: Is deze niet die, den zy zoucken te dooden?

26

End zie, hy spreeckt vrijwt, end zy zegghen hem niets. Zolden de Ouer-

[p. 170r]

sten nu ghewißlick moghen bekennt hebben dat deze ghewißlick ⁺ de Ghezalfde zy?

+ Christus

27

^* Doch wy weten van waer deze is: wanneęr auer de Ghezalfde ghekommen zal zijn, zo weet niemand van waer hy is.

* Matt.13.g.55 Marc.6.a.3 Luc.4.d.22

28

Zo riep dan Iesus doe hy in dem tempel leęrde, end zeyde: Oock kennet ghy my, end wetet van waer ick bin: end ick bin van my zeluen niet kommen, mer die my ghezonden heeft die is waerachtigh, welcken ghy niet kennet.

29

^* Ick auer kenne hem: want ick bin van hem, end hy heeft my wtghezonden.

* Ioan.10.c.15

30

^‡ Doe zochten zy hem gheuanglick te nemen: end niemand slough de handen an hem, ⁺ want zijn vre was noch niet kommen.

‡ Marc.11.c.18 Luc.19.g.47 end .20.d.19 Ioan.7.c.19 end .8.e.37

+ E

31

^* Menighe auer wt der scharen gheloofden in hem, end zeyden: Wanneęr ⁺ de Ghezalfde ghekommen zal zijn, zal hy doch meęr teękens doen, dan die deze ghedaen heeft?

* Ioan.8.d.30

+ Christus

32

De Phariséers hoorden de schare zulcks van hem murren: end de Phariséers end de Ouerpriesters schickten dienaers wt, dat zy hem gheuanglick namen.

33

Zo zeyde Iesus tot hen: ^* Ick bin noch eęn kleyne tijd by v, end ick ga hén tot dem die my ghezonden heeft.

* Ioan.16.b.16

34

^* Ghy zullet my zoucken, end zullet my niet vinden: end waer ick bin, daer konnet ghy niet hén kommen.

* Ioan.8.c.21 end .13.d.33 Ierem.29.c.13

35

Zo zeyden de Iœden onder den ande-

[p. 170v]

ren: Waer zal deze hén gaen dat wy hem niet vinden zullen? Zal hy doch onder de verstroeyde Griecken gaen, end de Griecken leęren?

36

⁺Wat is dit vœr eęn rede dat hy spreeckt: Ghy zullet my zoucken, end niet vinden: end waer ick bin, daer konnet ghy niet hén kommen?

+ F

37

Auer am ^* lesten daghe welcker de groote dagh des feęsts was, stond Iesus, riep wt, end zeyde: ^* Wem dar dorstet, die komme tot my end drincke

* Leui.23.f.36

* Ioan.6.d.35 Esa.55.a.1 Apoc.22.d.17

38

^‡ Wie in my ghelooft ghelijckerwijß de Schrift ghezegt heeft, van deß buyck zullen vloeden des leuendighen waters vloeyen.

‡ Esa.12.a.3 end .44.a.3 Ioel.2.g.28 Act.2.c.17

39

(Dit auer zeyde hy van dem Gheęst welcken entfanghen zolden die in hem gheloofden. Want de heylighe Gheęst was noch niet [ghezonden], want Iesus was noch niet verklaert.)

40

Menighe auer wt der scharen die deze rede hoorden, zeyden: ^* Deze is waerlick de Propheet.

* Mat.21.d.46 Luc.7.c.16 Ioan.6.b.14

41

Andere zeyden: ^‡ Deze is de ⁺ Ghezalfde. Andere auer zeyden: Zolde oock de Ghezalfde wt Galiléa kommen?

‡ Ioa.4.f.42

+ Christus.

42

^* Zegt de Schrift niet dat de Ghezalfde kommen moet wt dem zade Dauids, ^{+ *} end van der vlecke Bethleem daer Dauid was?

* Psal.132.b.11

+ G

* Mich.5.a.2 Matt.2.a.6

43

Dar ward dan eęn tweędracht onder der schare om zynent willen.

44

Zommighe auer wt hen wolden hem gheuanghlick nemen, mer niemand slough de handen an hem.

[p. 171r]

45

Zo quamen de dienaers tot den Ouerpriesteren end den Phariséeren: welcke tot hen zeyden, Waerom hebbet ghy hem niet hær ghebracht?

46

De dienaers andwordden: Noyt sprack mensch alzo, ghelijck deze mensch.

47

Doe andwordden hen de Phariséers: Zijt ghy oock veruoert?

48

^* Heeft doch iemand wt den Ouersten of wt den Phariséeren an hem ghelooft?

* Esa,33.c.18 Ioan.12.f.42 1.Cor.1.d.24

49

Mer deze schare die van der Wet niet weet, is verulouckt.

50

Zo zegt tot hen Nicodemus, ^* die by nacht tot hem quam, welcker eęn van hen was:

* Ioan.3.a.2 end .19.g.39

51

^* Richt doch onze wet eęnen mensch, eęr zy van hem hoore, end bekenne wat hy doet?

* Exod.33.a.1 Leui.19.c.15 Deut.1.c.17 end .17.b.8. end .19.c.15 Eccli.42.a.1

52

Zy andwordden, end zeyden tot hem: Bist du oock wt Galiléen? onderzouck, end zie dat wt Galiléa gheęn Propheet is opghestaen.

53

End eęn ieghelick vertrack na zynem huyze.