Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

1

DAerna was ^* eęn feęst der Iœden, end Iesus toogh hénop na Hierusalem.

* Leui.23.a.2 Deut.26.a.1

2

Te Hierusalem auer by der schapeplaetß is eęn baadwater, toeghenaemt op Hebreesch Bethesda, end heeft vijf voorhuyzen:

3

In welcken lagh eęn groote menighte krancken, blinden, krœpelen, verdorreden, die dar wachtden op de beweghing des waters.

4

Want eęn Enghel daelde hæraf ter zekerer tijd in het baadwater, end beroerde het water. Wie nu de eęrst na der beroeringhe des waters hénin daelde, die ward ghezond mit wat zieckten hy oock beuanghen was.

5

Aldaer auer was eęn mensch, welcker acht end dertigh iaren mit kranckheyt beuanghen was:

6

Doe Iesus den zeluen zagh ligghen, end bekennde dat hy nu langhe [mit kranckheyt] beuanghen was, ⁺ zegt hy tot hem: Wilt du ghezond werden?

+ B

7

De krancke andwordde hem: Heęr, ick heb gheęnen mensch wanneęr het water gheroert werdt, die my in het baadwater aflate: mer wanneęr ick komme, zo daelt eęn ander voor my hénin.

8

Iesus zegt tot hem: ^* Sta op, neem dijn bedde op, end wandel hén.

* Matt.9.a.6 Marc.2.b.11 Luc.5.e.24

[p. 163v]

9

End van stonden an ward de mensch ghezond: end nam zijn bedde op, end wandelde. ^* Het was auer Sabbath op den zeluen dagh.

* Ioan.9.b.14

10

Zo zeyden de Iœden tot dem die ghezond was gheworden: Het is Sabbath ^* het is dy niet verorloft het bedde te draghen.

* Exo.20.b.10 Deut.5.b.13 Ezech.20.b.12 Matt.12.a.2 Marc.2.d.24 Luc.6.a.2

11

Hy andwordde hen: Die my ghezond ghemaeckt heeft, die heeft my ghezegt: Neem dijn bedde op, end wandel hén.

12

Zo vraeghden zy hem: Wie is de mensch die dy ghezegt heeft, Neem dijn bedde op, end wandel hén?

13

Die auer ghezond ghemaeckt was, wist niet wie hy was: ⁺ want Iesus ⁺ was der schare onbekent die ter zeluer plaetse was.

+ C

+ Of, hield zick als eęn vrémdelingk voor der schare die etc.

14

Daerna vand hem Iesus in dem tempel, end zeyde tot hem: Zie, du bist ghezond gheworden, ^* zondigh niet meęr op dat dy niet wat ærghers gheschiehe.

* Matt.12.d.15 Ioan.8.b.11 Hebr.6.a.5 end 10.e.26 2.Pet.2.d.20

15

De mensch ghingk hén, end boodschapte’t den Iœden, dat het Iesus ware die hem ghezond ghemaeckt had.

16

End hierom veruolghden de Iœden Iesum, end zochten hem te dooden: om dat hy zulcks ghedaen had op dem Sabbath.

17

Iesus auer andwordde hen: ^* Mijn Uader werckt tot nu toe, end ick wercke oock.

* Ioan.14.b.10

18

^* Hierom zochten de Iœden deß te meęr hem te dooden, want hy niet alleęnlick den Sabbath brack, mer oock zeyde ^* dat God zijn eyghen Uader ware, end maeckte hem zeluen Gode ghelijckmatigh.

* Ioan.7.c.19

* Mat.27.e.42 Sap.2.d.18 Ioan.10.f.33

19

Zo andwordde Iesus end zeyde tot hen: Amen amen ick zeg v, ^‡ de Zoon kann

‡ Ioan.9.a.4

[p. 164r]

niets van hem zeluen doen, dan wat hy ziet den Uader doen: ^* want zo wat de zelue doet, ⁺ dat doet oock deßghelijcken de Zoon.

* Esa.54.b.5 Ioan.10.e.30 end .14.b.9 end .17.a.5

+ D

20

Want de Uader heeft den Zoon lief, ^‡ end wijßt hem alles wat hy doet: end zal hem grooter wercken wijzen dan deze, op dat ghy v verwonderet.

‡ Ioan.1.b.11 end .7.b.16 end .8.d.28 end .14.d.24

21

Want ghelijckerwijß de Uader de dooden verweckt end leuendigh maeckt, alzo maeckt oock de Zoon leuendigh die hy will.

22

Want de Uader richt niemand, ^* mer alle gherichte heeft hy dem Zone ghegheuen:

* Matt.11.d.27

23

Op dat alle den Zoon eęren, ghelijckerwijß zy den Uader eęren. Wie den Zoon niet eęrt, die eęrt den Uader niet die hem ghezonden heeft.

24

^* Amen amen ick zeg v, wie mijn word hoort end ghelooft dem die my ghezonden heeft, die heeft het eęwigh leuen: ^* end kommt niet in het gherichte, mer is van dem dood in het leuen héndoor ghegaen.

* Ioan.8.f.51

* Luc.23.f.42

25

Amen amen ick zeg v, De vre kommt, end is nu rede, ^* dat de dooden hooren zullen de stemm des Zoons Godes, ⁺ end die ze ghehoort zullen hebben, die zullen leuen.

* 1.Pet.4.b.6

+ E

26

Want ghelijckerwijß de Uader het leuen heeft in hem zeluen, alzo heeft hy oock dem Zone ghegheuen het leuen te hebben in hem zeluen.

27

End heeft hem macht ghegheuen oock gherichte te doen, want hy eęns menschen Zoon is.

28

Uerwonderet v deß niet: want de vre kommt in welcker ^* alle die in den graf-

* 1.thes.4.d.16

[p. 164v]

steęnen zijn, zullen zijn stemm hooren:

29

^* End die goed ghedaen zullen hebben, zullen hæruoor gaen tot der opstandinghe des leuens: die auer quaad ghedaen zullen hebben, tot der opstandinghe des gherichtes.

* Dani.12.a.2 Mat.25.d.47

30

Ick kann niets van my zeluen doen: Alzo ick hoore, zo richte ick, end mijn gherichte is oprecht: want ick zoucke niet mynen will, mer den will des Uaders die my ghezonden heeft.

31

^* Zo ick van my zeluen tuyghe, zo is mijn tuyghniß niet waar:

* Ioan.8.b.14

32

^+* Eęn ander is het die van my tuyght end ick weet dat het tuyghniß welck hy van my ghetuyght, waar is.

+ F

* Esa.40.a.1 Matt.3.d.17

33

^* Ghy hebbet wtghezonden, tot Ioannes, end hy heeft tuyghniß ghegheuen van der waerheyt.

* Ioan.1.c.19

34

Ick auer neme gheęn tuyghniß vam mensche, mer zulcks zeg ick, op dat ghy ⁺ zaligh werdet.

+ Gr. beholden

35

Hy was de bernende end schijnende kærß: ghy auer woldet v vœr eęn wijle in zynem lichte verhœghen.

36

^* Ick auer heb eęn grooter tuyghniß dan Ioannes [tuyghniß]: ^‡ want de wercken die my de Uader ghegheuen heeft dat ick ze vollendighe, de zelue wercken [zeg ick] die ick doe, tuyghen van my, dat my de Uader wtgezonden heeft

* 1.Ioan.5.b.9

‡ Ioan.10.c.25

37

^* End de Uader die my ghezonden heeft, heeft zelue van my ghetuyght. Ghy hebbet noyt noch zijn stemm ghehoort, ^‡ noch zijn ghestalteniß ghezien:

* Matt.3.d.17 end 17.a.5 Marc.1.b.11 end .9.a.7 Luc.3.e.22 end .9.e.35 Ioan.1.e.33 end .6.c.27 end .8.c.18 2.Pet.1.d.17

‡ Exo.33.d.20 Deut.4.b.12 1.Tim.6.d.16 1.Ioan.4.c.12

38

End zijn word hebbet ghy niet in v blij-

[p. 165r]

uende: want ghy gheloouet dem niet, den hy wtghezonden heeft.

39

^{++ *} Onderzoucket de Schriften, want ghy meynet het eewigh leuen darin te hebben: ^‡ end de zelue zijn het die van my tuyghen.

+ G

+ Of, Ghy onderzoucket. etc.

* Esa.34.d.16 Luc.16.g.29 Act 17.c.11

‡ Deu.18.d.18 Luc.24.d.26 Ioan.1.g.45

40

End ghy willet tot my niet kommen, dat ghy het leuen haddet.

41

Ick neme gheęn eęr van menschen:

42

Auer ick kenne v dat ghy niet Godes liefde in v hebbet.

43

Ick bin kommen in mijns Uaders name, end ghy nemet my niet an: zo eęn ander kommet in zynem eyghenen name, den zullet ghy annemen.

44

^* Hoe konnet ghy geloouen, die dar eęr van malckanderen nemet, end de eęr die van Gode alleęne is, zoucket ghy niet?

* Ioan.12.g.43

45

Meynet niet dat ick v voor dem vader verklaghen zal: dar is eęn die v verklaeght, Moses, op welcken ghy ghehoopt hebbet

46

Want wenn ghy Mosi gheloofdet, zo zoldet ghy oock my gheloouen: ^* want hy heeft van my gheschreuen.

* Genes.3.c.15 end .22.d.18 end .26.a.4 end .49.b.10 Deut 18.d.18

47

Geloouet ghy auer zynen schriften niet, hoe zullet ghy mynen worden gheloouen?