Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

DAr was auer eęn mensch onder den Phariséeren welckes naem was ^‡ Nicodemus, eęn ouerste onder den Iœden:

‡ Ioa.19.g.39

2

^* Deze quam tot Iesu by nacht, end zeyde tot hem: Rabbi, wy weten dat du bist eęn leęrmeęster van Gode kommen: ^‡ Want niemand kann deze teękens doen die du doest, ten zy dat God mit hem zy.

* Ioa.7.g.50 end .19.g.39

‡ Io.9.c.16.f.33

3

Iesus andwordde, end zeyde tot hem: Amen amen ick zeg dy, ten zy dat iemand ⁺ anderwærf gheboren werde, zo kann hy het kœningkrijck Godes niet zien.

+ Of. van bouen

4

Nicodemus zegt tot hem: Hoe kann eęn mensch gheboren werden wanneęr hy old is? Kann hy doch in zyner moeder buyck anderwærf ingaen, end gheboren werden?

5

Iesus andwordde: Amen amen ick zeg dy, ^* ten zy dat iemand gheboren werde wt water end Gheęst, zo kann hy in het kœningkrijck Godes niet ingaen.

* Tit.3.b.4

6

^* Wat wt dem vleęsche gheboren is, dat is vleęsch: end wat wt dem Gheęst gheboren is, dat is gheęst.

* Rom.8.a.5

7

Laet het dy niet verwonderen dat ick dy ghezegt heb, dat ghy ⁺ ander-

+ Of, van bouen

[p. 159r]

wærf moetet gheboren werden.

8

De gheęst blaaßt waer hy hén wilt, end du hoorst zijn stemm: auer du weetst niet van waer hy kommt, end waer hy hén vaert. Alzo is eęn ieghelicker die wt dem Gheęst gheboren is.

9

⁺Nicodemus andwordde, end zeyde tot hem: ^* Hoe kann zulcks toegaen?

+ B

* Ioan.6.f.52

10

Iesus andwordde end zeyde tot hem: Du bist eęn leęrmeęster Israelis, end weetst du dit niet?

11

^* Amen amen ick zeg dy, wy spreken dat wy weten: end tuyghen dat wy ghezien hebben: end ghy nemet onze tuyghniß niet an.

* Ioan.7.b.16 end .8.d.28 end .12.g.49 end .14.d.24

12

Heb ick v ærdische dinghen ghezegt, end ghy ze niet gheloouet, hoe zullet ghy gheloouen zo ick v hemelsche dinghen zegghe?

13

^* End niemand is opgheuaren in den hemel, dan die van dem hemel afgheuaren is, des menschen Zoon die dar is in dem hemel.

* Ioan.6.g.62 Ephe.4.b.9

14

^* End ghelijckerwijß Moses de slang verhooght heeft in der woestijne, ^‡ alzo moet des menschen Zoon verhooght werden:

* Num.21.c.9 2.Reg.18.a.4

‡ Ioan.8.d.28 end .12.e.32

15

Op dat zo wie in hem ghelooft, niet verga, mer hebbe het eęwigh leuen.

16

^* Want alzo heeft God de wæreld ghelieft, dat hy zynen eęnighgheborenen Zoon ghegheuen heeft: ^‡ op dat zo wie in hem ^* ghelooft, niet verga, mer het eęwigh leuen hebbe.

* Rom.5.b.8 end .8,f.32 1.Ioan 4.b.9

‡ Luc.19.b.10 Ioan.3.d.36. end .6.e.47 1.Ioan.5.b.10

* Io.4.b.14

17

Want God heeft zynen Zoon niet ghezonden in de wæreld, dat hy de wæ-

[p. 159v]

reld richte: mer dat de wæreld door hem ⁺ beholden werde.

+ of, zaligh.

18

⁺Wie an hem ghelooft, die werdt niet ghericht: wie auer niet ghelooft, die is alrede ghericht: want hy heeft niet ghelooft an den naem des eęnighgheborenen Zoons Godes.

+ C

19

Dit auer is het gherichte, dat ^* het licht in de wæreld kommen is, end de menschen hebben meęr ghelieft de duysterniß dan het licht: want hœre wercken waren booß.

* Ioan.1.a.5

20

Want zo wie quaad doet, die haatt het licht, end kommt niet an het licht, op dat zyne wercken niet ghestraft werden.

21

^* Wie auer de waerheyt doet, die kommt an het licht, op dat zyne wercken gheopenbaert werden: want zy zijn in Gode ghedaen.

* Ephe.5.b.8

22

Daerna quam Iesus end zyne leęrionghers in Iœdéenland, end aldaer had hy zynen wandel mit hen, ^* end doopte.

* Ioan.4.a.1

23

^‡ Ioannes auer doopte oock in Enon by Salim: want aldaer was veel waters. End zy quamen daerhén, end wurden ghedoopt.

‡ Matt.3.b.6 Marc.1.a.5 Luc.3.b.7

24

Want Ioannes was noch niet in de gheuangheniß gheworpen.

25

Zo ward dar eęn vraghe onder den leęriongheren Ioannis mit den Iœden ouer der reyninghe.

26

^* End zy quamen tot Ioannes, end zeyden tot hem: Rabbi, die mit dy was ouer dem Iordaen, welckem du tuyghniß gaafst, zie, deze doopt, end alle kom-

* Matt.3.c.11 Marc.1.a.7 Luc.3.d.16 Ioan.1.b.15 d.26.30.e.34

[p. 160r]

men tot hem.

27

⁺Ioannes andwordde end zeyde: Eęn mensch kann niets nemen, ten zy dat het hem ghegheuen werde wt dem hemel.

+ D

28

Ghy zelue zijt myne tuyghen dat ick ghezegt heb: ^* Ick zy niet ⁺ de Ghezalfde, ^‡ mer bin voor hem wtghezonden.

* Ioan.1.b.20

+ .Christus

‡ Mala 3.a.1 Matt.11.b.10 Marc.1.a.2 Luc.7.d.27 Ioan.1.e.33

29

Wie de bruyd heeft, die is de bruydegom: de vriend auer des bruydegoms die dar staet end hem hoort, verurœght zick mit vrœghden ouer des bruydegoms stemme: Zo is nu de zelue myne blijschap veruult.

30

Hy moet wassen, ick auer afnemen.

31

^* Die van bouen hær kommt, is bouen alle: wie van der ærden is, die is ⁺ ærdisch, end spreeckt van der ærden: die van dem hemel kommt, is bouen alle:

* Ioan.8.c.23

+ Gr. wt der ærden.

32

End tuyght wat hy ghezien end ghehoort heeft, end zijn tuyghniß neemt niemand an.

33

Wie zijn tuyghniß anghenomen heeft, die heeft verzeghelt ^* dat God waerachtigh is.

* Rom.3.a.4

34

Want welcken God wtghezonden heeft, die spreeckt Godes worden. ^* Want God gheeft [hem] den Gheęst niet by mate.

* Ephe 4.b.7

35

De Uader heeft den Zoon lief, ^* end heeft hem alle dingk in de hand ghegheuen.

* Matt.11.d.26 end .28.d.18 Luc.10.d.22

36

^‡ Wie in den Zoon ghelooft, die heeft het eęwigh leuen: wie auer dem Zone ⁺ niet ghelooft, die zal het leuen niet zien, mer de toorn Godes blijft op hem.

‡ Ioan.3.b.16 end .6.e.47 1.Ioan.5.b.10

+ Gr. onghehoorzaem is.