Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

ENd ten derden daghe ward dar eęn bruyloft te Cana in Galiléen: end de moeder Iesu was aldaer.

[p. 157v]

2

Iesus auer ward oock ghenoodt ter bruyloft, end zyne leęrionghers.

3

End doe dar wijn entbrack, zegt de moeder Iesu tot hem: Zy hebben gheęnen wijn.

4

Iesus zegt tot hœr: ⁺ Urauw, wat is my end dy? Mijn vre is noch niet kommen.

+ of. Wat gaet het my end dy an?

5

Zijn moeder zegt tot den dienaren: Alles wat hy v zegt, dat doet.

6

Dar waren auer zeß steęnen waterkruycken ghestelt na der wijze der Iœden reyning, welcke ⁺ hielden elck tweę oft dry metreetmaten.

+ Gr. vaatden.

7

Iesus zegt tot hen: Uullet de waterkruycken mit water. End zy vulden ze tot bouen an.

8

End hy zegt tot hen: Scheppet nu, end bringhe’t dem opperdischmeęster. End zy brachten’t.

9

⁺Als auer de opperdischmeęster het water smaeckte welck nu wijn gheworden was, end wist niet van waer hy quam (de dienaers auer die het water gheschept hadden, wisten’t) roupt de opperdischmeęster den bruydegom,

+ B

10

End zegt tot hem: Alle mann zett eęrst den goeden wijn, end wanneęr men droncken gheworden is, dan [zett hy] den snoodsten: du hebst den goeden wijn tot nu toe beholden.

11

Dezen anuangk der teękenen dede Iesus te Cana in Galiléen, end openbaerde zijn heęrlicheyt: end zyne leęrionghers gheloofden an hem.

12

Daerna toogh hy hénaf na Capernaum, hy end zijn moeder, end zyne broe-

[p. 158r]

ders, end zyne leęrionghers: end bleuen niet velen daghen aldaer.

13

End het Pascha der Iœden was naby, end Iesus toogh hénop na Hierusalem,

14

^+* End vand in dem tempel die dar verkochten ossen, end schapen, end duyuen, end de wisselaers zitten.

+ C

* Matt.21.a.12 Marc.11.b.15 Luc.19.g.45

15

End hy maeckte eęn gheęssel van zeęlkens, end warp ze alle ten tempel hénwt zampt den schapen end ossen: end vergoot den wisselaren het wisselgheld, end stiet de disschen omm.

16

End zeyde tot den duyuenkræmeren: Nemet dit van hier hén, end maket niet mijns Uaders huyß tot eęn koophuyß.

17

Zyne leęrionghers auer wurden ghedachtigh deß dat dar gheschreuen is: ^* De ijuer dijns huyß heeft my opgheéten.

* Psal.69.b.10

18

Doe andwordden nu de Iœden, end zeyden tot hem: ^* Wat bewijzest du ons vœr eęn teęken dat du zulcks doest?

* Matt.12.c.38 end .16.a.1. Marc.8.b.11 Luc.11.d.29 Ioan.6.d.30

19

Iesus andwordde end zeyde tot hen: ^{+ ‡} Breket dezen tempel, end in dryen daghen zal ick hem oprichten.

+ Gr. ontbindet

‡ Mat.26.f.60 end .27.e.39 Marc.14.f.57 end .15.c.29

20

⁺Doe zeyden de Iœden: Deze tempel is zeß end viertigh iaren lang ghebauwt, end zalt du hem in dryen daghen oprichten?

+ D

21

Hy auer zeyde’t van dem tempel zijns lijfs.

22

Doe hy nu opghestaen was van den dooden, ghedachten zyne leęrionghers daran, dat hy hen dit ghezegt hadde: end gheloofden der Schrift, end dem worde dat Iesus ghezegt had.

23

Als hy auer te Hierusalem was op dem

[p. 158v]

Pascha ten feęstdaghe, vele gheloofden an zynen naem, doe zy zyne teękens anschauwden die hy dede.

24

Iesus auer vertrauwde hem zeluen hen niet, om dat hy ze alle kende:

25

End dat hy niet behoufde dat iemand tuyghniß gaue van dem mensche: ^* Want hy wist wat in dem mensche was.

* 1,Sa.16.b.7 1.Par.28.b.9 Psal.7.c.10 end .103.c.14 Iere.11.d.20 end .17.b 10. end .20.d.12