Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxiiij

1

⁺ AUer ten eęrsten daghe der Sabbatdaghen zeęr vrough quamen zy tot dem grafsteęn, end brachten de specery die zy bereydt hadden, end zommighe [vrauwen] mit hen.

+ Mat.28.a.1 Marc.16.a.1 Ioan.20.a.1

2

End vonden den steęn afghewentelt van dem grafsteęn: end ghinghen hénin, end vonden het lichaem des Heęren Iesu niet.

3

End het gheschiedde doe zy daerouer twijfelmoedigh waren, zie, dar stonden tweę mannen by hen in schimmerenden kleęderen.

4

End na dem zy verschrickten, end het anghezicht ter ærden neder sloughen, zeyden zy tot hen: Wat zoucket ghy den leuendighen by den dooden?

5

Hy is hier niet: mer is opgheweckt. ^* Ghedencket hoe hy v ghezegt heeft, doe hy noch in Galiléa was,

* Matt.16.c.21 end .17.d.22 end .20.b.18 Marc.8.d.31 end .9.e.31. .end .10.e.33 Luc.9.c.22 end .18.f.31

6

End zeyde dat des menschen Zoon ouergheleuert moest werden in der zondighen menschen handen, end ghecruycight werden, ⁺ end ten derden daghe wederopstaen.

+ B

7

End zy ghedachten an zyne worden.

8

^* End zy keęrden wederomm van dem grafsteęn end boodschapten dit alles den eluen end den anderen allen.

* Matt.28.b.8 Marc.16.b.8

9

Het was auer Maria magdalene, end Ioanna, end Maria Iacobi [moeder] end andere mit hen, welcke dit den Apostelen zeyden.

[p. 153r]

10

End hœre worden schenen hen als ⁺ bœzelinghen te zijn: end zy gheloofden hen niet,

+ Ydel geklap

11

^* Petrus auer stond op, end liep tot dem grafsteęn: end als hy zick hénin buckte, zagh hy de lijnene doucken alleęn liggen: end ⁺ quam tot hem zeluen, end verwonderde zick deß, dat dar gheschiedt was.

* Ioan.20.a.3

+ anders. ghingk hén, end verwonderde zick by hem zeluen deß dat. etc.

12

^* End zie, tweę wt hen ghinghen ten zeluen daghe in eęn vlecke, welcke was van Hierusalem zestigh stadywijdden ghenaemt Emmaus:

* Marc.16.c.12

13

End zy reedden onder malckanderen van dezem allem dat dar gheschiedt was.

14

End het gheschiedde doe zy t’zamen reedden end beuraeghden, ^* dat oock Iesus naby quam, end ghingk te ghelijck mit hen:

* M tt.18.c.20 Luc.24.e.35

15

⁺Hœre ooghen auer wurden gheholden dat zy hem niet bekenden.

+ C

16

End hy zeyde tot hen: Wat zijn dit vœr reden die ghy wandelende onder malckanderen teghenwærpt, end zijt trœrzichtigh?

17

Doe andwordde auer eęn mit name Cleophas end zeyde tot hem: Bist du alleęn eęn vrémdelingk te Hierusalem, die niet wetest wat in dezen daghen aldaer gheschiedt is?

18

End hy zeyde tot hen: Wat? End zy zeyden tot hem: Uan Iesu dem Nazarener, ^* welcker was eęn Prophetisch mann, gheweldigh in daden end worden, voor Gode end allem volcke:

* Luc.7.c.16 Ioan.4.c.19 end .6.b.14

[p. 153v]

19

End hoe hem de Ouerpriesters end onze ouersten ouergheleuert hebben in de verdommeniß des doods, end hebben hem ghecruycight.

20

⁺Wy auer hoopten dat hy ware ^* die Israel verlossen zolde. End bouen dit alles, zo is het huyden de derde dagh dat zulcks gheschiedt is.

+ D

* Act.1.a.6

21

^* Mer oock hebben ons verschrickt ghemaeckt zommighe vrauwen der onzeren, welcke des morghens vrough by dem grafsteęn zijn gheweeßt:

* Matt.28.b.8 Marc.16.c.10 Ioan.20.a.2

22

End doe zy zijn lichaem niet vonden, quamen zy end zeyden dat zy oock eęn ghezichte der Enghelen ghezien hadden welcke zegghen, hy leue.

23

End onzer zommighe ghinghen hén tot dem grafsteęn, end beuonden’t alzo als oock de vrauwen ghezegt hadden: hem auer zaghen zy niet.

24

End hy zeyde tot hen: O verstandloozen end traagh van herten te gheloouen in allem dem, dat de Propheten ghesproken hebben:

25

^* Moest Christus niet zulcks lijden, end in zijn heęrlicheyt ingaen?

* Esa.50.b.6 end .53.b.5

26

^‡ End hy begann van Mose, ^* end van allen den Propheten, end leyde hen wt in allen den Schriften, wat van hem zeluen [gheschreuen] was.

‡ Gene.3.c.15 end 22.d.18 end .26.a.4 end .49.b.10 Deut.18.d.15

* psa.132.b.11 Esa.4.a.2 end .7.b.14 end .9.b.6 end .40.c.10 Ierem.23.a.5 end .33.c.14 Eze.34.f.23 end .27.f.24 Dani.9.f.24 Mich.7.d.20

27

End zy quamen na by de vlecke daer zy hén ghinghen: end hy gheliet zick als wolde hy voorder gaen.

28

^‡ End zy dwonghen hem, end zeyden: Blijf by ons: want het gaet op den

‡ Gene.19.a.2 Iudic.19.e.21 Act.16.c.15 Hebr.13.a.2

[p. 154r]

auend, end de dagh is gheuallen. End hy ghingk hénin by hen te blijuen.

29

⁺End het gheschiedde doe hy mit hen ⁺ anzat dat hy het brood namm, end zeyde lof, end brack het end gaf het hen.

+ E

+ Gr. anleende

30

Hœre ooghen auer wurden gheopent, end zy bekenden hem: end hy ward hen onschijnlick.

31

End zy zeyden onder malckanderen: Brande onze herte niet in ons, doe hy mit ons sprack op dem weghe, end als hy ons de Schrften opende?

32

End zy stonden op ter zeluer vren, end keęrden weder na Hierusalem, end vonden de elue te hoop verzamelt, end die by hen waren,

33

Welcke zeyden: De Heęr is waerachtlick opghestaen, end is van Simon ghezien.

34

End oock zy vertelden wat op dem weghe gheschiedt was: end hoe hy van hen bekennt ware door het breken des broods.

35

^* Doe zy auer zulcks spraken, stond Iesus zelue midden onder hen, end zegt tot hen: Urede zy mit v.

* Marc.16.c.14 Ioan.20.e.19 1.Cor.15.a.5

36

Zy auer wurden verschrickt end vreęßden zick, end meynden, zy anschauwden eęnen gheęst.

37

⁺End hy zeyde tot hen: Wat zijt ghy beroert, end waerom klimmen [zulcke] ouerdenckinghen op in uwen herten?

+ F

38

Ziet myne handen end myne voeten: want ick bin’t zelue. Betastet my, end ziet: want eęn gheęst heeft noch vleęsch noch beęnders, ghelijck ghy my ziet hebben.

39

End doe hy dit ghezegt had, toonde

[p. 154v]

hy hen de handen end de voeten.

40

Doe zy auer noch niet gheloofden van blijschap, end zick verwonderden, zeyde hy tot hen: ^* Hebbet ghy hier wat te eten?

* Ioan.21.b.10

41

Zy auer boden hem an eęn stuck ghebraden vischs end van honighraten.

42

End hy nam het, end at het in hœrer teghenwordigheyt,

43

End zeyde tot hen: ^* Dit zijn de worden die ick tot v sprack, doe ick noch by v was, dat het noodigh was alles veruult te werden, wat van my gheschreuen is in der Wet Mosi, end in den Propheten, end in den psalmen.

* Matt.16.c.21 end .17.d.22 end .20.b.18 Marc.8.d.31 end .9.e.31 end .10.e.33 Luc.9.c.22 end .18.f.31 end .24.a.6

44

⁺Doe opende hy hen hœr verstand dat zy de Schriften verstonden.

+ G

45

End zeyde tot hen: ^‡ Alzo is’er gheschreuen, end alzo moest Christus lijden, end ten derden daghe opstaen van den dooden:

‡ Psal.22.b.7 Act.17.a.3

46

End ghemoedbetering ^* end quijtlating der zonden ghepredickt werden in zynem name onder allen volcken, ^‡ end beghinnen van Hierusalem.

* Act.13.f.38 1.Ioan.2.b.12

‡ Act.2.a.4

47

Ghy auer zijt dezes [alles] tuyghen.

48

^* End zie, ick zende wt ouer v de toezegghing mijns Uaders: ^‡ ghy auer zittet in der stad Hierusalem tot dat ghy anghedaen werdet mit kracht wt der hooghde.

* Ioa.14.d.26 end .15.d.26 end .16.a.7

‡ Act.1.a.4

49

^* Hy leydde ze auer hénwt tot in Bethanien: end hief zyne handen op, end zeghende ze.

* Matt.26.c.31 end .28.c.10 Marc,14.c.28 end .16.b.7

50

^‡ End het gheschiedde, doe hy ze zeghende, dat hy van hen scheydde, end voer hénop in den hemel.

‡ Marc.16.d.19 Act.1.b.9

51

End na dem zy hem anghebeden had-

[p. 155r]

den, keęrden zy weder na Hierusalem mit grooter vrœghden.

52

End waren altijd in dem tempel, loofden end danckten God. Amen.