Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xx.

1

⁺ ENd het gheschiedde op dier daghen eęnen, doe hy het volck in dem tempel leęrde end euangelizeerde, dat de Ouerpriesters end de Schriftgheleęrden mit den Olderlinghen anquamen,

+ Matt.21.b.23 Marc.11.d.27 Exod.2.b.14 Act.4.b.7 end .7.c.27

2

End spraken tot hem, end zeyden: Zeg ons, wt wat macht doest du dit? of wie is het die dy deze macht gegheuen heeft?

3

Hy auer andwordde end zeyde tot hen: Ick zal v oock eęn rede vraghen, end ⁺ andworddet my:

+ Gr. zegghet

4

De Doop Ioannis was hy vam hemel, of van menschen?

5

Zy auer ouerleyden by hen zeluen, end zeyden, Zegghen wy vam hemel, zo zal hy zegghen, waerom hebbet ghy dan hem niet ghelooft?

6

Zegghen wy auer van menschen, zo zal ons het gansche volck steęnighen. ⁺ Want het holdt vœr ghewiß dat Ioannes eęn Propheet zy.

+ B

7

End zy andwordden dat zy niet wisten waer hy hær ware.

8

End Iesus zeyde tot hen, Zo zeg ick

[p. 142v]

v oock niet, wt wat macht ick dit doe.

9

^* Hy began auer te zeggen tot dem volcke deze verghelijcking: Eęn mensch plantde eęnen wijngaerd, end bestedighde hem [den] landbauweren, end was buyten lands langhe tijd.

* Matt.21.d.33. Marc.12.a.1 Psal.80.b.9 Esa.5.a.1 Ierem.2.d.21 end .12.c.10

10

End ter bequamer tijd zand hy eęnen dienstknecht wt tot den landbauweren, dat zy hem gauen van der vrucht des wijngaerds: auer de landbauwers sloughen hem, end zonden hem ledigh wt.

11

End daerenbouen zand hy noch eęnen anderen dienstknecht: Zy auer sloughen den zeluen oock, end handelden hem schandelick, end zonden hem ledigh wt.

12

End hierenbouen zand hy oock den derden: Zy auer wondden dezen oock, end worpen hem hénwt.

13

⁺Auer de Heęr des wijngaerds zeyde: Wat zal ick doen? ick zal dien mynen gheliefden zoon zenden: misschien wanneęr zy hem zien, zullen zy zick entzien.

+ C

14

Doe auer de landbauwers hem zaghen, bedachten zy by zick zeluen, end zeyden: ^* Deze is de ærfghenaem, ^‡ kommet, latet ons hem dooden: op dat de ærue onze werde.

* Psal.2.c.8 Hebr.1.a.2

‡ Psa.2.a.1 Matt.26.a.3 end .27.a.1 Ioan.11.g.53 Gene.37.d.18

15

End worpen hem ten wijngaerd hénwt, end doodden hem. Wat zal nu de Heęr des wijngaerds hen doen?

16

Hy zal kommen, end deze landbauwers ommbringhen: end zal den wijngaerd anderen wtgheuen. Doe zy auer dit hoorden, zeyden zy: Dat zy verr.

17

Hy auer zagh ze an, end zeyde, Wat

[p. 143r]

is dan dit, dat dar gheschreuen is, ^* De Steęn, den de timmerluyden verworpen hebben, deze is gheworden tot het hoofd des houcks?

* Psal.118.c.22 Esa.28.d.16. Mat.22.d.22 Marc.12.a.10 Act.4.b.11 Rom.9.g.33 1.Petr.2.b.7

18

^‡ Zo wie op dezen steęn vallet, die zal in stucken ghebroken werden: ^* op wen auer hy vallet, den zal hy verbrijzelen.

‡ Esa.8.c.15 Zach.12.a.3

* Dan.2.e.34

19

⁺End de Ouerpriesters end de Schriftgheleęrden zochten ter zeluer vren de handen an hem te slaen, end vreęßden zick voor dem volcke: want zy bekenden dat hy op ze deze verghelijcking ghezegt hadde.

+ D

20

^* End zy namen acht op hem, end zonden ^‡ beklickers wt, die zick zeluen veynzen zolden als waren zy rechtuærdigh: op dat zy hem vinghen in der rede, end hem ouerleuerden der Ouerheyt end der macht des landuooghds.

* Matt.22.b.16 Mar.12.b.13

‡ Lourers,

21

End zy vraeghden hem, end zeyden, Leęrmeęster, wy weten dat du recht zegst end leęrst, end niet achtest het wterlick anzien, mer leęrst den wegh Godes in waerheyt:

22

Is het ons verorloft eęnem Keyzer beschatting te gheuen, of niet?.

23

Doe hy bemærckte hœre ærghlistigheyt, zeyde hy tot hen: Wat verzoucket ghy my?

24

Toonet my den penningk, wiens beeld end opschrift heeft hy? Zy auer andwordden end zeyden: Eęns Keyzers.

25

⁺End hy zeyde tot hen: ^* Zo betalet eęnem Keyzer, dat eęns Keyzers is, end Gode, dat Godes is.

+ E

* Matt.17.d.25 Rom.13.b.7

[p. 143v]

26

End zy konden zijn word niet bestraffen voor dem volcke: end verwonderden zick zyner andworde, end zweghen still

27

^* Tot hem auer ghinghen zommighe der Saducéeren welcke wederspreken dat dar eęn opstanding zy, end vraeghden hem,

* Mat.22.c.23 Marc.12.b.18 Act.23.b.8.

28

End zeyden: Leęrmeęster, ^‡ Moses heeft ons gheschreuen, zo iemands broeder stærft, die eęn wijf heeft, end deze kinderlooß stærft, dat zijn broeder het wijf neme, end zynem broeder zaad verwecke.

‡ Deut.25.a 5

29

Dar waren auer zeuen ghebroeders, end de eęrste namm eęn wijf, end starf kinderlooß.

30

End de tweęde namm die ten wijue, deze starf oock kinderlooß.

31

End de derde nam ze deßghelijcken: auer oock de zeuen, ⁺ end lieten gheęne kinders na, end storuen.

+ F

32

Ten allerlesten starf oock de vrauw.

33

Nu in der opstandinghe, welckes wijf onder hen ⁺ werdt zy? want de zeuen hebben ze ten wijue ghehadt.

+ anders. zal zy zijn?

34

End Iesus andwordde end zeyde tot hen: De kinders dezer eęwen trauwen, end werden ter trauwe wtghegheuen.

35

Welcke auer wærdigh gheacht zullen werden die eęwe te verwæruen end de opstanding wt den dooden, die trauwen niet noch werden ter trauwe niet wtghegheuen:

36

Want zy konnen niet meęr stæruen: want zy zijn ^* den Enghelen Godes ghelijck, end zijn Godes kinders, dewijl zy kinders zijn der opstanding.

* 1.Ioan.3.a.2

[p. 144r]

37

Dat auer de dooden opstaen, heeft oock Moses bewezen by dem haaghbosch, ^* als hy zegt, dat de Heęr zy de God Abrahams, end de God Isaacs, end de God Iacobs.

* Exod.3.b.6 Act.7.d.32. Hebr.11.d.16

38

God auer is niet [eęn God] der dooden, mer der leuendighen: want zy leuen hem alle.

39

⁺Auer zommighe der Schriftgheleęrden andwordden end zeyden: Leęrmeęster, du hebst wel ghezegt. End zy dorsten hem voordan niet meęr iet vraghen.

+ G

40

^* Hy auer zeyde tot hen: Hoe zegt men dat ⁺ Christus zy Dauids zoon, End Dauid zelue zegt im psalmbouck,

* Mat,22.d.40 Marc.12.d.35

+ de Ghezalfde

41

^‡ De Heęr heeft ghezegt tot mynem Heęre, zit te myner rechter hand,

‡ Psal.110.a.1 Act.2.e.34 1.Cor.15.c.25 Heb.1.d.31 end .10.c.13

42

Tot dat ick legghe dyne vianden tot eęn voetbanck dyner voeten?

43

Dauid dan heett hem Heęr, end hoe is hy zijn zoon?

44

Doe auer het gansche volck toehoorde, zeyde hy tot zynen leęriongheren:

45

^* Hoedet v voor den Schriftgheleęrden, die dar willen wandelen in langhen kleęderen, end hebben zeęr gærn de begroetinghen op de marckten, end het voorghestoelte in den Synagoghen, end de vooranzittinghen in den maeltijden:

* Matt.23.a.5 Marc.12.d.39 Luc.11.f.43

46

^* Welcke verslinden der weduwen huyzen, end wenden langhe ghebeden voor: deze zullen eęn meęrder ghericht entfanghen.

* Matt.23.b.12 Marc.12.d.40 2.Tim.3.b.6 Tit.1.c.11