Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xix.

1

ENd hy toogh hénin, end ghingk door Hiericho:

2

End zie, dar was eęn mann mit name gheheeten Zacheus, welcker eęn Ouertollenaer was, end deze was rijck,

3

End zocht Iesum te zien wie hy ware: end konde niet voor der schare, want hy was kleyn van lengden.

4

End hy liep voorhén, end klamm op eęnen wilden vijghboom, op dat hy hem zaghe: want hy moest aldaer voorby doorgaen.

5

End als Iesus quam an de [zelue] plaetß, zagh hy op, end ward zyner ghewaer, end zeyde tot hem: Zachée, daal haestlick hæraf: want ick moet huyden

[p. 140r]

in dynem huyze blijuen.

6

End hy daalde haestlick hæraf, end nam hem op mit vrœghden.

7

End alle die dit zaghen, murreden [daerouer] end zeyden, Hy ware tot eęnem zondighen manne ter herberghen inghegaen.

8

⁺Zacheus auer stond dar, end zeyde tot dem Heęre: Zie, Heęr, de helfd myner goederen gheue ick den armen: end zo ick iemanden iet bedrieghlick ontoghen heb, dat gheue ick vieruoldigh weder.

+ B

9

Iesus auer zeyde tot hem: Huyden is dezem huyze zaligheyt wederuaren, nademmael ⁺ het oock eęn zoon Abrahe is.

+ Of. hy

10

^* Want des menschen Zoon is kommen te zoucken, end ⁺ zaligh te maken, dat verloren was.

* Matt.10.a.6 end .15.c.24 end .18.b.11 Act.13.g.46

+ Gr. te beholden

11

Doe zy dit hoorden, zeyde hy daerenbouen eęn verghelijcking, om dat hy na by Hierusalem was, end dat zy meynden dat het kœningkrijck Godes van stonden an zolde gheopenbaert werden.

12

^* Zo zeyde hy: Eęn edel mensch reyßde hén in eęn verre landschap, dat hy eęn kœningkrijck vœr zick zeluen anname, end dan wederquame.

* Matt.25.b.14 Marc.13.d.34

13

Hy auer riep zyne tien dienstknechten end gaf hen tien mnaponden, end zeyde tot hen: Doet næring tot dat ick komme.

14

⁺Zyne burghers auer haattden hem, end schickten hem ambassaetschap na, end zeyden: Wy willen niet dat deze ouer ons ⁺ regnere.

+ C

+ Gr. kœningk zy.

15

End het gheschiedde dat hy we-

[p. 140v]

derkeęrde, na dem hy het kœningkrijck inghenomen had, end hiet die dienstkneckten tot zick roupen, welcken hy het gheld ghegheuen had: op dat hy wiste wat eęn ieghelick ghehandelt had.

16

De eęrste auer quam, end zeyde: Heęr dijn mnapond heeft tien mnaponden verworuen.

17

End hy zeyde tot hem: Wel an, goede dienstknecht, dewijl du im minsten trauw bist gheweeßt, zo heb gheweld ouer tien steden.

18

End de tweęde quam, end zeyde: Heęr dijn mnapond heeft vijf mnaponden wtghebracht.

19

Hy zeyde auer oock tot dezem: End du, zy ouer vijf steden.

20

End de ander quam, end zeyde: Heęr, zie dar dijn mnapond, welck ick in eęnem zweętdouck wegh ghelegt had:

21

Want ick vreęßde voor dy, om dat du eęn hard mensch bist: du neemst hén dat du niet ghelegt hebst, end mayst dat du niet ghezayt hebst.

22

Hy auer zegt tot hem: ^* Wt dynem monde zal ick dy richten, du booze dienstknecht. Du wist dat ick eęn hard mensch bin, dat ick hén neme dat ick niet ghelegt heb, end maye dat ick niet ghezayt heb:

* 2.Sa.1.c.16 Matt.12.c.37

23

⁺Waerom gaafst du dan mijn gheld niet in de wisselbanck, end wanneęr ick ghekommen ware, hadde ick het mit woucker vereyscht?

+ D

24

End hy zeyde tot den die dar by stonden: Nemet van hem het mnapond wegh, end

[p. 141r]

gheuet’t dem die tien mnaponden heeft.

25

(End zy zeyden tot hem: Heęr, hy heeft tien mnaponden.)

26

^* Want ick zeg v, dat zo wie dar heeft, dem zal ghegheuen werden: van dem auer die niet heeft, zal afghenomen werden oock dat hy heeft.

* Matt.13.b.12 end .25.c.29 Marc.4.c.24 Luc.8.c.18

27

Doch die myne vianden, die niet wolden dat ick ouer ze regneren zolde, bringhet hær, end slaet ze voor my dood.

28

End als hy zulcks zeyde, toogh hy voor, end ghingk hénop na Hierusalem.

29

^* End het gheschiedde als hy naby Bethphage end Bethanien quam by dem bergh, die dar gheheeten werdt der Olijuen, schickte hy tweę zyner leęriongheren wt,

* Matt.21.a.1 Marc.11.a.1

30

End zeyde: Gaet hén in de vlecke die teghen ouer ligt: end wanneęr ghy hénin kommet, ⁺ zullet ghy eęn vœlen anghebonden vinden, waerop gheęn mensch oyt ghezeten heeft: ontbindet het, end bringhet’t hær.

+ E

31

End zo v iemand vraghet, waerom ghy het ontbindet, zo zullet ghy alzo tot hem zegghen: De Heęr behouft zyner.

32

Auer de wtgheschickten ghinghen hén, end vonden ghelijckerwijß hy’t hen ghezegt had.

33

Doe zy auer het vœlen ontbonden, zeyden de heęren des zeluen tot hen: Waerom ontbindet ghy het vœlen?

34

Zy auer zeyden: De Heęr behouft zyner.

35

^* End zy brachten’t tot Iesu: ^‡ End worpen hœre kleęders op het vœlen, end zettden Iesum daerop.

* Ioa.12.b.14

‡ 2.Reg.9.c.13

[p. 141v]

36

⁺Doe hy auer hén toogh, spreydden zy hœre kleęders op den wegh.

+ F

37

End doe hy nu naby dem nederdale des Olijuenberghs quam, began de gansche menighte zyner leęriongheren. zick te verurœghen, end God te prijzen mit luyder stemme, ouer allen den krachtighen daaden die zy ghezien hadden,

38

End zeyden: ^* Gheprezen zy die dar kommt eęn kœningk im name des Heęren: ^* vrede zy im hemel, end heęrlicheyt in den allerhooghsten [plaetsen].

* Psal.118.d.26

* Luc.2.b.14 Ephes.2.b.13

39

End zommighe Phariséers wt der scharen zeyden tot hem: Leęrmeęster, bestraf dyne leęrionghers.

40

End hy andwordde end zeyde tot hen, Ick zeg v, zo deze zwijghen, ^* dat de steęnen van stonden an wtkrijschen zullen.

* Abacuc.2.c.11

41

End als hy naby kommen was, end zagh de stad an, weęnde hy ouer ze, end zeyde:

42

Och wenn oock du bekendest, ia oock in dezem dynen daghe, wat tot dynem vrede [dient]. Auer nu is het voor dynen ooghen verborghen.

43

Want dar zullen daghen ouer dy kommen dat dyne vianden dy omringhen zullen mit bolwerck, end zullen dy rond om belægheren, end zullen dy an allen zijden benauwen,

44

^* End zullen dy ter ærden slechten, end dyne kinders die in dy zijn: end zullen in dy steęn op steęn niet laten, daerom dat du niet bekennt hebst de tijd dyner bezoucking.

* Matt.24.a.2 Marc.13.a.2 1.Reg.9.b.9 Mich.3.d.13

45

^* End hy ghingk in den tempel, end begann wt te wærpen die daerin kochten end

* Matt.21.b.12 Marc.11.b.15 Ioan.2.c.14

[p. 142r]

verkochten.

46

End zeyde tot hen: Dar is gheschreuen, ^* Mijn huyß is eęn bedehuyß: ^‡ ghy auer hebbet dat ghemaeckt tot eęner moorderkuyle.

* 1.Reg.8.c.29 Esa.56.c.7

‡ Iere.7.b.11

47

End hy leęrde daghlicks in dem tempel: ^* Auer de Ouerpriesters end de Schriftgheleęrden, end de voorneemsten des volcks zochten hem omm te bringhen:

* Marc.11.c.18 Ioan.7.c.19 end .8.e.37

48

End vonden niet wat zy hem doen zolden: want het gansche volck hing hem an, end hoorde hem.