Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xvij.

1

⁺ HY zeyde auer tot den leęriongheren: Het is onmoghelick dat dar gheęn ærghernissen zolden kommen: Weę nochtans dem, door welcken zy kommen:

+ Matt.18.a.7 Marc.9.f.42

2

Het ware hem nutter dat eęn ⁺ mœlensteęn om zynen halß ghehanghen, end hy in de zeę gheworpen wurde, dan dat hy dezer kleynen eenen ærghere.

+ Gr. ezelmœlensteęn

3

Hoedet v zeluen. ^* Zondight auer

* Matt.18.b.15 Leui.19.d.17 Pro.17.b.10 Eccl.19.b.13 Iaco.5.d.9

[p. 136r]

dijn broeder teghen dy, zo straf hem: end zo hy ghemoedbetering doet, laet hem quijt.

4

End zo hy zeuenmael s’daghs teghen dy zondighe, end zeuenmael s’daghs zick tot dy bekeęre, end zegghe, Het is my leęd: zo laet hem quijt.

5

⁺End de Apostels zeyden tot dem Heęre: Uermeęrder ons het ghelooue.

+ B

6

De Heęr auer zeyde: ^* Haddet ghy ghelooue als eęn mostardkoren [groot is], ghy zoldet zegghen tot dezem moerboom, Werd wtgheroeyt, end verplantt in de zeę: end hy zolde v ghehoorzaem zijn.

* Matt.17.c.20 end .21.b.21

7

Wie is’er auer onder v, die eęnen dienstknecht heeft die hem plought of het veę weydt, die hem, wanneęr hy wederkomt van dem velde, van stonden an zegghe, Ga hén door, end ⁺ zit an:

+ Gr. vall an

8

End niet lieuer hem zegghet, Bereyd my het auendeten, end gord dy op, end dienn my tot dat ick gheéten end ghedroncken hebbe: end daerna zalt du eten end drincken?

9

Danckt hy doch den zeluen dienstknecht dat hy ghedaen heeft wat hem gheboden was? Ick meyn’s niet.

10

⁺Alzo oock ghy, wanneęr ghy alles ghedaen hebbet wat v gheboden is, zo zegghet, Wy zijn onnutte dienstknechten: want wy hebben ghedaen dat wy te doen schuldigh waren.

+ C

11

End het gheschiedde doe hy reyßde na Hierusalem, dat hy midden door Samarien end Galiléen toogh.

[p. 136v]

12

End als hy in eęn vleck ingaen zolde, entmoettden hem tien melaetsche mannen, welcke stonden van verr,

13

End verhieuen hœr stemm, end zeyden: Iesu ⁺ meęster, erbarm dy onzer.

+ Gr. Uoorstander

14

End doe hy ze zagh, zeyde hy tot hen: Gaet hén ^* vertoonet v zeluen den Priesteren. End het gheschiedde doe zy hén ghinghen, dat zy ghereynight wurden.

* Leuit.13.a.2 end .14.a.2 Matt.8.a.4 Luc.5.c.14

15

⁺Eęn auer onder hen, doe hy zagh dat hy ghezond gheworden was, keęrde weder, end preeß God mit luyder stemmen:

+ D

16

End viel op zijn anghezicht an zynen voeten, end danckte hem: end deze was eęn Samariter.

17

Iesus auer andwordde end zeyde: Zijn dar niet tien ghereynight? waer zijn auer de neghen?

18

Gheęne zijn dar vonden, die wederghekeęrt zijn Gode eęr te gheuen, dan deze vrémdgheboren.

19

End zeyde tot hem, Sta op, ga hén: dijn ghelooue heeft dy beholden.

20

Doe hy auer onderuraeght ward van den Phariséeren, wanneęr het kœningkrijck Godes toekommstigh ware, andwordde hy hen, end zeyde: Het kœningkrijck Godes kommt niet mit wterlicker waerneminghe:

21

⁺End men zal niet zegghen, ^* Zie hier, of, zie daer: want zie, het kœningkrijck Godes is binnen in v.

+ E

* Matt.24.b.23 Marc.13.c.21 Luc.21.b.7

22

Hy zeyde auer tot den leęriongheren: De daghen zullen kommen, wanneęr ghy zullet begæren te zien eęnen der daghen des menschen Zoons, end zul-

[p. 137r]

let’en niet zien.

23

End men zal v zegghen, zie hier, of, zie daer: gaet niet hén, end volghet oock niet.

24

Want ghelijckerwijß de blixem van dem eęnen [houcke] onder dem hemel schimmert, end schijnt tot an den anderen onder dem hemel: alzo zal oock des menschen Zoon in zynem daghe zijn.

25

^* Eęrst auer moet hy veel lijden, end verworpen werden van dezem gheslæchte.

* Matt.16.c.21 end .17.d.22 end .20.b.18 Marc.8.d.31 end .9.e.31. end .10.e.33 Luc.9.c.22 end .18.f.31 end .24.a.6

26

^‡ End ghelijckerwijß het gheschiedde ten daghen Noe: alzo zal het oock zijn in den daghen des menschen Zoons.

‡ Mat.24.c.27 Genes.6.b.5 1.Petr.3.c.20

27

⁺Zy aten, zy droncken, zy trauwden, end wurden ter trauwen wtghegheuen, tot op den dagh dat Noe in de arck inghingk: end de zonduloed quam, end bracht ze alle omm.

+ F

28

Deßghelijcken oock ghelijck het gheschiedde ten daghen Lot: Zy aten, zy droncken, zy kochten, zy verkochten, zy plantden, zy timmerden.

29

^* Auer ten daghe doe Lot wt Sodoma wtghingk, zo reghende’t vuer end sulpher van dem hemel, end bracht ze alle omm

* Gene.19.e.24 Deut.29.d.23 Esa.13.d.19 Iere.50.f.40 Ezech.16.f.49 Osee.11.c.8 Amos.4.d.11 Iude.b.7.

30

Euen ghelijck zal het zijn an dem daghe wanneęr des menschen Zoon gheopenbaert werdt.

31

⁺An dem zeluen daghe, wie op het dack zijn zal, end zijn huyßraad in dem huyze, die dale niet hæraf om dat wegh te nemen: end wie op dem velde [zijn zal], die keęre deßghelijcken niet weder na dem dat naghelaten is.

+ G

[p. 137v]

32

^* Ghedencket auer an Lots wijf.

* Gene.19.e.26

33

^‡ Zo wie zijn ziel zoucket te beholden, die zal ze verliezen: end wie ze verliezet, die zal ze leuendigh maken.

‡ Mat.10.d.39 end .16.d.25 Marc.8.d.35 Luc.9.c.24 Ioa.12.d.25

34

^* Ick zeg v, In der zeluer nacht zullen dar tweę op eęnem bedde zijn: de eęn zal medeghenomen, end de ander naghelaten werden.

* Matt.24 d.40 1.thes.4.d.17

35

Tweę zullen dar t’zamen malen, de eęne zal mede ghenomen, end de andere naghelaten werden.

36

End zy andwordden end zeyden tot hem: Waer Heęr?

37

End hy zeyde tot hen: ^* Waer het lichaem is, daer zullen zick oock de arends vergaderen.

* Iob.39.d.33 Mat.24.c.28