Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiiij.

1

ENd het gheschiedde doe hy quam in eęns ouersten der Phariséeren huyß op eęnen Sabbath brood te eten, dat zy acht op hem namen.

2

End zie, dar was eęn waterzuchtigh mensch voor hem.

3

End Iesus andwordde, end zeyde tot den Wetgheleęrden end den Phariséeren, end zeyde: Is het oock verorloft op den Sabbath te heylen?

4

Zy auer zweghen still. End hy nam den zeluen tot zick, end maeckte’n ghezond, end liet hem gaen.

5

End andwordde end zeyde tot hen: Wie is’er onder v, ^* zo zijn ezel of oß in den put vallet, die hem niet van stonden an hærwt trecken zal op den Sabbatdagh?

* Exod.23.a.5 Deut.22.a.4 Luc.13.c.13

6

End zy konden hem hierop gheęn andworde weder gheuen.

7

Hy zeyde auer eęn verghelijcking tot den ghenoodden, om dat hy anmærckte hoe zy de vooranzittinghen verkoren, ⁺ end zeyde tot hen:

+ B

8

Wanneęr du van iemanden ghenoodt werdest ter bruyloft, zo zit niet an in der vooranzittinghe, op dat misschien niet eęn eęrlicker dan du van hem ghenoodt zy:

9

End dat die dy end hem ghenoodt heeft, niet komme, end dy zegghe, Gheef dezem plaetß: end du alsdan beghinnest mit schanden de wterste plaetß te holden.

10

^+* Mer wanneęr du ghenoodt werdest zo ga hén, ⁺ zit an in der wterster plaetse: op dat wanneęr dar kommt die dy ghe-

+ C

* Pro.25.a.7

+ Gr. vall an in

[p. 131r]

noodt heeft, dy zegghe: Uriend, ga hénop: alsdan zal het dy eęr zijn voor den t’zamenanzittenden.

11

^* Want zo wie hem zeluen verhooght, die zal vernedert werden: end wie hem zeluen vernedert, die zal verhooght werden.

* Iob.22.d.29 Pro.29.d 23 Matt.23.a.11 Luc.18.c.14 Ia.4.b.6.c.10 1.Pet.5.b.5

12

Hy zeyde auer oock tot dem die hem ghenoodt had: ^‡ Wanneęr du eęn middaghmael of auendmael anrichtest, zo nood niet dyne vrienden, noch dyne broeders, noch dyne maghen, noch dyne rijcke nabuers: op dat zy dy oock niet t’eęnigher tijd weder nooden, end dy eęn verghelding gheschiehe:

‡ 2.Esd.8.c.11 3.Esdr.9.g.52 Prou.3.b.9 Tob.4.b.7

13

Mer wanneęr du eęn maeltijd anrichtest, zo roup armen, verlammden, krœpelen end blinden:

14

End du zalt gheluckzaligh zijn, want zy konnen’t dy niet verghelden: het zal dy auer vergolden werden in der opstandinghe der gherechtighen.

15

Doe auer dit hoorde eęn der ghener die t’zamen ⁺ anzaten, zeyde hy tot hem: Gheluckzaligh is die het brood eett in dem kœningkrijcke Godes.

+ Gr. anlaghen

16

⁺Hy auer zeyde tot hem: ^* Eęn mensch maeckte eęn groot auendmaal, end riep’er vele:

+ D

* Matt.22.a.2 Esa.25.b.6. Apoc.19.b.9

17

End zand zynen dienstknecht wt ter vren des auendmaals den ghenoodden te zegghen: Kommet, want het is alrede alles bereyd.

18

End zy begonnen zick alle mit den anderen te ⁺ entschuldighen. De eęrste zeyde tot hem, Ick heb eęnen acker ghekocht, end my is noodigh dat ick hénwt

+ Gr. af te zegghen.

[p. 131v]

ga, end hem bezie: ick bid dy, entschuldigh my.

19

End de ander zeyde: Ick heb vijf koppels ossen ghekocht, end ick ga hén ze te beprouuen: ick bid dy, entschuldigh my.

20

End de ander zeyde: Ick heb eęn wijf getrauwt, end daerom kann ick niet kommen.

21

End die dienstknecht wederghekeęrt zeyde dit zynem heęre weder. Doe ward de huyßheęr toornigh, end zeyde tot zynem dienstknecht: ⁺ Ga haestlick wt op de straten end steghen der stad, end bringhet hærin de armen, end lammen, end krœpelen, end blinden.

+ E

22

End de dienstknecht zeyde: Heęr, het is ghedaen alzo du beuolen hebst, end dar is noch plaetß.

23

End de heęr zeyde tot dem dienstknecht: Ga wt op de weghen end an de tuynen, end dwing ze hærin te kommen: op dat mijn huyß voll werde.

24

Want ick zeg v dat dier mannen die ghenoodt waren, gheęn mijn auendmaal smaken zal.

25

Dar ghinghen auer vele scharen mit hem: end hy wand zick omm, end zeyde tot hen:

26

^* Zo iemand tot my kommt, end haatt niet zynen vader, end moeder, end wijf, end kinders, end broeders, end zusters, ⁺ end daertoe oock zijn eyghen ziel, die kann mijn leęriongher niet zijn.

* Deut.13.b.6 end .33.b.9 Matt.10.d.37

+ F

27

^* End zo wie zijn cruys niet draeght, end volght my na, die kann mijn leęriongher niet zijn.

* Matt.10.d.38 end .16.d 24 Marc.8.d.34 Luc.9.c.23

28

Want wie is’er onder v, die eęnen tornn bauwen will, die niet te voren zitt

[p. 132r]

end ouerslaet de kosten, of hy hebbe dat dar noodigh is ter volmakinghe:

29

Op dat, na dem hy den grond ghelegt heeft, end kan’s niet vollendighen, alle die het anschauwen, hem niet beghinnen te bespotten,

30

End te zegghen: Deze mensch heeft begonnen te bauwen, end heeft het niet konnen vollendighen.

31

⁺Of wat kœningk is’er, die dar reyßt krijgh te voeren teghen eęnen anderen kœningk, die niet te voren zitt, end raadslaght of hy kan mit tien duyzend beieghenen dem, die teghen hem kommt mit twintigh duyzend?

+ G

32

Anders de wijle de zelue noch verr is, zo zend hy ambassaten wt, end begært dat ten vrede dient.

33

Alzo oock eęn ieghelick onder v, die niet entzegt allem wat hy heeft, die kann mijn leęriongher niet zijn.

34

^* Het zalt is eęn goed dingk: zo auer het zalt domm werdet, waer mede zal men’t smakelick maken?

* Matt.5.b.13 Marc.9.g.50

35

Het is niet op het land noch in den messing nutt: men wærpt het buyten hénwegh. Wie ooren heeft te hooren, die hoore.