Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiij.

1

DAr waren auer zommighe ter zeluer tijd teghenwordigh, die hem boodschapten van den Galiléeren, welcker bloed Pilatus mit hœren offeren ghemengt had.

2

End Iesus andwordde end zeyde tot hen: Meynet ghy dat deze Galiléers voor alle Galiléers zondaers gheweeßt zijn, om dat zy zulcks gheleden hebben?

3

Ick zeg v, neęn: mer ten zy dat ghy ghemoedbetering doet, ghy zullet alle deßghelijcken vergaen.

4

Of meynet ghy dat die achtiene op welcke de toorn in Siloa viel, end doodde ze, schuldenaers gheweeßt zijn voor alle menschen die te Hierusalem woonden?

5

⁺Ick zeg v, neęn: mer ten zy dat ghy ghemoedbetering doet, ghy zullet alle deßghelijcken vergaen.

+ B

6

Hy zeyde oock deze verghelijcking: Eęner had eęnen vijghboom in zynem wijngaerd gheplantt, end quam vrucht daerop te zoucken, end vand gheęne.

7

End zeyde tot dem wijngardenier: Zie, ick komme dry iaren lang, end zouck vrucht op dezem vijghboom, end vinde’r gheęne: hauw hem af, waertoe be-

[p. 129r]

slaet hy oock onnuttlick de ærde?

8

Hy auer andwordde end zeyde tot hem: Heęr, laet doch hem noch dit iaar, tot dat ick hem ommgraue end bemeste, of hy misschien vrucht brochte: Zo auer anders, zo zalt du hem namaels afhauwen.

9

Hy leęrde auer in eęner Synagoghe op den Sabbathdaghen: ⁺ end zie, eęn vrauw die dar had eęnen gheęst der kranckheyt achtien iaren, end was kromm, end konde zick ganschlick niet oprichten.

+ C

10

Doe ze auer Iesus zagh, riep hy ze tot zick, end zeyde tot hœr: Urauw, du bist entslaghen van dyner kranckheyt.

11

End leyde de handen op ze: end van stonden an ward zy recht, end preęß God.

12

Auer de Ouersynagooghmeęster onwærdelick nemende, dat Iesus op den Sabbath gheheylt had, andwordde end zeyde tot der scharen: ^* Dar zijn zeß daghen in welcken men arbeyden moet: in den zeluen dan kommet dat ghy gheheylt werdet, end niet op den Sabbatdagh.

* Exo.20.b.10 Deut.5.b.13 Ezec.20.b.12

13

Zo andwordde hem de Heęr, end zeyde: Du huychelaer, ^* onbindt niet eęn ieghelick onder v op den Sabbath zynen oß of ezel van der kribben, ⁺ end leydt hem hén te wateren?

* Deut.22.a.10 Luc.14.a.5

+ D

14

Deze auer die dar is eęn dochter Abrahe, welcke Satan, zie, achtien iaren ghebonden had, moest zy niet van dezem bande ontbonden werden op den Sabbat?

15

End als hy zulcks zeyde, wurden beschaemt alle die hem enteghen waren: end alle het volck verblijdde zick ouer al-

[p. 129v]

len den heęrlicken daden die van hem gheschiedden.

16

^* Hy auer zeyde: Wem is het kœningkrijck Godes ghelijck, end wem zal ick t’zelue verghelijcken?

* Matt.13.d.31 Marc.4.d.29

17

Het is eęnem mostardkoren ghelijck, welck eęn mensch nam, end warp het in zynen hof, end het wieß op, end ward eęn groot boom, end de voghels des hemels nestelden onder zynen tacken.

18

^+* End wederom zeyde hy: Wem zal ick het kœningkrijck Godes verghelijcken?

+ E

* Matt.13.e.33

19

Het is eęnem heuel ghelijck, welcken eęn vrauw nam, end verbargh hem onder dry saatmaten meels, tot dat het all doorheuelt ward.

20

^* End hy ghingk door steden end vlecken, end leęrde: end nam zynen wegh na Hierusalem.

* Matt.9.d 35 Marc.6.a.6

21

Dar zeyde auer eęn tot hem: Heęr, zijn’er oock weynigh die zaligh werden? Hy auer zeyde tot hen:

22

^* Kampet dat ghy door de enghe poorte ingaet: want vele, zeg ick v, zullen zoucken hénin te gaen, end zullen niet konnen.

* Matt.7.c.13 4.Esd.7.a.7

23

Wanneęr auer de huyßheęr opghestaen zal zijn, end de dœre toeghesloten zal hebben, end ghy zullet beghinnen buyten te staen, end an de dœre te kloppen, end te zegghen: ^* Heęr Heęr, openn ons: end hy zal andworden end tot v zegghen: Ick weet niet van waer ghy zijt:

* Matt.25.a.11 Luc.6.g.46

24

Alsdan zullet ghy beghinnen te zegghen: Wy hebben voor dy gheéten end ghedroncken: ⁺ end du hebst op onzen straten gheleęrt.

+ F

25

^* End hy zal zegghen: Ick zeg v, ick weet

* Matt.7.c.23 end .25.d.42 Psal.6.b.9

[p. 130r]

niet waer ghy hær zijt: wijcket alle van my die dar ongherechtigheyt wercket.

26

^‡ Daer zal zijn gheweęn end tanden knærsseling: wanneęr ghy zien zullet Abraham end Isaac end Iacob, end alle de Propheten in dem kœningkrijcke Godes: v auer hénwt gheworpen werden.

‡ Matt.8.b.12 end .13.f.42 end 22.b.13 end 24.d.51. end 25.c.30

27

^* Oock zullen’der kommen vam Oosten end Westen, end van Noorden end Zuyden, end zullen in dem kœningkrijcke Godes ⁺ anzitten.

* Matt.8.b.11 Esa.41.f.25

+ Gr. anleenen

28

^‡ End zie, het zijn de lesten, die de eęrsten zijn zullen: end het zijn de eęrsten, die de lesten zijn zullen.

‡ Matt.19.d.30. end .20.b.16 Marc.10.e.31

29

Ten zeluen daghe ghinghen zommighe Phariséers toe, end zeyden tot hem: Ga hénwt, end maeck dy van hier, want Herodes zouckt dy te dooden.

30

End hy zeyde tot hen: Gaet hén, end zegghet dem zeluen vosse: Zie ick wærpe duuels wt, ⁺ end volbringe ghezondmakinghen huyden end morghen, end ten derden daghe neem ick eęn ende.

+ G

31

Nochtans moet ick huyden end morghen end ouermorghen wandelen: want het kann niet gheschiehen dat eęn Propheet ommghebracht werde buyten Hierusalem.

32

^* Hierusalem Hierusalem, die du doodest de Propheten, end steęnighest die tot dy wtghezonden zijn: ^‡ hoe menighmael heb ick dyne kinders willen vergaderen, ghelijckerwijß eęn hinne hœren nest onder hœre vlœghels, end ghy hebbet niet ghewolt?

* Matt.23.d 36

‡ 4.Esd.1.c.28

33

Zie, ^* uwe huyß werdt v woest ghelaten: auer amen ick zeg v, ghy zullet my niet zien, tot dat [de tijd] komme dat gy zeg-

* Psal.69.f.26 Esa.1.b.7 Iere.7.g.34 Mich.3.d.12 Act.1.d.20

[p. 130v]

ghet ^* Gheprezen zy, die dar kommt in dem name des Heęren.

* Psal.118.d.26