Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

DAerna auer verordende oock de Heęr zeuentigh andere, end zand ze tweę end tweę wt voor zijn anghezicht in alle stad end plaetß, daer hy kommen zolde.

2

Zo zeyde hy tot hen: ^* De ooghst is wel groot: de arbeyders auer, weynigh. ^‡ Daerom biddet den heęr des oogsts, dat hy arbeyders ⁺ wtstoote in zynen ooghst.

* Matt.9.d.37 Ioan.4.e.35

‡ 2.Thes.3.a.1

+ Of. wtzende.

3

^* Gaet hén, zie, ick zende v als lammers midden onder de woluen.

* Matt.10.a.16

4

^‡ Draghet gheęnen buydel, noch maal noch schoens: end ^* groetet niemand op dem wegh.

‡ Matt.10.a.9 Marc.6.b.8 Luc.9.a.3. end .22.d.35

* 2.Re.4.e.29

5

^‡ Auer zo waer ghy in eęnigh huyß ingaet, zegghet eęrst: Urede zy dezem huyze.

‡ Mat.10.b.12 Marc.6.b.10

6

End zo aldaer eęn zoon des vredes zy, zo zal uwe vrede op hem rusten: is deß auer niet, zo zal hy tot v wederkeęren.

7

^+* In dem zeluen huyze auer blijuet etet end drincket wat van hen [voorghelegt] werdt: ^‡ want eęn arbeyder is zijns loons wærd. Gaet niet van huyze tot huyze.

+ B

* Eccl.29.d.28 1.Cor.10.f.27

‡ Leu.19.c.13 Deu.24.c.14 end .25.a.4 Tob.4.c.15 1.Cor.9.a.4 1.Tim.5.c.18

8

End in wat stad ghy ingaet, end zy v annemen, daer etet wat v werdt voorghelegt:

9

End heylet de krancken die daerin zijn, end zegghet hen: Het kœningkrijck Godes is tot v naby kommen.

10

^* In wat stad auer ghy ingaet,

* Matt.10.b.14 Marc.6.b.11 Luc.9.a.5

[p. 120v]

end zy v niet annemen, daer gaet hærwt op hœre straten, end zegghet:

11

^* Oock het stoff dat ons anhangt van uwer stad, schudden wy af op v: wetet nochtans dit, dat het kœningkrijck Godes v naby kommen is.

* Act.13.g.51 end .18.b.6.

12

Auer ick zeg v dat het den Sodomiteren verdraghlicker zijn zal in dien daghe, dan dier stad.

13

^* Weę dy Chorazin, weę dy Betsaida. Want waren de krachtighe daden in Tyro end Sidon ghedaen, ⁺ die in v ghedaen zijn, zy hadden voortijden in zack end assche ghezeten end ghemoedbetering ghedaen.

* Matt.11.c.21

+ C

14

Doch zal het Tyro end Sidon verdraghlicker zijn in dem gherichte, dan v.

15

End du Capernaum, die du tot den hemel verhooght bist, du zalt tot in de hell hénaf ghestooten werden.

16

^* Wie v hoort, die hoort my: end wie v veracht, die veracht my: ^‡ wie auer my veracht, die veracht den, die my wtghezonden heeft.

* Mat.10.d.40 Marc.9.f.37 Ioan.13.c.20

‡ 1.thes.4.b.8

17

De zeuentigh auer keęrden weder mit vrœghden, end zeyden: Heęr, oock werden ons de duuels onderworpen in dynem name.

18

Hy auer zeyde tot hen: ^* Ick zagh den Satan van dem hemel vallen als eęnen blixem.

* Apoc.12.b.9

19

Zie, ^* ick gheue v macht te treden op slanghen end schorpioenen, end ouer alle gheweld des viands: ⁺ end gheęn dingk zal v eęnighßins beschadighen.

* Marc.16.d.18 Act.28.b.5

+ D

[p. 121r]

20

Nochtans hierin verurœghet v niet dat v de gheęsten onderworpen werden: verurœghet v auer meęr, dat uwe namen in den hemelen gheschreuen zijn.

21

^* Ter zeluer vren verhœghde zick Iesus in dem gheęst, end zeyde: Ick belijde dy Uader, Heęr des hemels end der ærden, dat du deze dinghen verborghen hebst ^* den wijzen end den verstandighen: ^‡ end hebst ze ontdeckt den kindischen. Ia Uader: want alzo was het welgheualligh voor dy.

* Matt.11.d.25

* Iob.5.b.12 Esa.29.c.14 1.Cor.1.c.19 end .2.b.7 2.Cor.3.d.14

‡ 2.Cor.3.d.16

22

End hy wand zick tot den leęriongheren omm, end zeyde: ^* Alle dingk is my ouerghegheuen van mynem Uader: end niemand weet wie de Zoon zy, dan de Uader, end wie de Uader zy, dan de Zoon, end wem het de Zoon will ontdecken.

* Psal.8.b.7 Ioan.3.d.35 end .17.a.2 1.Cor.15.d.27 Philip.2.b.10 Hebr.2.b.8

23

End [andermael] tot den leęriongheren ghewendt, zeyde hy in zonderheyt: ^* Gheluckzaligh zijn de ooghen die dar zien dat ghy ziet.

* Matt.13.b.16

24

⁺Want ick zeg v, ^* dat vele Propheten end kœninghen hebben willen zien dat ghy ziet, end hebben’t niet ghezien: end hooren dat ghy hooret, end hebben’t niet ghehoort.

+ E

* 1.Pet.1.b.10

25

^* End zie, dar stond eęn Wetgheleęrde op, verzocht hem end zeyde: Leęrmeęster, wat zal ick doen dat ick het eęwigh leuen beærue?

* Matt.22.d.35 Marc.12.c.28

26

Iesus auer zeyde tot hem: Wat is in der Wet gheschreuen? hoe leeßt du?

27

Hy auer andwordde end zeyde: ^* Du zalt den Heęr dynen God lief hebben wt dynem ganschen herte, end wt dyner

* Deut.6.a.5 end .10.c.12 end .30.b.6

[p. 121v]

ganscher zielen, end wt dyner ganscher kracht, end wt dynem ganschen ghemoede: ^* end dynen naesten, als dy zeluen.

* Leui.19.d.18 Rom.13.c.9 Gala.5.c.14 Iacob.2.b.8

28

End hy zeyde tot hem: Du hebst recht gheandwordt: doe dit, end du zalt leuen.

29

Hy auer wolde zick zeluen rechtuærdighen, end zeyde tot Iesu: End wie is mijn naeste?

30

⁺Iesus auer andwordde daerop, end zeyde: Eęn mensch quam van Hierusalem hénaf na Hiericho, end viel onder de moorders, welcke hem oock de kleęders wttoghen, end wondden hem, end ghinghen hén, end lieten hem half dood ligghen.

+ F

31

Eęn Priester auer quam by gheualle den zeluen wegh hénaf, end doe hy hem zagh, ghingk hy voorby.

32

Deßghelijcken oock eęn Leuijt doe hy quam an de plaetß, end quam end zagh hem, ghingk hy voorby.

33

Eęn Samariter auer reyßde, end quam neuen hem: end doe hy hem zagh, erbarmde hy zyner hertgrondlick:

34

End ghingk toe, verband hem zyne wonden, end goot daerin oly end wijn: end leyde hem op zijn eyghen beęst, end voerde hem in de herberghe, end drough zyner zorgh.

35

End des anderen daghs, reyßde hy wegh, end toogh tweę penninghen hærwt, end gaf ze dem wærd, end zeyde tot hem: Heb zyner zorgh, end zo wat du daer enbouen zalt bekostigen, zal ick dy betalen wanneęr ick wederkomme.

[p. 122r]

36

Welcker doch onder dezen dryen dunckt dy de naeste gheweeßt te zijn dem, die onder de moorders gheuallen was?

37

⁺Hy auer zeyde: Die dar barmhertigheyt an hem dede. Zo zeyde Iesus tot hem: Ga hén, doe oock du deßghelijcken.

+ G

38

Het gheschiedde auer doe zy reyßden, dat hy in eęn vlecke inghingk: end eęn vrauw mit name Martha, nam hem op in hœr huyß.

39

End deze had eęn zuster die hiet Maria, welcke oock zat by den voeten Iesu, end hoorde zijn rede an.

40

Auer Martha was mit veel dienens ⁺ zeęr bezigh. End zy ⁺ trad héntoe, end zeyde: Heęr, gaet het dy niet an, dat my mijn zuster laet alleęne dienen? Zeg hœr dan dat zy my behulpigh zy.

+ Gr. verruckt

+ Gr. stond an

41

End Iesus andwordde end zeyde tot hœr: Martha, du bist zorghfuldigh, end bekommerst dy mit velen dinghen: auer eęns dings is noodwendigheyt.

42

Maria auer heeft ^* het goede deęl wtuerkoren, welck hœr niet afghenomen zal werden.

* Psal.27.b.4