Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vij.

1

⁺ NA dem hy auer alle zyne worden in des volcks ooren vollendt had, ghingk hy hén tot Capernaum.

+ Matt.8.a.5

2

Auer eęns Honderdhoofdmanns dienstknecht lagh doodkranck, die hem wærd was.

3

Doe hy auer van Iesu hoorde, schickte hy de Olderlinghen der Iœden tot hem, end bad hem dat hy quame end zynen

[p. 110v]

dienstknecht ghezond maeckte.

4

Doe zy auer tot Iesu quamen, baden zy hem nærstlick, end zeyden: Hy is wærd dat du hem dit doest,

5

Want hy heeft onze volck lief, end heeft ons de Synagoogh ghebauwt.

6

Iesus auer ghingk mit hen hén. Doe hy auer nu niet verr van dem huyze was, zand de Honderdhoofdmann vrienden tot hem wt, end zeyde tot hem: Heęr, vermoey dy niet: want ick bin niet bequaem dat du onder mijn dack inkommest.

7

Daerom ick oock my zeluen niet wærdigh gheacht heb dat ick tot dy quame: mer spreeck eęn word, end mijn knecht zal ghezond werden.

8

⁺Want oock ick bin eęn mensch, onder [eęns anders] macht ghestelt, end heb krijgsknechten onder my zeluen: end zeg tot dezem: Ga hén, end hy gaet hén: end tot dem anderen: Kom hær, end hy kommt hær: end tot mynem dienstknecht, Doe dit: end hy doet het.

+ B

9

Doe auer Iesus dit hoorde, verwonderde hy zick zyner, end omghewendt, zeyde hy tot der scharen die hem nauolghde: Ick zeg v dat ick zo grooten ghelooue ia in Israel niet vonden heb.

10

End die dar ghezonden waren, keęrden wederom na huyß, end vonden den dienstknecht die dar kranck gheweęßt had, ghezond.

11

End het ghesciedde daerna dat hy hén ghingk in eęn stad ghenaemt Nain, end zyner leęriongheren vele end eęn groote schare ghinghen mit hem.

[p. 111r]

12

Als hy auer na an de poorten der stad quam, zie, dar ward eęn doode hærwt ghedraghen, die eęn eęnighgheboren zoon zyner moeder was: end de zelue was weduwe: end eęn groote schare der stad was mit hœr.

13

End doe ze de Heęr zagh, erbarmde hy zick hertgrondlick ouer ze, end zeyde tot hœr: Weęn niet.

14

End hy quam by, end roerde de baar an. De draghers auer stonden still, end hy zeyde: Ionghelingk, ick zeg dy, ^* sta op.

* Act.9.g.40

15

⁺End de ghestoruen richtde zick op, end began te spreken: end hy gaf hem zyner moeder.

+ C

16

Dar quam auer ze alle eęn vreęze an, end prezen God, end zeyden: ^* Eęn groot Propheet is onder ons opghestaen, ^‡ end God heeft zijn volck bezocht.

* Luc.24.c.18 Ioan.4.c.19 end .6.b.14 end .9.c.17.

‡ Luc.1.f.63

17

End dit gheruchte van hem ghingk ouer het gansche Iœdsche land, end ouer alle het omligghende landbegrijp.

18

^* End van dezem allem boodschapten Ioanni zyne leęrionghers.

* Matt.11.a.2

19

End Ioannes riep tweę wt zynen leęriongheren tot zick, end zand ze tot Iesu, end zeyde: Bist du die dar kommen zolde, of verwachten wy eęnen anderen?

20

Doe auer de mannen tot hem quamen, zeyden zy: Ioannes de Dooper heeft ons tot dy wtghezonden, zegghende: Bist du die dar kommen zolde, of verwachten wy eęnen anderen?

21

Ter zeluer vren auer heylde’r hy vele van zieckten, end plaghen, end boozen

[p. 111v]

gheęsten: end velen blinden schanck hy het ghezicht.

22

End Iesus andwordde end zeyde tot hen: Gaet hén, end boodschappet Ioanni wat ghy ghezien end ghehoort hebbet. [Naemlick] ^* dat de blinden zien, de krœpelen wandelen, ⁺ de melaetschen ghereynight werden, de doouen hooren, de dooden opstaen, de armen gheeuangelizeert werden.

* Esa.29.f.18 end .35.b.5 end .61.a.1

+ D

23

End gheluckzaligh is die an my niet gheærgert werdt.

24

^* Doe auer de boden Ioannis wegh ghegaen waren, begann hy tot den scharen te zegghen van Ioanne: Wat zijt ghy hénwt ghegaen in de woestijn te schauwen? eęnen riethalm van winde beweeght?

* Matt.11.a.7

25

Mer wat zijt ghy hénwt ghegaen te zien? eęnen mensch bekleędt mit zachten kleęderen? Zie, die in prachtigher kleędinghe end in weelden zijn, die zijn in der kœninghen houen.

26

Mer wat zijt ghy hénwt ghegaen te zien? eęnen Propheet? Ia ick zeg v, oock meęrder dan eęn Propheet.

27

Deze is het van welckem gheschreuen is: ^* Zie, ick zende mynen Enghel wt voor dynem anghezichte, die dar bereyden zal dynen wegh voor dy.

* Mala.3.a.1 Marc.1.a.1

28

Want ick zeg v, onder den die van vrauwen gheboren zijn, is’er gheęn grooter Propheet dan Ioannes de Dooper: nochtans die kleyner is in dem kœningkrijcke Godes, die is grooter dan hy.

[p. 112r]

29

⁺End all het volck dat dar toehoorde, end de tollenaers die dar ghedoopt waren, mit dem Doope Ioannis, rechtuærdighden God.

+ E

30

De Phariséers auer end de Wetgheleęrden die van hem niet ghedoopt waren, verachtden den raad Godes teghen zick zeluen.

31

^* Auer de Heęr zeyde: Wem zal ick dan de menschen dezes gheslæchtes verghelijcken? end wem zijn zy ghelijck?

* Matt.11.b.16

32

Zy zijn ghelijck den kinderkens die op dem marckt zitten, end malckanderen toeroupen, end zegghen: Wy hebben v ghepepen, end ghy hebbet niet ghedanst: wy hebben v klaeghlieden ghezonghen, end ghy hebbet niet gheweęnt.

33

^* Want Ioannes de Dooper is kommen, end at gheęn brood, end dranck gheęnen wijn, end ghy zegghet: Hy heeft eęnen duuel.

* Matt.3.a.4 Marc.1.a.6

34

Des menschen Zoon is kommen, eett end drinckt, end ghy zegghet: Zie, eęn vratigh mensch end wijnzuyper, eęn vriend der tollenaren end zondaren.

35

End de wijßheyt is gherechtuærdight van allen hœren kinderen.

36

^+* Hem bad auer der Phariséeren eęn dat hy mit hem ate. End hy ghingk in des Phariséers huyß, end ⁺ zat an.

+ F

* Matt.26.a.6 Marc.14.a.3 Ioan.11.a.2 end .12.a.3

+ Gr. leende

37

End zie, eęn vrauw in der stad, welcke eęn zondersse was, doe zy vernam dat hy ⁺ anzat in des Phariséers huyze, bracht zy eęn ⁺ albasterene buß mit zaluen,

+ Gr. anlagh

+ of, onhandhauighe

[p. 112v]

38

End stond van achter an zynen voeten end weęnde, end begann zyne voeten mit tranen te netten, end drooghde ze mit den haren hœrs hoofds, end kuste zyne voeten, end zalfde ze mit zaluen.

39

Doe auer dat de Phariséer zagh die hem ghenoodt hadd, sprack hy by zick zeluen, end zeyde: ^* Wenn deze eęn Propheet ware, hy zolde ghewißlick weten wie end welckerley eęn vrauw het zy die hem anroert: want zy is eęn zondersse.

* Lu.15.a.2

40

End Iesus andwordde, end zeyde tot hem: Simon, ick heb dy wat te zegghen. Hy auer zeyde: Leęrmeęster zeg ⁺ an.

+ anders. an. Hy auer zeyde:

41

Eęn wtborgher had tweę schuldenaers, de eęn was schuldigh vijf honderd penninghen, end de ander vijftigh:

42

Doe zy auer niet machtigh waren te betalen, schanck hy hen beyden quijt. Zeg dan, welcker van beyden zal hem meęst lief hebben?

43

⁺Simon auer andwordde end zeyde: Ick meyne welckem hy meęst quijtgheschoncken heeft. Hy auer zeyde tot hem: Du hebst recht gheordeęlt.

+ G

44

End hy wand zick om tot der vrauwen, end zeyde tot Simon: Ziest du deze vrauw? Ick bin kommen in dijn huyß, du hebst my gheęn water ghegheuen tot mynen voeten: deze auer heeft myne voeten mit tranen ghenett, end mit den haren hœrs hoofds ghedrooght.

45

Du hebst my gheęnen kuß ghegheuen: deze auer na dem ⁺ ick hærin kommen

+ anders. zy hærin kommen is,

[p. 113r]

bin, heeft niet afghelaten myne voeten te kussen.

46

Du hebst mijn hoofd niet mit oly ghezalft: deze auer heeft myne voeten mit zaluen ghezalft.

47

Derhaluen zeg ick dy, vele zonden werden hœr quijtghelaten, want zy heeft veel lief ghehadt. Welckem auer weynigh quijt ghelaten werdt, die heeft weynigh lief.

48

Hy auer zeyde tot hœr: Dyne zonden werden quijt ghelaten.

49

End die dar t’zamen ⁺ anzaten, begonnen te zegghen by zick zeluen: Wie is deze die oock de zonden quijtlaett?

+ Gr. anlagen.

50

Hy zeyde auer tot der vrauwen: Dijn ghelooue heeft dy beholden, ga hén mit vreden.