Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xv.

1

⁺ ENd van stonden an in den morghen hielden de Ouerpriesters eęnen raad, mit den Olderlinghen end den Schriftgheleęrden, daertoe de gansche Raad, end leydden Iesum ghebonden hén, ^* end leuerden hem Pilato.

+ Matt.27.a.1 Luc.22.g.66 end .23.a.5 Ioan.18.e.28 Psal.2.a.2

* Act.3.c.13

2

End Pilatus vraeghde hem: Bist du de kœningk der Iœden? Hy auer andwordde end zeyde tot hem: Du zegst het.

3

End de Ouerpriesters verklaeghden hem in velen dinghen.

4

^* Pilatus auer vraeghde hem andermael, end zeyde: Andwordest du niets? zie, hoe veel zy teghen dy tuyghen.

* Matt.27.b.11 Luc.23.a.3 Ioan.18.f.33

5

Iesus auer andwordde voordan niets, alzo dat zick Pilatus verwonderde.

6

Op het feęst auer liet hy hen eęnen gheuanghenen loß, den zy begærden.

7

^* Dar was auer eęn, ghenaemt Barabbas, welcker gheuanghen was mit den oproermakeren die im oproer eęn moord ghedaen hadden.

* Matt.27.b.16 Luc.23.c.19 Ioa.18.g.40

8

End de schare riep wt, end begann te begæren [dat hy hen dede] ghelijckerwijß hy altijd ghedaen had.

9

Pilatus auer andwordde hen, end zeyde: Willet ghy dat ick v den kœningk der Iœden entsla?

10

Want hy wist wel dat hem de Ouerpriesters door nijd ouergheleuert had-

[p. 91v]

den.

11

^* Auer de Ouerpriesters verweckten de schare [te begæren] dat hy hen lieuer Barabbam entsloughe.

* Mat.27.b.20 Luc.23.c.18 Ioan.18.g.20 Act.3.c.14

12

Pilatus auer andwordde wederom end zeyde tot hen: Wat willet ghy dan dat ick hem doe, den ghy zegghet, hy zy kœningk der Iœden?

13

Zy auer kreeschen wederom wt, Cruycigh hem.

14

⁺Pilatus auer zeyde tot hen: Wat heeft hy doch quaads ghedaen? Zy auer kreeschen wederom deß te meęr, Cruycigh hem.

+ B

15

Pilatus auer willende der scharen ghenough doen, entslough hen Barabbam, end doe hy Iesum ghegheęsselt had, leuerde hy hem dat hy ghecruycigt wurde.

16

^* De krijgsknechten auer leydden hem hénin in het hof, welck is het richthuys, end roupen te hoop het gansche rott.

* Matt.27.c.27 Ioan.19.a.1

17

End toghen hem eęn purpuren kleęd an: end vlochten eęn doornen kroone, end zetten ze hem op,

18

End begonnen hem te groeten: Zy ghegroett, Kœningk der Iœden,

19

End sloughen hem het hoofd mit eęnem riethalm, end bespoghen hem, end vielen op de knyen, end neyghden hem toe.

20

End na dem zy hem bespott hadden, toghen zy hem het purpur wt, end kleędden hem mit zynen eyghenen kleęderen end leydden hem wt, dat zy hem cruycighden.

21

^* End zy dwonghen eęnen zekeren voorbygangher Symon van Cyrenen

* Matt.27.d.32 Luc.23.d.25

[p. 92r]

die dar vam velde quam, den vader Alexandri end Ruphi, dat hy hem het cruys droughe.

22

^* End leydden hem an de plaetß Golgotha, welck beduydt werdt, der hoofdscheelen plaetß.

* Mat.27.d.33 Luc.23.e.32 Ioan.19.c.18

23

End zy gauen hem wijn mit myrrhe ghemengt te drincken, end hy nam’s niet.

24

^* End doe zy hem ghecruycigt hadden, ^‡ bedeęlden zy zyne kleęders, end worpen het lot daerouer, [om te weten] wat eęn ieghelick wegh nemen zolde.

* mat 27.d 34 Ioan.19.d.23

‡ Psal.22.d.19

25

Het was auer de derde vre, end zy cruycighden hem.

26

^+* End het opschrift zyner beschulding was opgheschreuen, DE KONINGK DER IODEN.

+ C

* Mat.27.d.36 Luc.23.e.37 Ioan.19.d.19

27

End zy cruycighen mit hem tweę moorders, den eęnen t’zyner rechter, end den anderen t’zyner lincker hand.

28

End de Schrift is veruult die dar zegt: ^* End hy is mit den Wetbrekeren gherekent.

* Esa.53.d 12

29

^* End die dar voorby ghinghen, lasterden hem, end schudtden hœre hoofden, end zeyden: Pfy dy ^‡ die du den tempel afbrekest, end in dryen daghen opbauwest.

* Matt.27.e.38 Luc.23.e.34 Psal.22.b.8 end .69.e.21. end 109.d.25

‡ Ioan.2.c.19

30

Behold dy zeluen, end dael hæraf van dem cruyce.

31

Deßghelijcken auer oock spottden de Ouerpriesters zampt den Schriftgheleęrden, end zeyden tot malckanderen: Hy heeft anderen beholden, hy kan hem zeluen niet beholden.

32

Christus de kœningk Israels, dale

[p. 92v]

nu af van dem cruyce, dat wy het zien end gheloouen. End die mit hem ghecruycight waren, besmadighden hem.

33

^* Doe het auer de zeste vre gheworden was, ward dar eęn duysterniß ouer de gansche ærde tot op de neghende vre.

* mat.27.e.44 Luc.23.f 43

34

End ter neghender vren riep Iesus mit luyder stemmen, end zeyde: ^* Eloi, Eloi, lamma sabachthanj? d’welck beduydt werdt, Mijn God, mijn God, waerom hebst du my verlaten?

* Psal.22.a.1

35

End zommighe die dar bystonden, doe zy dit hoorden, zeyden zy: Zie, hy roupt Heliam.

36

^* Dar liep auer eęn toe, end vulde eęn sponsy mit edick, end stellde ze op eęnen riethalm, end gaf hem te drincken, end zeyde: Holdet still, latet ons zien of Helias komme hem af te nemen.

* Ioan.19.c.29 Psal.69.e.22

37

Iesus auer liet een luyde stemm wt, end gaf den gheęst op.

38

^+* End ^‡ de voorhangk des tempels schœrde in tweęen, van bouen an tot beneden wt.

+ D

* Mat.27.f.50 Luc.23.f.44

‡ 2.Pa.3.d.14

39

^* Doe auer de Honderdhoofdmann die teghen hem ouer stond, zagh dat hy mit alzulcken gheschrey den gheęst opghegheuen had, zeyde hy: Waerlick deze mensch was Godes Zoon.

* Matt.27.f.53 Luc.23.f.46

40

^* Dar waren auer oock vrauwen ^‡ die van verr anschauwden, onder welcken was oock Maria magdalene, end Maria des kleynen Iacobs end Ioses moeder, end Salome:

* Matt.27.f.54 Luc.23.g.48

‡ Psal.38.c.12

41

Welcke oock doe hy in Galiléa was, hem nagheuolght waren, ^* end hem

* Luc.8.a.2

[p. 93r]

ghedient hadden: end vele andere die mit hem t’zamen hénop na Hierusalem kommen waren.

42

^* End doe het nu auend gheworden was, (dewijl het de dagh der voorbereyding was, die dar is de Uoorsabbath,) quam Ioseph [hærkomstigh] van Arimathéa, eęn eęrbaer raadsheęr, welcker oock zelue wachtde op het kœningkrijck Godes,

* Matt.27.f.56 Luc.23.g.49 Ioan.19.g.38

43

End ghingk mit koenheyt hénin tot Pilato, end begærde het lichaem Iesu.

44

Pilatus auer verwonderde zick, of hy nu dood ware: end riep tot zick den Honderdhoofdmann, end vraeghde hem of hy nu lang dood gheweeßt ware.

45

End als hy het bekende van dem Honderdhoofdmann, schanck hy dem Ioseph het lichaem.

46

End hy kocht eęn fijn lijnwaed, end nam hem af, end wand hem in het fijn lijnwaed, ^* end leyde hem in eęnen grafsteęn die in eęn steęnrootß wtghehauwen was: end wentelde eęnen steęn an des grafsteęns dœre.

* Mat.12.d.40 end .26.a.11 end .27.g.59 Luc.23.g.52

47

Auer Maria Magdalene, end Maria [de moeder] Iose schauwden toe waer hy ghelegt zolde werden.