Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xi.

1

⁺ ENd als zy na by Hierusalem ghenaken omtrent Bethphage end Bethanien an den Olijuenbergh, schickt hy wt zyner leęriongheren tweę,

+ Matt.21.a.1. Luc.19.d.29

2

End zegt tot hen: Gaet hen in de vlecke die teghen v ouerligt: end ter stond wanneęr ghy hénin kommet, zullet ghy vinden eęn anghebonden vœlen, op welckem gheęn mensch ghezeten heeft: onbindet’t, end bringhet’t hær.

3

End zo v iemand zegghet: Waerom doet ghy dit? Zo zegghet: De Heęr behouft zyner: end hy zal’t van stonden an hær zenden.

4

Zy ghinghen auer hén, end vonden het vœlen ghebonden by der dœren buyten op dem tweęwegh, end ontbinden’t.

5

End zommighe die daer stonden, zeyden tot hen: Wat maket ghy dat ghy het vœlen ontbindet?

[p. 81v]

6

Zy auer zeyden tot hen euen als hen Iesus gheboden had: end zy lieten ze gaen.

7

^* End zy brachten het vœlen tot Iesu, end worpen hœre kleęders daerop, end hy zat daerop.

* Ioan.12.b.14 2.Reg.9.c.13

8

Uele auer spreydden hœre mantels op den wegh: end andere hieuwen meyen af van den boomen, end stroeyden ze op den wegh.

9

⁺End die voorhær ghinghen, end die nauolghden, kreeschen, end zeyden: Hosanna, ^* gheprezen zy die dar kommt in dem name des Heęren:

+ B

* Psal.118.d.26

10

Gheprezen zy het kœningkrijck onzes vaders Dauids, dat dar kommt in dem name des Heęren, Hosanna in den allerhooghsten [plaetsen].

11

^* End Iesus ghingk hénin tot Hierusalem, end in den tempel: end doe hy alles ouerzien had, end het nu auend gheworden was, ghingk hy hénwt na Bethanien mit den twæluen.

* Matt.21.a.12 Luc.19.g.45 Ioan.2.c.14

12

^* End des anderen daghs doe zy wt Bethanien ghinghen, hongherde hem.

* Matt.21.b.18

13

End doe hy zagh van verr eęnen vijgheboom die bladers hadde, quam hy [te zien] of hy oock iet daerop vonde: end ghekommen tot dem zeluen, vand daer niet op dan bladers. Want het was niet der vijghen ghetijdigheyt.

14

End Iesus andwordde end zeyde tot hem: Nu ete van dy voordan niemand meęr vrucht in eęwigheyt. End zyne leęrionghers hoorden’t.

15

End zy kommen tot Hierusalem. ^* End Iesus inghegaen in den tempel,

* Matt.21.a.12 Luc.19.g.45 Ioan.2.c.14

[p. 82r]

begann wt te wærpen die dar verkochten end kochten in dem tempel, end de tafels der wisselaren end de stoelen der duyuenkræmeren stiet hy omm.

16

End liet niet toe dat iemand eęnigh vat door den tempel droughe.

17

End leęrde, end zeyde tot hen: Is’er niet gheschreuen: ^* Mijn huyß zal heeten eęn bedehuyß allen volcken? ^{+ ‡} Ghy auer hebbet eęn moorderkuyle daerwt ghemaeckt.

* 1.Reg.8.c.29 Esa.56.c.7

+ C

‡ Iere.7.b.11

18

End de Schriftgheleęrden end de Ouerpriesters hoorden dit, end ^* zochten hoe zy hem ommbrochten: Want zy vreęßden zick voor hem, om dat de gansche schare zick verwonderde ouer zyner leęre.

* Ioan.7.c.19

19

End doe het auend gheworden was ghingk [Iesus] ter stad hénwt.

20

End des morghens voorby gaende, zaghen zy dat de vijgheboom verdorret was van der wortel an.

21

End Petrus deß indachtigh, zegt tot hem: Rabbi, zie, de vijgheboom den du verulouckt hebst, is verdorret.

22

End Iesus andwordde end zeyde tot hen: Hebbet ghelooue an God.

23

^* Want amen ick zeg v, zo wie tot dezem berghe zegget: Werd opgheheuen end in de zeę gheworpen, end twijfelet niet in zynem herte, mer gheloouet dat het gheschiehen zal wat hy zegt, zo zal hem ghewerden zo wat hy zegghet.

* mat.17.c.20 end .21.b.21 Luc.17.b.6

24

Hierom zeg ick v, ^‡ Alles wat ghy mit bidden begæret, gheloouet dat ghy het ⁺ entfanghet, end het zal v ghewerden.

‡ Iere.29.c.12 Matt.7.b.7 Luc.11.b.9 Ioan.14.b.13 end .16.c.24 Iaco.1.a.6 1.Io.3.d.22 end .5.c.14

+ anders. entfanghen zullet,

25

^+* End wanneęr ghy staet om te bidden,

+ D

* Matt.6.b.14 Colos.3.b.13 Eccl.28.a.2

[p. 82v]

latet quijt, zo ghy wat teghen iemand hebbet: op dat oock uwe Uader die in den hemelen is, v quijtlate uwe mißuallen.

26

^* Zo ghy auer niet quijtlatet, zo zal oock uwe Uader die in den hemelen is, niet quijtlaten uwe mißuallen.

* Matt.18.d.25

27

^* End zy kommen wederom tot Hierusalem: End de wijle hy in dem tempel wandelde, kommen tot hem de Ouerpriesters, end de Schriftgheleęrden, end de Olderlinghen,

* Mat.21.b.23 Luc.20.a.1

28

End zegghen tot hem: ^* Wt wat macht doest du dit? end wie heeft dy deze macht ghegheuen dat du dit doest?

* Exod.2.b.14 Act.4.b.7 end .7.c.27

29

Iesus auer andwordde end zeyde tot hen: Ick zal v oock eęn rede vraghen, end andwordet my, end ick zal v zegghen wt wat macht ick dit doe.

30

De Doop Ioannis, was hy vam hemel, of van menschen? Andwordet my.

31

End zy ouerleyden by hen zeluen, end zeyden: Zegghen wy vam hemel, zo zal hy zegghen: Waerom dan hebbet ghy hem niet ghelooft?

32

Zegghen wy auer, van menschen, zo vreęßden zy voor dem volcke. ^* Want zy hielden alle dat Ioannes waerachtlick eęn Propheet ware.

* Matt.14.a.5 Marc.6.c.21

33

End zy andworden end zegghen tot Iesu: Wy weten’t niet. End Iesus andwordende zegt tot hen: Zo zeg ick v oock niet, wt wat macht ick dit doe.