Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

[p. 78v]

1

⁺ ENd van daer opghestaen, quam hy in de palen des Iœdschen lands, van ouer den Iordaen: end de scharen verzamelen zick wederom tot hem, end ghelijck hy ghewoon was, leęrde hy ze wederom.

+ Matt.19.a.1

2

End de Phariséers toeghegaen, vraeghden hem of het oock eęnem manne verorloft ware zick af te scheyden van [zynem] wijue, hem verzouckende.

3

Hy auer andwordde end zeyde tot hen: Wat heeft v Moses gheboden?

4

Zy auer zeyden: ^* Moses heeft toeghelaten eęnen afscheydbrief te schrijuen, end zick af te scheyden.

* Deut.24.a.1 Ierem.3.a.1.

5

End Iesus andwordde end zeyde tot hen: Uan uwer herthardigheyt weghen heeft hy v dit gheschreuen:

6

^* Auer van beghinne der schepping maeckte ze God mann end wijf.

* Gen.1.d.17. Mat.19.a.4

7

^* Hierom zal eęn mensch verlaten zijn vader end moeder, end zal zynem wijue anklijuen.

* Genes.2.d.24 1.Cor.6.d.16 Ephe.5.g.31

8

End zy tweę zullen tot eęn vleęsch zijn. Zo zijn zy dan nu niet meęr tweę, mer eęn vleęsch.

9

^* Daerom wat God ⁺ t’zamen gheknocht heeft, dat scheyde gheęn mensch.

* 1.Cor.7.b.10

+ Gr. onder eęn iock t’zamen gheuoeght.

10

⁺End im huyze vraegden hem wederom zyne leęrionghers van dem zeluen.

+ B

11

End hy zegt tot hen: ^* Zo wie zick afscheydet van zynem wijue, end trauwet eęn ander, die doet echtbrekery an hœr.

* Mat.5.e.23 end .19.b.9 Luc.16.d.18 1.Cor.7.b.10

12

End zo zick eęn vrauw afscheydet van hœrem manne, end trauwet eęnen an-

[p. 79r]

deren, die doet echtbrekery

13

^* End zy brachten tot hem kinderkens, dat hy ze anroerde: de leęrionghers auer straften die, die ze anbrachten.

* Matt.19.b.13 Luc.18.c.15

14

Doe het auer Iesus zagh, namm hy het onwærdighlick, end zeyde tot hen: Latet de kinderkens tot my kommen, end weeret hen niet: ^* want alzulcker is het kœningkrijck Godes.

* Matt.18.a.3 end .19.b.14 1.Cor.14.d.20 1.Pet.2.a.2

15

Amen ick zeg v, zo wie niet annemet het kœningkrijck Godes als eęn kindeken, die zal daer gheęnßins ingaen.

16

End hy nam ze in de armen, end leyde de handen op ze, end zeghende ze.

17

^* End doe hy hénwt ghegaen was op den wegh, liep dar eęn tot hem, end buyghde de knyen voor hem, ⁺ end vraeghden hem: Goede Leęrmeęster, wat zal ick doen dat ick het eęwigh leuen beærue?

* Mat.19.b.16 Luc.18.d.18

+ C

18

Iesus auer zeyde tot hem: Wat heetst du my goed? niemand is goed dan eęn, naemlick God.

19

Du weetst de gheboden: ^* Doe gheęn echtbrekery. Sla niet dood. Steel niet, Ghetuygh niet valschlick. Bedriegh niet. Eęr dynen vader end moeder.

* Exod.20.c.30 end .21.c.12 Deut.5.b.17 Rom.13.c.9

20

Hy auer andwordde, end zeyde tot hem: Leęrmeęster, dit heb ick alles bewaert van myner iongher iœghden an.

21

Iesus auer zagh hem an, end had hem lief, end zeyde tot hem: ^* Eęn dingk fælt dy: ga hén, verkoop alles wat du hebst, end gheef het den armen, end du zalt eęnen schatt im hemel hebben: end het cruyß opghenomen hebbende

* Matt.6.c.19 Luc.12.d.33 end .16.c.9. 1.Tim.6.d.17

[p. 79v]

komm volgh my na.

22

Hy auer verzuchtde om des words willen, end ghingk trœrigh hén: want hy had veel ⁺ bezitts.

+ verkreghen goeds.

23

End Iesus zagh om zick, end zeyde tot zynen leęriongheren: ^* Hoe zwaerlick zullen die dar gheld hebben, in het kœningkrijck Godes ingaen.

* Matt.19.c.23 Luc.18.e.24 Pro.11.d.28

24

De leęrionghers auer versloughen zick ouer zynen worden. Auer Iesus andwordde wederom, ⁺ end zeyde tot hen: Kinders, hoe zwaerlick is het den die hœr vertrauwen op het gheld zetten, in het kœningkrijck Godes in te gaen.

+ D

25

Het is lichter dat eęn ⁺ kameel door eęn naeldenoogh inga, dan dat eęn rijcke in het kœningkrijck Godes inga.

+ Of. kabel.

26

Zy auer versloughen zick bouen maten zeęr, end zeyden onder malckanderen: End wie kan dan ⁺ zaligh werden?

+ Gr. beholden

27

Iesus auer zagh ze an end zeyde: By den menschen is het onmoghelick, mer niet by Gode. ^* Want alle dinghen zijn moghelick by Gode.

* Iob.42.a.2 Zach.8.a.6 Sap.11.d.20 Luc.1.d.33

28

End Petrus began tot hem te zegghen: ^‡ Zie, wy hebben’t alles verlaten, end zijn dy nagheuolght.

‡ Mat.4.c.20 Marc.10.c.28 Luc.5.b.11 end .18.e.28

29

Iesus auer andwordde end zeyde: Amen ick zeg v, dar is niemand die verlaten heeft huyß, of broeders, of zusters of vader, of moeder, of wijf, of kinders, of ackers om mijns end om des Euangelij willen,

30

Die niet honderdfoldigh nu in dezer tijd entfanghe, huyzen, end broeders, end

[p. 80r]

zusters end moeders, ⁺ end kinders, end ackers mit veruolghinghen, end in der toekomstigher eęwe het eęwigh leuen.

+ E

31

^* Auer vele eęrsten, zullen de lesten zijn: end de lesten, de eęrsten.

* Matt.19.d.30 end .20.b.16 Luc.13.f.28

32

^‡ Zy waren auer op dem weghe, end ghinghen hénop na Hierusalem, end Iesus ghingk voor hén hær: end zy waren verbaeßt end volghden hem na, end vreęßden zick. End hy namm wederom de twælue mede, end begann hen te zegghen wat hem ouerkommen zolde.

‡ matt.16.c.21 end .17.d.22 end .20.b 18 Marc.8.d 31 end .9.e.31 Luc.9.c.22 end .18.f.31. end .24.a.6

33

Zie, wy gaen hénop na Hierusalem, end des menschen Zoon zal ouergheleuert werden den Ouerpriesteren, end den Schriftgheleęrden: end zy zullen hem verdommen ten dood, end hem ouerleueren den Heydenen,

34

End zullen hem bespotten, end hem gheęsselen, end hem bespouwen, end hem dooden: end ten derden daghe zal hy opstaen

35

^* End tot hem gaen Iacobus end Ioannes de zoons Zebedéi end zegghen: Leęrmeęster, wy willen dat du ons doest wat wy begæren zullen.

* Matt.20.c.20

36

Hy auer zeyde tot hen: Wat willet ghy dat ick v doe?

37

Zy zeyden tot hem: Gheef ons dat wy zitten, de eęn dy ter rechter end de ander ter lincker hand in dyner heęrlicheyt

38

⁺Iesus auer zeyde tot hen: Ghy wetet niet wat ghy begæret. Konnet ghy den beker drincken den ick drincke, end ghedoopt werden mit dem doope ^* daer ick mede ghedoopt werde?

+ F

* Luc.12.g.50

39

Zy auer zeyden tot hem: Wy konnen’t.

[p. 80v]

Iesus auer zeyde tot hen: Ghy zullet wel den beker drincken den ick drincke, end ghedoopt werden mit dem Doope daer ick mede ghedoopt werde:

40

Auer te zitten tot myner rechter of ter lincker hand, is niet mijn te gheuen, dan ^* den het bereydt is.

* Matt.25.c.34

41

End doe de tien dit hoorden, begonnen zy’t onwærdighlick te nemen van Iacobo end Ioanne.

42

Iesus auer riep hen tot zick, end zegt tot hen: ^* Ghy wetet dat die dar schijnen de Ouerheyt te hebben onder den Heydenen, de zelue beheęrschen, end de groote [heęren] onder hen, ouerweldighen ze.

* Matt.20.d.25 Luc.22.c.25

43

^* Auer alzo zal het onder v niet zijn, mer zo wie dar groot willet werden onder v, die zal uwe dienaer zijn.

* 1.Pet.5.a.3

44

End zo wie onder v de eęrste willet werden, die zal aller knecht zijn.

45

Want oock des menschen Zoon is niet kommen ^* dat hy ghedient werde, mer dat hy diene, ⁺ end ^‡ gheue zijn ziel ter randzoeninghe vœr menighen.

* Ioan.13.b.14 Philip.2.a.7

+ G

‡ Ephes.1.b.7 Colos.1.b.14 1.Tim.2.b.6

46

End zy kommen tot Hiericho: ^* end doe hy wt Hiericho ghingk, end zyne leęrionghers, end eęn groote schare, zo zat dar eęn blinde [ghenaemt] Bartiméus Timéi zoon, an dem weghe, end bedelde.

* mat.20.d.29 Luc.18.f.35

47

End doe hy hoorde dat het Iesus de Nazarener was, begann hy te krijschen end te zegghen: Iesu [die dar bist] de zoon Dauids, erbarm dy myner.

48

End vele bestraften hem dat hy zweghe. Hy auer kreesch deß te meęr:

[p. 81r]

Du zoon Dauids, erbarm dy myner.

49

End Iesus stond still, end ⁺ ghebood dat men hem riepe. End zy roupen den blinden, end zegghen hem: Zy wel ghemoedt, sta op: hy roupt dy.

+ Gr. zeyde

50

Hy auer warp zynen mantel hén, end stond op, end quam tot Iesu.

51

End Iesus andwordde end zeyde tot hem: Wat wilt du dat ick dy doe? De blinde auer zeyde tot hem: ⁺ Rabboni, dat ick ghezicht entfanghe.

+ anders. Rabbuni

52

Iesus auer zeyde tot hem: Ga hén: dijn ghelooue heeft dy beholden. End van stonden an entfingk hy ghezicht, end volghde Iesum na op dem weghe.