Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

⁺ ENd hy zeyde tot hen: Amen ick zeg v, dar zijn’der zommighe onder die hier staen, die den dood niet smaken zullen tot dat zy ghezien zullen hebben het kœningkrijck Godes mit kracht ghekommen.

+ Matt.16.d.28 Luc.9.d.27.

2

^* End zeß daghen daerna, neemt Iesus mede Petrum end Iacobum end Ioannem, end leydt ze op eęnen hooghen bergh byzijden alleęne, end ward voor hen in ghedaente verandert.

* Matt.17.a.1 Luc.9.d.28

3

End zyne kleęders wurden schimmerende, zeęr witt als sneę, alzulcke als gheęn volder op ærden witt maken kann.

4

End van hen ward ghezien Helias mit Mose, end spraken t’zamen mit Iesu.

5

End Petrus andwordde end zeyde

[p. 76r]

tot Iesu: Rabbi, het is goet dat wy hier zijn: latet ons oock dry hutten maken, dy eęne, end Mosi eęne, end Helie eęne.

6

Hy wist auer niet wat hy sprack: want zy waren versaeght.

7

End dar ward eęn wolcke die ze beschaduwede, end eęn stemm quam wt der wolcken die dar sprack: ^{+ *} Deze is die mijn gheliefde Zoon, ^‡ hem hooret.

+ B

* Esa.42.a.1 Matt.3.d.17 end .17.a.5 Marc.1.b.11 Luc.3.e.22 end .9.e.35 Colos.1.b.13 2.Pet.1.d.17

‡ Deu.18.d.19

8

End van stonden an zaghen zy omhær, end zaghen niemand meęr, dan alleęn Iesum by hen.

9

^* End doe zy van dem berghe afghinghen, ghebood hy hen dat zy niemanden vertellen zolden wat zy ghezien hadden, dan wanneęr des menschen Zoon opghestaen ware van den dooden.

* Mat.17.b.9 Luc.9.e.37

10

End zy behielden deze rede by zick, end onderuraeghden wat doch ware, op te staen van den dooden.

11

End vraeghden hem, end zeyden: Wat is het dat de Schriftgheleęrden zegghen ^* dat Helias eęrst kommen moet?

* Mala.4.b.5 Matt.11.b.14 Luc.1.b.13

12

Hy auer andwordde end zeyde tot hen: Helias ia te voren ghekommen, stelt alles te recht: end [het is toekomstigh] ^* ghelijckerwijß dar gheschreuen is van des menschen Zone, dat hy veel lijden zal, end vœr niets gheacht werden.

* Psal.22.b.7 Esa.53.a.4

13

Mer ick zeg v dat Helias kommen zy (end zy hebben an hem ghedaen alles wat zy wolden.) ^* ghelijckerwijß van hem gheschreuen is.

* Malac.4.b.5

14

^* End ghekommen tot den leęriongheren, zagh hy eęn groote schare rond om ze, end de Schriftgheleęrden zick mit

* Matt.17.c.14 Luc.9.e.37

[p. 76v]

hen beuraghen. ⁺

+ C

15

End van stonden an doe de gansche schare hem zagh, ward zy verbaeßt, end liepen toe, end omhelßden hem.

16

End hy vraeghde de Schriftgheleęrden: Wat beuraghet ghy v mit hen?

17

End eęn wt der scharen andwordde, end zeyde: Leęrmeęster, ick heb tot dy hær bracht mynen zoon, die eęnen spraeckloozen gheęst heeft,

18

End zo wanneęr hy hem beuanget, schœrt hy hem, end hy schuymt, end knærsselt mit zynen tanden, end verdwijnt. End ick heb dynen leęriongheren ghezegt dat zy den zeluen wtworpen, end zy konden niet.

19

Hy auer andwordde hem end zeyde: O du ongheloouigh gheslæchte, hoe lang zal ick by v zijn? hoe lang zal ick v dulden? bringhet hem hær tot my.

20

End zy brachten den zeluen tot hem: end doe hy hem zagh, van stonden an schœrde hem de gheęst: end ter ærden gheuallen, wentelde hy zick, end schuymde.

21

End hy vraeghde zynen vader: Hoe langhe tijd is het dat hem dit gheschiedt is? Hy auer zeyde: Uan kinde af.

22

End menighmael heeft hy hem oock in vuer end in water hén gheworpen, dat hy hem ommbrochte. ⁺ Uermaghst du auer wat, zo erbarm dy onzer hertgrondlick, end komm ons te hulpen.

+ D

23

Iesus auer zeyde tot hem: Zo du kanst gheloouen, [het zal gheschiehen:] ^* Alle dinghen zijn moghelick dem die

* Luc.17.b.6

[p. 77r]

dar ghelooft.

24

End van stonden an schreyde des kinds vader mit tranen, end zeyde: Ick ghelooue, Heęr: Komm mynem onghelooue te hulpen.

25

Doe auer Iesus zagh dat de schare te hoop liep, bestrafte hy den onreynen gheęst schærplick, end zeyde tot hem: Du spraecklooze end dooue gheęst, ick ghebiede dy: Uaer van hem wt, end vaer voordan niet meęr in hem.

26

End [de gheęst] kreesch wt, end schœrde hem zeęr, end voer wt: end hy ward als dood, alzo dat vele zeyden: Hy is dood.

27

Iesus auer greep hem by der hand, end richtde hem op: end hy stond op.

28

^* End doe hy in huyß inghegaen was, vraeghden hem zyne leęrionghers byzonder: Waerom konden wy hem niet wtwærpen?

* Mat.17.c.19

29

End hy zeyde tot hen: Alzulck eęn aard kan nerghent mede wtvaren dan door bidden end vasten.

30

^+* End van daer vertoghen, reyßden zy door Galiléam: end hy wolde niet dat het iemand weten zolde.

+ E

* Mat.16.c.21 end .17.d.22 end .20.b.18 Marc.8.d.31 end .10.e.33 Luc.9.c.22 end .18.f.31 end .24.a.6

31

Want hy leęrde zyne leęrionghers, end zeyde tot hen: Des menschen Zoon werdt ouergheleuert in der menschen handen: end zy zullen hem dooden: end ghedoodt, zal hy ten derden daghe opstaen.

32

End zy verstonden dat word niet, end entzaghen zick hem te vraghen.

33

^* End hy quam tot Capernaum: end doe hy im huyze was, vraeghde hy ze: Wat ouerleydet ghy onder malckande-

* Matt.18.a.1 Luc.9.f.46 end .22.c.24

[p. 77v]

ren op dem weghe?

34

Zy auer zweghen still: want zy hadden onder malckanderen op dem weghe onderreding ghehadt, wie de grootste ware.

35

End nederghezeten, riep hy de twælue, end zegt tot hen: ^* Zo iemand wil de eęrste zijn, die zal de allerleste end aller knecht zijn.

* Matt.20.d.27 Mar.10.f.43

36

End hy nam eęn kindeken, end stelde’t midden onder ze, end nam t’zelue in zyne armen, end zeyde tot hen:

37

^* Zo wie eęn wt zulckerley kinderkens annemet in mynem name, die neemt my an: ⁺ end zo wie my annemet, die neemt niet my an, mer den die my wtghezonden heeft.

* Matt.18.a.5 Luc.9.f.48 Ioan.13.c.20

+ F

38

^* Ioannes auer andwordde hem, end zeyde: Leęrmeęster, wy hebben eęnen ghezien de duuels wtwærpen in dynem name, welcke ons niet nauolght: end wy hebben hem gheweert, om dat hy ons niet nauolght.

* Luc.9.f.49

39

Iesus auer zeyde: Weeret hem niet. ^* Want dar is niemand die eęnighe krachtighe daad doen zal in mynem name, welcker zal moghen haestlick van my quaad spreken.

* 1.Cor.12.a.3

40

Want wie dar niet is teghen ⁺ v, die is vœr ⁺ v.

+ anders, ons

+ anders, ons

41

^* Want zo wie v te drincken gheuet eęnen beker waters in mynem name, om dat ghy Christi zijt, Amen ick zeg v, die zal zynen loon niet verliezen.

* Matt.10.d.42

42

^* End zo wie eęnen wt den kleynen

* Matt.18.a.6 Luc.17.a.1

[p. 78r]

ærgheret die an my gheloouen, dem ware het beter dat [hem] eęn mœlensteęn om zynen halß ghedaen, end hy in de zeę hén gheworpen wurde.

43

^* End is dy dijn hand hinderlick, zo hauw ze af: Het is dy beter dat du stomphandigh tot den leuen ingaest, ⁺ dan dat du tweę handen hebbende in de helle hénin gaest, in het onwtblusschlick vuer

* Matt,5.e.30 end ,18.a.8. Deut.13.b.6

+ G

44

^* Daer hœre worm niet stærft, end het vuer niet wtghebluscht werdt.

* Esa.66.g.24 Eccl.7.b.17

45

End is dy dyne voet hinderlick, zo hauw hem af. Het is dy beter, dat du krœpel tot den leuen ingaest, dan dat du tweę voeten hebbende in de helle gheworpen werdest, in het onwtblusschlick vuer:

46

Daer hœre worm niet stærft, end het vuer niet wtghebluscht werdt.

47

End is dy dijn oogh hinderlick, zo wærp ze wt. Het is dy beter dat du eęnooghigh in het kœningkrijck Godes ingaest, dan dat du tweę ooghen hebbende in het helsche vuer gheworpen werdest:

48

Daer hœre worm niet stærft, end het vuer niet wtghebluscht werdt.

49

Want eęn ieghelick zal mit vuer ghezalten werden: ^* end alle offer zal mit zalt ghezalten werden.

* Leui.2.d.13

50

^* Het zalt is eęn goed dingk: zo auer het zalt zaltlooß werdet, waer mede zal men t’zelue smakelick maken? Hebbet zalt in v zeluen, ^‡ end zijt vreedzaem onder malckanderen.

* Matt.5.b.13. Luc.14.g.34

‡ Ro.12.d.18 Heb.12.d.14