Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.viij.

1

⁺ TEn dien daghen doe dar eęn zeęr groote schare was, end niet hadden te eten, riep Iesus zyne leęrionghers tot zick end zegt tot hen:

+ Matt.15.d.32

2

My iammert hertgrondlick der schare: want zy nu dry daghen vast by my blijuen, end hebben niet te eten.

3

End laet ick ze vastende na hœr huyß [hén gaen] zo zullen zy bezwijcken op dem wegh: want zommighe onder hen waren van verr kommen.

4

End zyne leęrionghers andwordden hem: Uan waer zal iemand deze hier in der woestijne mit brooden konnen zadighen?

5

End hy vraeghde ze: Hoe vele brooden hebbet ghy? Zy auer zeyden: Zeuen.

6

End hy ghebood der scharen neder

[p. 74r]

te zitten op de ærde: end hy nam de zeuen brooden, end ^* danckte, end brack ze, end gaf ze zynen leęriongheren dat zy ze voorleyden: end zy leyden ze der scharen voor.

* 1.Sam.9.b.13

7

End zy hadden eęn weinigh vischkens, end als hy ghedanckt had, hiet hy de zelue oock voorlegghen.

8

Zy aten auer, end wurden ghezadight: end [de leęrionghers] namen het ouerschot der brocken op, zeuen koruen.

9

(Auer die dar gheéten hadden, waren by vier duyzend.) End hy liet ze van zick.

10

^* End terstond mit zynen leęriongheren in’t schip inghetreden, ⁺ quam hy in de oorden Dalmanutha.

* Matt.15.d.29

+ B

11

End de Phariséers ghinghen hærwt, end begonnen zick mit hem te beuraghen ^* end zochten van hem eęn teęken van dem hemel, hem verzouckende.

* Matt.12.c.39 Luc.11.d.29 Ioan.6.d.30 1.Cor.1.c.20

12

End hy verzuchtde in zynem gheęst end zeyde: Wat zouckt dit gheslæchte eęn teęken? Amen ick zeg v, dezem gheslæchte zal gheęn teęken ghegheuen werden.

13

End hy verliet ze, end trad wederom in het schip, end voer hénouer.

14

End zy hadden vergheten brooden mede te nemen, end hadden niet meęr dan eęn brood mit zick in dem schepe.

15

End hy ghebood hen end zeyde: ^* Schauwet toe, [end] ziet v voor dem heuel der Phariséeren end voor dem heuel Herodis.

* Matt.16.a.6 Luc.12.a.1

16

End zy ouerleyden end spraken tot

[p. 74v]

malckanderen: Wy hebben gheęne brooden.

17

End Iesus bekende dat, end zeyde tot hen: Wat ouerlegghet ghy dat ghy gheęne brooden hebbet? Mærcket ghy noch niet, end verstaet ghy noch niet? Hebbet ghy noch uwe hert verblendt?

18

Hebbet ghy ooghen, end ziet ghy niet, end hebbet ghy ooren end hooret ghy niet?

19

End zijt ghy niet indachtigh, ^* als ick vijf brooden onder vijf duyzend menschen brack, hoe vele koruen voll brocken ghy opnamet? Zy zegghen tot hem: Twælue.

* Mat.14.b.17 Marc.6.e.38 Luc.9.b.13 Ioan.6.a.9

20

Auer ^* doe [ick’er brack] zeuen onder vier duyzend, hoe vele volle koruen brocken namet ghy op? Zy auer zeyden: Zeuen.

* Mat.15.d.34

21

⁺End hy zeyde tot hen: Hoe verstaet ghy’t niet?

+ C

22

End hy quam tot Bethsaida, end zy bringhen tot hem eęnen blinden, end bidden hem dat hy hem anroerde.

23

End hy nam den blinden by der hand, end leydde hem hénwt wt der vlecke: end spoogh op zyne ooghen, end leyde de handen op hem, end vraeghde hem of hy iet zaghe.

24

End hy zagh opwaerd, end zeyde: Ick zie menschen: want als boomen zie ick ze wandelen.

25

Daerna leyde hy wederom de handen op zyne ooghen, end maeckte hem ziende, end hy ward te recht ghebracht, end zagh ze alle klaerlick.

26

End hy verzand hem na huyß,

[p. 75r]

end zeyde: Ga niet hénin in de vlecke, end zegghet oock niemanden in der vlecke.

27

^* End Iesus ghingk wt end zyne leęrionghers in de vlecken Cesaree Philippi: end op dem wegh vraeghde hy zyne leęrionghers, end zeyde tot hen: Wie zegghen de menschen dat ick zy?

* Matt.16.b.13 Luc.9.c.18

28

Zy auer andwordden, ^* Ioannes de Dooper: end andere, Helias: andere auer, eęn wt den Propheten.

* Matt.14.a.2

29

End hy zegt tot hen: Ghy auer, wie zegghet ghy dat ick zy? Petrus auer andwordde end zeyde tot hem: ^* Du bist de ⁺ Ghezalfde.

* Ioan.6.g.69

+ Christus.

30

End hy beual hen schærplick dat zy dat niemanden van hem zegghen zolden.

31

^+* End hy begann ze te leęren dat des menschen Zoon veel moest lijden, end van den Olderlinghen end Ouerpriesteren end Schriftgheleęrden verworpen end ghedoodt werden, end na dryen daghen opstaen.

+ D

* Matt.16.e.21 end .17.d.22 end .20.b.18 Marc.9.e.31 end .10.e.33 Luc.9.c.22 end .18.f 31 end .24.a.6

32

End hy sprack dat word vrijwt. End Petrus nam hem tot zick, end begann hem te straffen.

33

Hy auer wand zick om, end zagh zyne leęrionghers an, end bestrafte Petrum, end zeyde: ^* Maeckt dy achter my du Satan: want du verzinnst niet wat Godes is, mer wat der menschen is.

* 2.sa.19.d.22

34

End hy riep tot zick de schare mit zynen leęriongheren, end zeyde tot hen: ^* Zo wie na my wil kommen, die verloochene zick zeluen, end neme zijn cruyß op, end volghe my na.

* Mat.10.d.38 end .16.d.24 Luc.9.c.23 end .14.f.27

[p. 75v]

35

^* Want zo wie zijn ziel wil beholden, die zal ze verliezen: zo wie auer zijn ziel verliezet om mijns end om des Euangelij willen, deze zal ze beholden.

* Matt.10.d.39 end .16.d.25 Luc.9 c.24 end .17.g.33 Ioan.12.d.25

36

Want wat zal’t dem mensche baten, zo hy de gansche wæreld wonne, end an zyner zielen schade lede?

37

Of wat zal de mensch gheuen, ^* daer hy zijn ziel mede losse?

* Psal.49.b.9

38

^* Want zo wie zick mijns end myner worden schamet onder dezem echtbrekighen end zondighen gheslæchte, deß zal zick oock des menschen Zoon schamen, wanneęr hy kommen zal in der heęrlicheyt zijns Uaders, mit den heilighen Enghelen.

* Matt.10.d.32 Luc.9.d.26 end .12.b.8 2.tim.2.b.12 1.Ioa.2.d.23