Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

1

⁺ EEnd zy quamen ouer d’ander zijde des meers in het landbegrijp der Gadareneren.

+ Matt.8.d.28 Luc.8.d.26.

2

End als hy wt dem schepe wtghetreden was, entmoettde hem terstond wt den grafsteęnen eęn mensch mit eęnem onreynen gheęste,

3

Welcker zijn woning in den grafsteęnen had, end niemand konde hem mit ketenen binden.

4

Om dat na dem hy menighmael mit boeyen end ketenen ghebonden gheweeßt had, oock de ketens van hem ghebroken, end de boeyen verbrijzelt waren, end niemand konde hem temmen.

5

End hy was altijd nacht end dagh op de berghen, end in den grafsteęnen

[p. 66v]

krijschende, end slough zick zeluen mit steęnen.

6

Doe hy auer Iesum zagh van verr, liep hy end viel voor hem neder,

7

End kreesch mit luyder stemmen end zeyde: Wat is my end dy, Iesu zoon Godes des allerhooghsten? Ick bezweere dy by God, dat du my niet pijnighest.

8

(Want [Iesus] zeyde tot hem: Uaer wt du onreyne gheęst van dem mensche.)

9

End hy vraeghde hem: Hoe bist du ghenaemt? End hy andwordde end zeyde: Myne naem is Legion. Want onzer is vele.

10

End bad hem zeęr dat hy ze niet wt dien landbegrijpe wtzonde.

11

Aldaer auer by den berghen was eęn groot kudde zwijnen dat dar weydde.

12

End de duuels baden hem alle, end zeyden: Zend ons in de zwijnen, dat wy daerin varen.

13

⁺End van stonden an verorlofde’t hen Iesus. End de onreyne gheęsten wtgheuaren, voeren in de zwijnen: end het kudde ward mit eęnem stormm van bouen af in d’meer ghedreuen. (Hœrer was auer by tweę duyzend) end versmachtden in dem meer.

+ B

14

De zwijnhærders auer vlohen wegh, end boodschapten’t in der stad end op dem velde. End zy ghinghen hénwt te zien wat dar gheschiedt was.

15

End kommen tot Iesu, end anschauwen den bezetenen die het legioen ghe-

[p. 67r]

hadt had, zitten end bekleędt end wel by zinnen: end zy vreęßden.

16

End die het ghezien hadden, vertelden hen hoe het toeghegaen was mit dem bezetenen, end van den zwijnen.

17

End zy begonnen hem te bidden ^* dat hy doch van hœren palen vertoghe.

* Act.16.g.39

18

End doe hy in’t schip ghetreden was, ^* bad hem die bezeten gheweeßt had, dat hy mochte by hem zijn.

* Luc.8.e.38

19

Auer Iesus liet het hem niet toe: mer zeyde tot hem: Ga hén in dijn huyß tot den dynen, end verkondigh hen wat groote dinghen dy de Heęr ghedaen, end zick dyner erbarmt heeft.

20

End hy ghingk hén, end begann te prediken in dem Tienstedenlande wat groote dinghen hem Iesus ghedaen hadde: end zy verwonderden zick alle.

21

^* End doe Iesus wederom te schepe hénouer gheuaren was, verzamelde zick eęn groote schare tot hem: end hy was an dem meer.

* Matt.9.c.18 Luc.8.f.41

22

⁺End zie, dar quam der Ouersynagooghmeęsteren eęn mit name Iairus: end doe hy hem zagh, viel hy hem te voeten,

+ C

23

End bad hem zeęr, end zeyde: Mijn dochterken ligt in dem wtersten: [ick bid dy] dat du kommest end op ze de handen legghest, op dat zy ghezond werde: end ⁺ zy zal leuen.

+ anders. leue.

[p. 67v]

24

End hy ghingk hén mit hem, end eęn groote schare volghde hem na, end zy dronghen hem.

25

(^* End eęn vrauw, die bloedgangkzuchtigh twælf iaren langk gheweeßt had,

* Matt.9.c.20 Luc.8.f.43 Leui.15.c.25

26

End veel van velen medicijnmeęsteren gheleden, end alle het hœre verteert had, end niet gheholpen was gheweeßt: mer was mit hœr veel ærgher gheworden,

27

Doe zy hoorde van Iesu, quam zy onder de schare van achter, end roerde zijn kleęd an.

28

Want zy zeyde: Wen ick zo veel als zyne kleęders anroere, zo zal ick ghezond werden.

29

End van stonden an verdrooghde de loop hœrs bloeds, end zy ⁺ bekende am lijue dat zy ghenezen was van der plaghe.

+ Of. gheuoelde

30

End Iesus bekende van stonden an an hem zeluen dat dar eęn kracht van hem wtghegaen was: end wand zick omm onder de schare, end zeyde: Wie heeft myne kleęders angheroert?

31

End zyne leęrionghers zeyden tot hem: Du ziest dat dy de schare an allen zijden dringt, end du zegst: Wie heeft my angheroert?

32

End hy zagh rond om, om te zien die, die dat ghedaen had.

33

De vrauw auer vreęßde end beefde, dewijl zy wiste wat an hœr gheschiedt was: end quam end viel voor hem neder end zeyde hem de gansche waerheyt.

34

⁺Hy auer zeyde tot hœr: Dochter, dijn

+ D

[p. 68r]

ghelooue heeft dy beholden: ga mit vreden, end zy ghezond van dyner plaghe.)

35

^* Doe hy noch sprack, kommen [zommighe] van dem Ouersynagoogmeęster, die dar zeyden: Dijn dochter is dood, wat quelt du den leęrmeęster meęr?

* Matt.9.c.23. Luc.8.g 49.

36

Iesus auer hoorde van stonden an de rede die dar ghezegt ward, end zeyde tot dem Ouersynagooghmeęster: Ureęß niet, gheloof alleęnlick.

37

End hy liet niet toe dat hem iemand nauolghde, dan Petrus, end Iacobus, end Ioannes de broeder Iacobi.

38

End hy komt in het huyß des Ouersynagooghmeęsters, end anschauwt de woeling end die dar weęnden end zeęr huylden.

39

End hénin ghegaen zegt hy tot hen: Wat woelet end weęnet ghy? Het dochterken is niet dood ^* mer het slaept.

* Ioan.11.b.11

40

End zy belachten hem. Hy auer warp ze allen wt, end neemt den vader end de moeder des dochterkens mede, end die by hem waren: end gaet hénin daer het dochterken lagh.

41

End greep de hand des dochterkens an, end zegt tot hœr: Talitha cumi: d’welck werdt wtghelegt, Dochterken, (dy zeg ick,) sta op.

42

End van stonden an stond het dochterken op, end wandelde: want het was twælf iaren old: end zy entzett-

[p. 68v]

den zick mit grooter entzettinghe.

43

End hy ghebood hen zeęr dat het niemand weten zolde: end zeyde dat men hœr te eten gaue.