Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

⁺ ENd hy ghingk wederom in de Synagoogh, end daer was eęn mensch welcker had eęn verdorrede hand:

+ Matt.12.a.9 Luc.6.a.6

2

End zy namen hem waer, of hy op den

[p. 62v]

Sabbathdaghen hem heylen zolde, op dat zy hem verklaeghden.

3

End hy zegt tot dem mensche die de verdorrede hand had: Sta op in het midden.

4

End hy zegt tot hen: Is het verorloft op den Sabbathdaghen goed te doen of quaed te doen? de ziel te beholden of te dooden? Zy auer zweghen still.

5

End hy zagh ze omhær an mit tornigheyt, end ward bedrouft ouer de verblendheit hœrs herten, end zeyde tot dem mensche: Streck dijn hand wt. End hy streckte ze wt, ^* end zijn hand ward wederom ghezond ghestelt als de andere.

* 1.Reg.13.b.6

6

^* End de Phariséers hénwt ghegaen, hielden terstond raed mit den Herodianen ouer hem, hoe zy hem ommbrochten.

* Matt.12.b.14 Ioan.10.g.39 end .11.f.47

7

^* Iesus auer entweeck van daer mit zynen leęriongheren an het meer, end eęn groote menighte volghde hem na van Galiléa end van Iudéa.

* Matt.4.d.25 Luc.6.c.17

8

⁺End eęn groote menighte van Hierusalem, end van Iduméa, end [van] ouer dem Iordaen, end die omtrent Tyro end Sidon [woonden], doe zy hoorden alles wat hy dede, quamen tot hem.

+ B

9

End [Iesus] beual zynen leęriongheren dat hem eęn scheepken vast angheholden wurde, om der scharen willen, op dat zy hem niet verdronghen.

10

Want hy had hœrer vele gheheylt, alzo dat hem alle die gheplaeght waren, oueruielen op dat zy hem anroerden.

11

End wanneęr hem de onreyne gheęsten

[p. 63r]

zaghen, vielen zy voor hem neder, end kreeschen wt, end zeyden: Du bist Godes Zoon.

12

End hy verbood hen schærplick dat zy hem niet openbaer maeckten.

13

^* End hy klimt op den bergh, end roupt tot zick welcke hy wolde, end zy quamen tot hem.

* Matt.10.a.1 Marc.6.b.7 Luc.6.b.13 end .9.a.1.

14

End hy verordende’r twælue dat zy by hem waren, end dat hy ze wtzonde te prediken,

15

End dat zy macht hadden de zieckten te heylen, end de duuels wt te wærpen.

16

Simon, welckem hy den naem gaf Petrus.

17

⁺End Iacobum den zoon Zebedéi, end Ioannem den broeder Iacobi, welcken hy vœr namen gaf Boanerges, dat is, donders zoons.

+ C

18

End Andream, end Philippum, end Bartholomeum, end Mattheum, end Thomam, end Iacobum Alphéi zoon, end Thaddeum, end Simon den Cananiter.

19

End Iudam Iscarioth, die oock hem verriedt.

20

End zy kommen in huyß, end de schare komt wederom te zamen, alzo dat zy oock gheęn gheleghenheyt hadden brood te eten.

21

End doe de zynen dit hoorden, ghinghen zy hénwt hem vast te holden. Want zy zeyden: Hy is ⁺ buyten hem zeluen.

+ Of, wtzinnigh

22

End de Schriftgheleęrden die van Hierusalem afkommen waren, zeyden: ^* Hy heeft Beelzebul, end, door der duuelen

* Matt.9.d.34 end .12.b.24 Luc.11.b.15 Ioan.8.f.48

[p. 63v]

ouersten wærpt hy de duuels wt.

23

End doe hy ze tot zick gheropen had, zeyde hy tot hen in verghelijckinghen: Hoe kann Satan eęnen Satan wtwærpen?

24

End zo eęn kœningkrijck teghen zick zeluen ghedeęlt is, zo kann dat kœningkrijck niet bestaen.

25

End zo eęn huyß teghen zick zeluen ghedeęlt is, zo kann dat huyß niet bestaen.

26

⁺End zo de Satan teghen zick zeluen opstaet end ghedeęlt is, zo kann hy niet bestaen, mer heeft eęn ende.

+ D

27

Niemand kann in eęns gheweldighen huyß ingaen end zijn tuych afroouen, ^* ten zy dat hy eęrst den gheweldighen binde: end alsdan zal hy zijn huyß beroouen.

* Colos.2.c.15

28

Amen ick zeg v, ^* Alle zonden zullen quijtghelaten werden der menschen kinderen, end alle lasteringhen daer mede zy ghelastert zullen hebben:

* Matt.12.c.31 Luc.12.b.10 1.Ioan.5.d.16 1.Sa.2.e.25

29

^* Zo wie auer teghen den heylighen Gheęst lastering spreket, die heeft gheęn quijtlating in eęwigheyt, mer is schuldigh des eęwighen gherichtes.

* Num.15.e.30

30

Want zy zeyden: Hy heęft eęnen onreynen gheęst.

31

^* End tot hem kommen zijn moeder end de broeders, end buyten staende, schickten tot hem die hem wtroupen zolden.

* Mat.12.d.46 Luc.8.c.19

32

End de schare zat rond om hem, end zy zeyden tot hem: Zie, dijn moeder, end dyne broeders daer buyten vraghen na dy

33

End hy andwordde hen end zeyde: Wie is mijn moeder end myne broeders?

[p. 64r]

34

End hy ouerzagh ringsom die rond om hem zaten, end zeyde: Zie, mijn moeder end myne broeders.

35

^* Want zo wie dar Godes wille doet, deze is mijn broeder, end mijn zuster end moeder.

* Ioan.15.b.14 2.Cor.5.c.16