Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij

1

⁺ ENd zommighen daghen lang is hy wederom inghegaen in Capernaum, end het ward ghehoort dat hy im huyze was.

+ Matt.9.a.1 Luc.5.d.17

2

End terstond verzamelden zick dar vele, alzo dat oock de plaetsen die omtrent der dœren waren, ze nu niet konden vaten: end hy sprack hen het word.

3

End tot hem kommen zommighe die dar brachten eęnen ghichtighen, die van vieren ghedraghen ward.

4

End doe zy hem niet konden bykommen om der scharen willen, ondeckten zy het dack [des huyß] daer hy was,

[p. 61r]

end doe zy [dat] opghegrauen hadden, lieten zy het bedde daer de ghichtighe in lagh, mit zeęlen neder.

5

Doe auer Iesus hœr ghelooue zagh, zegt hy tot dem ghichtighen: Zoon, dyne zonden werden dy quijtghelaten.

6

Dar waren auer zommighe Schriftgheleęrden die daer zaten end ouerdachten in hœren herten:

7

Wat spreeckt deze alzulcke Godslasteringhen? ^* Wie kan de zonden quijtlaten, dan de eęnighe God?

* Iob.14.a.4 Psal.32.b.5 Esa.43.d.25

8

End van stonden an bekende Iesus in zynem gheęst, dat zy alzo ouerdachten by hen zeluen, end zeyde tot hen: Wat ouerdencket ghy deze dinghen in uwen herten?

9

Welck is lichter, tot dem ghichtighen te zegghen: Dy werden ⁺ de zonden quijtghelaten, of te zegghen, Sta op, end neem dijn bedde op end wandel?

+ anders. dyne zonden

10

Op dat ghy auer wetet dat des menschen Zoon macht heeft de zonden quijt te laten op ærden (zegt hy tot dem ghichtighen:)

11

Ick zeg dy, Sta op, end neem dijn bedde op, end ga hén in dijn huyß.

12

End van stonden an stond hy op, end nam het bedde op, end ghingk hénwt voor hen allen: alzo dat zy zick alle entzettden, end prezen God, end zeyden: Wy hebben zulcks noyt ghezien.

13

^* End hy ghingk wederom hénwt an het meer, end de gansche schare quam tot hem, end hy leęrde ze.

* Matt.9.a.9 Luc.5.e.27

14

End doe [Iesus] voorby ghingk, zagh hy Leui den zoon Alphéi an’t tol-

[p. 61v]

huyß zitten, end zegt tot hem: Uolg my na. End hy stond op, end volghde hem na.

15

End het gheschiedde, doe ⁺ hy anzat in zynem huyze, dat oock vele tollenaers end zondaers t’zamen anzaten mit Iesu end zynen leęriongheren: want hœrer was veel die hem nauolghden.

+ Gr. anlagh.

16

⁺End doe de Schriftgheleęrden end de Phariséers zaghen dat hy mit den tollenaren end zondaren at, zeyden zy tot zynen leęriongheren: Wat is’t dat hy eett end drinckt mit den tollenaren end zondaren?

+ C

17

End doe Iesus dit hoorde, zeyde hy tot hen: Die dar stærck zijn, behouuen des medicijnmeęsters niet, mer die dar kranck zijn. ^* Ick bin niet kommen te roupen gherechtighen mer zondaers ter ghemoedbeteringhe.

* Mat.9.b.13 end .21.c.31 Luc.5.f.32 end .19.b.10 1.Timo.1.c.15

18

^‡ End de leęrionghers Ioannis end der Phariséeren vastden, end kommen, end zegghen tot hem: Waerom vasten de leęrionghers Ioannis end der Phariséeren, dyne leęrionghers auer vasten niet?

‡ Matt.9.b.14 Luc.5.f.33.

19

End Iesus zeyde tot hen: ^* Konnen oock der bruyloft kinders vasten de wijle de Bruydegomm by hen is? Zo lang als zy den Bruydegomm by zick hebben, konnen zy niet vasten.

* Esa,62 b.5 2.Cor.11.a.2

20

De daghen auer zullen kommen, wanneęr de Bruydegomm hen afghenomen zal werden, end dan zullen zy vasten in dien daghen.

21

End niemand nayt eęnen lap rauwen lakens an eęn old kleęd, anders neemt de nieuwe lap des zeluen [wat] af

[p. 62r]

van dem olden, end de schœre werdt ærgher.

22

⁺End niemand ⁺ doet ^* den nieuwen wijn in olde lederzacken, anders schœrt de nieuwe wijn de lederzacken, end de wijn werdt wtghestortt, end de lederzacken verdæruen. Mer men behoort den nieuwen wijn in nieuwe lederzacken te doen.

+ D

+ Gr. wærpt

* Sap.1.a.4 Act.2.a.4

23

^* End het gheschiedde dat hy ghingk op den Sabbatdaghen door’t ghezayde, end zyne leęrionghers begonnen te gaen end aren te plucken.

* Matt.12.a.1 Luc.6.a.6. Deu.23.d.25

24

End de Phariséers zeyden tot hem: Zie, wat doen zy op den Sabbathdaghen ^* dat niet verorloft is?

* Exo.20.b.10

25

End hy zegt tot hen: Hebbet ghy noyt ghelezen ^* wat Dauid dede doe hy in nood was, end hem hongherde, end den die by hem waren?

* 1.Sa.21.b.6

26

Hoe hy inghegaen zy in het huyß Godes onder Abiathar dem Ouerpriester, end de schauwbrooden gheéten heeft, die niet verorloft waren te eten, ^* dan den Priesteren, end gaf ze oock den die by hem waren?

* Exo.29.f.34 Leui.8.f.29 end .24 b.9

27

End hy zeyde tot hen: De Sabbath is om des menschen willen ghemaeckt, niet de mensch om des Sabbats willen.

28

^* Alzo dan is des menschen Zoon eęn Heęr oock des Sabbats.

* Matt.12.a.8 Luc.6.a.6