Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxv.

1

DAn zal het kœningkrijck der hemelen vergheleken werden tien maeghden, welcke hœre lichtuaten namen, end ghinghen wt dem Bruy-

[p. 48r]

degomm enteghen.

2

Auer vijf onder hen waren dwaze, end vijf klouckzinnighe.

3

Die dar dwaeß waren, ghenomen hebbende hœre lichtuaten, hadden gheęn oly mit zick ghenomen.

4

De klouckzinnighe auer hadden oly ghenomen in hœre kruycken, zampt hœren lichtuaten.

5

Doe nu de Bruydegomm vertoufde, wurden zy alle slaperigh end entsliepen.

6

Midden auer in der nacht ward dar eęn gheschrey: Zie, de bruydegomm kommt: gaet wt hem enteghen.

7

Doe stonden alle die maeghden op, end cierden hœre lichtuaten.

8

De dwaze auer zeyden tot den klouckzinnighen: Gheuet ons van uwer oly, want onze lichtuaten gaen wt.

9

End de klouckzinnighe andwordden end zeyden: [Gheęnßinns,] op dat niet ons end v t’eęnigher tijd entbreke: auer gaet lieuer hén tot den verkooperen, end koopet vœr v zeluen.

10

Doe zy auer hén ghinghen te koopen, quam de Bruydegomm: end die dar bereyd waren, ghinghen mit hem hénin ter bruyloft, end de dœre ward ghesloten.

11

Ten lesten auer kommen oock de andere maeghden, end zegghen: Heęr Heęr, doe ons open.

12

Hy auer andwordde end zeyde: Amen ick zeg v, ^* ick kenn v niet:

* Matt.7.d.23 Luc.13.f.25

13

^‡ Daerom waket, want ghy wetet noch den dagh noch de vre, in welcker des menschen Zoon kommen zal.

‡ Matth.24.d 42 Marc.13.d.33 Luc.12.e.40 end .21.g.33. 1.Thes.5.a.6

[p. 48v]

14

^* Want [het is] euen als eęn mensch die buyten lands reyzende, zyne eyghene knechten riep, end gaf hen zyne hauen ouer.

* Marc.13.d.34 Luc.19.b.12

15

⁺End eęnem gaf hy vijf talentponden dem anderen tweę, dem anderen auer eęn: eęnem ieghelicken na zynem eyghenen vermoghen: end terstond reyßde hy buyten lands.

+ B

16

End die vijf talentponden entfanghen had, ghingk hén end dede daermede næring: end ghewann andere vijf talentponden.

17

Deßghelijcken oock die de tweę [entfanghen had] ghewann oock tweę andere.

18

Die auer het eęn entfanghen had, ghingk hén, end grouf het in d’ærde, end verbargh zijns heęren gheld.

19

Ouer eęn langhe tijd auer kommt dier knechten heęr, end rekent mit hen.

20

End die de vijf talentponden entfanghen had, byghekommen, bracht andere vijf talentponden daertoe, end zeyde: Heęr, vijf talentponden gaefst du my ouer, zie, ick heb andere vijf talentponden daermede ghewonnen.

21

Zijn heęr auer zeyde tot hem: Wel an goede end ghetrauwe knecht, ^* du bist ouer weynigh trauw gheweeßt, ick zal dy ouer veel zetten: ga in tot dijns heęren vrœghde.

* mat.24.d 45 Luc.12.f.42

22

Die auer de tweę talentponden entfanghen had, oock byghekommen, zeyde: Heęr, du gaefst my tweę talentponden ouer, zie, ick heb andere tweę talentpon-

[p. 49r]

den daer mede ghewonnen.

23

Zijn heęr zeyde tot hem: Wel an, goede end ghetrauwe knecht, du bist ouer weynigh trauw gheweęßt, ick zal dy ouer veel zetten: ga in tot dijns heęren vrœghde.

24

Auer die het eęn talentpond entfanghen had, oock byghekommen, zeyde: Heęr, ick wist dat du eęn hard mensch bist, du mayst daer du niet ghezayt hebst, end zamelest van daer, waer du niet ghestroeyt hebst:

25

⁺End veruært ghingk ick hén, end verbargh dijn talentpond in de ærde: zie, dar hebst du het dyne.

+ C

26

Zijn heęr auer andwordde end zeyde tot hem: Booze end luye knecht, wist du dat ick maye, daer ick niet ghezayt heb, end van daer zamele, waer ick niet ghestroeyt heb:

27

Zo moest du dan mijn gheld by den wisselaren bestelt hebben, end ghekommen, hadde ick ghewißlick het myne entfanghen mit woucker.

28

Daerom nemet het talentpond van hem wegh, end gheuet dem die de tien talentponden heeft.

29

^* Want zo wie dar heeft, dem zal ghegheuen werden, end hy zal oueruloeyen: van dem auer die niet heeft, zal oock dat hy heeft, afghenomen werden.

* Matt.13.b.12 Marc.4.c.24 Luc.8.c.18 end .19.d.26

30

End den onnutten knecht wærpet wt in de wterste duysterniß: ^‡ Daer zal zijn gheweęn end tanden knærsseling.

‡ Matt.8.b.12 end .13.f.42 end .22.b.13 Luc.13.f.26 end .24.d.51.

31

^* Wanneęr auer des menschen Zoon kommen zal in zyner heęrlicheyt, end alle

* Mat.16.d.27 end .26.f.63 Marc.14.f.61 Luc.12.f.25. Act.1.b.11 1.thes.4.d.16 2 Thess.1.c.10 Apoca.1.b.7

[p. 49v]

heylighe Enghels mit hem: dan zal hy zitten op dem throon zyner maiesteyt.

32

End voor hem zullen vergadert werden alle volcken: ^* end hy zal ze van malckanderen afzonderen, ghelijckerwijß eęn hærder de scapen van den bocken afzondert.

* Eze.34.e.20

33

End hy zal de schapen t’zyner rechter hand stellen, de bocken auer ter lincker hand.

34

Dan zal de Kœningk zegghen tot den die t’zyner rechter hand zijn zullen, Kommet ghy ghezeghende mijns Uaders, beæruet het kœningkrijck ^* dat v bereydt is van der wæreld grondlegghinghe.

* Matt.20.c.23 Marc.10.f.40

35

^* Want ick bin hongherigh gheweęßt, end ghy hebbet my te eten ghegheuen: ick bin dorstigh gheweeßt, end ghy hebbet my ghedrenckt.

* Esai.58.b.7 Ezech.18.b.7

36

^+* Ick was eęn vrémdelingk, end ghy hebbet my medegheleydt: naeckt, end ghy hebbet my bekleędt.

+ D

* Hebr.13.a.2

37

^* Ick bin kranck gheweeßt, end ghy hebbet eęn opzicht ouer my ghehadt: ick was ^‡ in gheuanghenisse, end ghy zijt tot my kommen.

* Eccle.7.d.36

‡ 2.tim.1.d.16

38

Dan zullen hem de gherechtighen andworden, end zegghen: Heęr, wanneęr hebben wy dy hongherigh ghezien, end hebben [dy] ghespijßt? of dorstigh, end hebben [dy] ghedrenckt?

39

Wanneęr doch hebben wy dy vrémdelingk ghezien, end hebben [dy] medegheleydt? of naeckt, end hebben [dy] bekleędt?

40

Wanneęr hebben wy dy kranck of in gheuanghenisse ghezien, end zijn tot dy kommen?

[p. 50r]

41

End de Kœningk zal andworden end tot hen zegghen: Amen ick zeg v: ^* zo wat ghy ghedaen hebbet eęnem van dezen mynen minsten broederen, dat hebbet ghy my ghedaen.

* matt.10.d.42 marc.9.f.41 Ioan.13.c.20 Prou.14.d.31

42

Dan zal hy oock zegghen tot den die ter lincker hand zijn zullen: ^* Gaet hén van my ghy verulouckten in ^‡ d’eęwigh vuer, welck bereydt is dem duuel end zynen Enghelen.

* Psal.6.b.9 Matt.7.d.23 Luc.13.f.25

‡ Esa.30.g.33 Apoc.19.d.20

43

Want ick bin hongherigh gheweęßt, end ghy hebbet my niet te eten ghegheuen: ick bin dorstigh gheweeßt, end ghy hebbet my niet ghedrenckt.

44

Ick was eęn vrémdelingk, end ghy hebbet my niet medegheleydt: naeckt, end ghy hebbet my niet bekleędt: kranck, end in gheuanghenisse, end ghy hebbet gheęn opzicht ouer my ghehadt.

45

Dan zullen hem oock de zelue andworden end zegghen: Heęr, wanneęr hebben wy dy ghezien, hongherigh, of dorstigh, of eęn vrémdelingk, of naeckt, of kranck, of in gheuanghenisse, end hebben dy niet ghedient?

46

Dan zal hy hen andworden, end zegghen: ^* Amen ick zeg v, Zo wat ghy niet ghedaen hebbet eęnem van dezen minsten, dat hebbet ghy oock my niet ghedaen.

* Zach.2.c.8 Prou.14.d.31 end .17.a.5

47

^* End zy zullen hén gaen, deze in d’eęwighe pijning, de gherechtighen auer in d’eęwigh leuen.

* Dani.12.a.2 Ioan.5.e.29