Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxiij.

1

DOe sprack Iesus tot den scharen end tot zynen leęriongheren, end zeyde: ^* Op Moses stoel zijn ghezeten de Schriftgheleęrden end de Phariséers:

* 2.Esdr.8.a.4

2

^* Alles dan wat zy v zegghen dat ghy holden zullet, dat holdet, end doet het: auer na hœren wercken doet niet: ^* Want zy zegghen, end doen’t niet.

* Deu.17.d.19

* Rom.2.a.1

3

^* Want zy binden lastighe end zwaerdraghlicke packen, end legghen ze den menschen op de scholders, auer zy willen ze niet mit hœren vingher verroeren.

* Luc.11.f.46 Act.15.b.10 Esa.10.a.1

4

Alle hœre wercken auer doen zy dat zy van den menschen gheschauwt werden. Want zy verbreyden hœre ^* bewaercedels, end maken de zoomen hœrer kleęderen groot.

* Deut.6.b.8 end .22.b.12 Num.15.d.38

5

^* End hebben zeęr gærn de vooranzittinghen in den maeltijden, end de voorghestoelten in den Synagoghen,

* Marc.12.d.39 Luc.11.f.43 end .20.g.45

6

End de begroetinghen op den marckten, end dat zy van den menschen ^* Rabbi Rabbi gheheeten werden.

* Iacob.3.a.1

7

Ghy auer, werdet niet gheheeten Rabbi: want eęn is uwe leydsmeęster, naemlick Christus: ghy auer zijt alle ghebroeders

8

End heetet niemand uwen vader op ærden: ^* want eęn is uwe vader, die in den hemelen is.

* Mala.1.b.6

9

Werdet oock niet leydsmeęsters gheheeten: want eęn is uwe leydsmeęster, naemlick Christus.

[p. 43v]

10

^* Wie auer de grootste onder v is, die zal uwe dienaer zijn.

* Matt 20.d.26

11

^* End zo wie zick zeluen verhooght, die zal vernedert werden: end zo wie zick zeluen vernedert, die zal verhooght werden

* Iob.22.d.29 Pro.29.d 23 Luc.14.c.11 end .18.c.14 Ia.4.b.6. c.10 1.Pet.5.b.5

12

^‡ Weę auer v Schriftgheleęrden end Phariséers, ghy huychelaers, want ghy verslindet der weduwen huyzen, end dit door eęn voorwending uwes langs biddens, hierom zullet ghy eęn meęrder gherichte entfanghen.

‡ mar 12.d.40 Luc.20.g.46 2.Tim 3.b.6 Tit.1.c.11.

13

^* Weę v Schriftgheleęrden end Phariséers, ghy huychelaers, mids dat ghy het kœningkrijck der hemelen sluytet voor den menschen: ⁺ want ghy gaet’er niet hénin, end die dar hénin gaen zolden, latet ghy niet hénin gaen.

* Luc.11.g.52

+ B

14

Weę v Schriftgheleęrden end Phariséers, ghy huychelaers, want ghy gaet de zeę end het land om, dat ghy eęnen ⁺ Iœdeghenoot maket, end wanneęr hy’t gheworden is, maket ghy hem eęn kind der hellen, tweęuoldigh meęr dan ghy zijt.

+ Gr. ankommelingk

15

Weę v blinde beleyders, die dar zegghet: Zo wie dar zweeret by dem tempel, het is niets: zo wie auer zweeret by dem golde des tempels, die is schuldigh.

16

Ghy dwazen end blinden, welck is doch grooter, het gold, of de tempel die het gold heylight?

17

End zo wie dar zweeret by dem altaer, het is niets: zo wie auer zweeret by der gaue die daerop is, die is schuldigh.

18

Ghy dwazen end blinden, welck is doch grooter, de gaue, of de altaer die de

[p. 44r]

gaue heylight?

19

Wie dan zweeret by dem altaer, die zweeret by dem zeluen, end by allem dat daerop is.

20

^* End wie dar zweeret by dem tempel, die zweeret by dem zeluen, end by dem, die den zeluen bewoont.

* 1.Reg.8.b.13 2.Par.6.a.1

21

^+* End wie dar zweeret by dem hemel, die zweeret by dem throon Godes, end by dem die daerop zitt.

+ C

* 2.Para.6.f.33 Esa.66.a.1 Matt.5.f.34 Act.7.f.49

22

^‡ Weę v Schriftgheleęrden end Phariséers, ghy huychelaers: want ghy vertienet de mente end de dille, end het komijn, end hebbet naghelaten ^* de dinghen der Wet die ghewichtigher zijn, [naemlick] het gherichte end de barmhertigheyt, end het ghelooue. Deze moest men doen, end die niet nalaten.

‡ Luc.11.f.24

* 1.Sa.15.e.22 Eccl.4.d.17 Osee.6.c.7 Mich.6.b.8 Matt.9.b.13 end .12.a.7

23

Ghy blinde beleyders, die dar de mug wtzijghet, den kameel auer zwelghet ghy op.

24

^* Weę v Schriftgheleęrden end Phariséers, ghy huychelaers: want ghy reynighet het buytenste des drinckbekers end der schotel, binnen auer zijn zy voll roofs end ⁺ onmatigheyt.

* Luc.11.f.39

+ Of, ongherechtigheyt

25

Du blinde Phariséer, ^* reynigh eęrst het binnenste des drinckbekers end der schotel, op dat oock het buytenste dezer reyn werde.

* Tit.1.d.15

26

^* Weę v Schriftgheleęrden end Phariséers ghy huychelaers: want ghy zijt ghelijck den ouerwittden grauen, welcke wel van buyten schoon schijnen, auer binnen zijn zy voll dooden beęnderen end aller onreynigheyt.

* Luc.11.f 44

[p. 44v]

27

Alzo oock ghy, van buyten schijnet ghy den menschen wel gherechtigh, binnen auer zijt ghy voll gheueynßtheyt end Wetloozigheyt.

28

^* Weę v Schriftgheleęrden end Phariséers, ghy huychelaers, want ghy bauwet der Propheten grauen, end vercieret der gherechtighen grafsteęnen,

* Luc.11.g.47

29

End zegghet: Hadden wy t’onzer vaderen daghen gheweeßt, wy zolden ghewißlick hœre medeghezellen niet gheweeßt zijn an der Propheten bloed.

30

⁺Alzo betuyghet ghy dan ouer v zeluen ^* dat ghy kinders zijt der ghener die de Propheten ghedoodt hebben.

+ D

* Act.7.g.52 1.Thess.2.c.15

31

Wel an, veruullet oock ghy de mate uwer vaderen.

32

Ghy slanghen, aderen ghebroedsel, hoe zullet ghy entuliehen het gherichte der hellen?

33

^* Daerom zie, ick ^‡ zende tot v Propheten end Wijzen end Schriftgheleęrden, end der zeluer zommighe zullet ghy dooden end cruycighen, end der zeluer ^* zommighe zullet ghy gheęsselen in uwen Synagoghen, end zullet ze veruolghen van stad tot stad:

* Luc.11.g.49

‡ Matt 10.b.16 Luc.10.a.3 Ioan.16.a 2 Act.7.f.51 Hebr.11.g.35

* Act.5.g.41

34

Op dat ouer v komme all het gherechtigh bloed dat vergoten werdt op ærden, ^* van des gherechtighen Abels bloede an tot op ^‡ het bloed Zacharie des zoons Barachie, welcken ghy ghedoodt hebbet tusschen dem tempel end dem altaer.

* Genes.4.b.8 Hebr.11.a.4

‡ 2.Paral.24 f.22

35

Amen ick zeg v: dit alles zal kommen ouer dit gheslæchte.

[p. 45r]

36

^* Hierusalem Hierusalem, die du doodest de Propheten, end steęnighest die tot dy wtghezonden zijn: ^* hoe menighmael heb ick willen dyne kinders verzamelen, ghelijckerwijß eęn hinne hœre kiecxkens verzamelt onder de vlœghels: end ghy hebbet niet ghewolt?

* Luc.13.g.32

* 4.Esd.1.c.28

37

Zie, ^* uwe huyß werdt v woest verlaten.

* Psal.69.f.26 Act.1.d.20. Esa.1.b.7. Ierem.7.g.34 Mich.3.d.12

38

Want ick zeg v, Ghy zullet my van nu an niet zien, tot dat ghy zegghet: ^‡ Gheprezen zy die dar kommt in dem name des Heęren.

‡ Psa.118.d.26