Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xx.

1

VVAnt het kœningkrijck der hemelen is ghelijck eęnem mensche die eęn huyßheęr was, welcker des morghens zeęr vrough wtghingk, arbeyders te hueren in zynen wijngaerd.

2

Hy auer eęns gheworden mit den arbeyderen om eęnen penningk s’daghs, zand ze in zynen wijngaerd.

3

End wtghegaen omtrent der derder vren, zagh hy andere op dem marckt ledigh staen,

4

End zeyde tot hen: Gaet oock ghy hén in den wijngaerd, end ick zal v gheuen zo wat recht zal zijn. Zy auer ghinghen hén.

5

Wederom wtghegaen omtrent der

[p. 36v]

zester end neghender vren, dede hy deßghelijcken.

6

Auer omtrent der elfder vren wtghegaen, vand hy andere ledigh staen, end zegt tot hen: Wat staet ghy hier den ganschen dagh ledigh?

7

Zy zegghen tot hem: Om dat ons niemand ghehuert heeft. Hy zegt tot hen: Gaet oock ghy hén in den wijngaerd, end zo wat recht zijn zal, zullet ghy entfanghen.

8

Auer doe het auend gheworden was, zegt de heęr des wijngaerds tot zynem schaffnær: Roup de arbeyders, end betael hen den loon: beghinnende van den lesten tot den eęrsten.

9

⁺End doe ghekommen waren die omtrent der elfder vren [ghehuert waren] entfinghen zy eęn ieghelick eęnen penningk.

+ B

10

Auer de eęrsten ghekommen, meynden dat zy meęr entfanghen zolden: end zy entfinghen oock eęn ieghelijck eęnen penningk.

11

Doe zy auer dien entfinghen, murreden zy teghen den huyßheęr,

12

End zeyden: Deze lesten hebben eęn vre ghearbeyt, end du hebst ze euen ghelijck ghemaeckt mit ons, die dar ghedraghen hebben het last des daghs end de hitte.

13

Hy auer andwordde end zeyde tot hœrer eęnem: Uriend, ick doe dy gheęn onrecht: bist du niet mit my eęns gheworden om eęnen penningk?

14

Neem dat dijn is, end ga hén: ick will auer dezem lesten gheuen ghelijck als

[p. 37r]

oock dy.

15

^* Of is het my niet verorloft te doen dat ick will in dem mynen? Is dijn oogh booß, om dat ick goed bin?

* Rom.9.e.21

16

^* Alzo zullen de lesten, de eęrsten: end de eęrsten de lesten zijn. ^‡ Want vele zijn’der gheropen, weynigh auer wtuerkoren.

* Matt,19.d.30 Marc.10.e.31 Luc.13.f.28

‡ Mat 22.b 14

17

^* End Iesus ghingk hénop na Hierusalem, end namm de twælf leęrionghers byzonder mede op dem wegh, end zeyde tot hen:

* Matt.16.c.21 end .17.d.22 Marc.8.d.31 end .9.e.31. end .10.e.32. Luc.9.c.22 end .18.f.31. end .24.a.6

18

⁺Zie, wy gaen hénop na Hierusalem, end des menschen Zoon zal den Ouerpriesteren end den Schriftgheleęrden ouergheleuert werden: end zy zullen hem verdommen ten dood:

+ C

19

^* End zullen hem ouerleueren den Heydenen, dat hy bespott, end ghegheęsselt end ghecruycight werde: end ten derden daghe zal hy opstaen.

* Matt.27.a.2 Luc.23.a.1. Ioan.18.e.28 Act.3.c.13

20

^‡ Doe ghingk tot hem de moeder der zonen Zebedéi mit hœren zonen, end ⁺ viel voor hem neder, end begærde wat van hem.

‡ Marc.10.e.35

+ Gr. neyghde hem toe.

21

Hy auer zeyde tot hœr: Wat wilt du? Zy zegt tot hem: Zeg dat deze myne tweę zonen zitten in dynem kœningkrijcke de eęn dy ter rechter, end de ander ter lincker hand.

22

Iesus auer andwordde, end zeyde: ^* Ghy wetet niet wat ghy begæret. Konnet ghy den drinckbeker drincken dien ick drincken zal: end mit dem doop ghedoopt werden, ^* daer ick mede ghedoopt werde? Zy zegghen tot hem: Wy

* Rom.8.e.26

* Luc.12.g.50

[p. 37v]

konnen’t.

23

End hy zegt tot hen: Mynen drinckbeker zullet ghy wel drincken, end mit dem doop daer ick mede ghedoopt werde, zullet ghy ghedoopt werden: auer te zitten te myner rechter end ter lincker hand, is niet mijn te gheuen dan den ^* dien het bereydt is van mynem Uader.

* Matt.25.c.34

24

Doe auer de tien dit hoorden, namen zy het onwærdighlick van den tweęen ghebroederen.

25

⁺Iesus auer riep ze tot zick end zeyde: ^* Ghy wetet dat de Ouerheyden der Heydenen ouer de zelue, heęrschen, end de groote [heęren] hebben macht ouer de zelue:

+ D

* Marc.10.f.42 Luc.22.c.25

26

^* Auer alzo zal het niet zijn onder v: mer zo wie onder v will groot zijn, die zy uwe dienaer.

* 1.Pet.5.a.3

27

^‡ End zo wie onder v will de eęrste zijn, die zy uwe knecht.

‡ Luc,9.f.48 Matt.23.a.10

28

^* Ghelijckerwijß des menschen Zoon niet kommen is ghedient te werden, mer te dienen, ^‡ end zijn ziel te gheuen tot eęner randzoeninghe vœr menighe.

* Ioan.13.b.14. Philip.2.a.7

‡ Ephe.1.b.7 Colo.1.b.14 1.Timo.2.b.6

29

^* End doe zy van Hiericho hénwt toghen, volghde hem eęn groote schare na.

* mar.10.g.46 Luc.18.f.35

30

End zie, dar zaten tweę blinden an dem weghe, welcke ghehoort hebbende dat Iesus voorby ghingk, kreeschen wt end zeyden: Heęr die du bist eęn zoon Dauids, erbarm dy onzer.

31

De schare auer bestrafte ze dat zy zwijghen zolden. Zy auer kreeschen deß te meęr end zeyden: Heęr die du bist eęn zoon Dauids, erbarm dy onzer.

32

End Iesus stond still, end riep ze

[p. 38r]

end zeyde: Wat willet ghy dat ick v doe?

33

Zy zegghen tot hem: Heęr, dat onze ooghen gheopent werden.

34

Iesus auer mit hertgrondlicker barmhertigheyt beweeght, roerde hœre ooghen an, end van stonden an entfinghen hœre ooghen het ghezicht, end zy volghden hem na.