Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xix.

1

⁺ ENd het gheschiedde doe Iesus deze reden vollendt had, vertoogh hy wt Galiléa, end quam in de palen des Iœdschen lands ouer den Iordaen.

+ Marc.10.a.1

2

End hem volghden vele scharen na, end hy maeckte ze aldaer ghezond.

3

^* End tot hem quamen de Phariséers, hem verzouckende, end tot hem zegghende: Is het dem mensche verorloft eęn afscheyd te maken mit zynem wijue om allerley oorzake?

* Marc.10.a.2

4

Hy auer andwordde, end zeyde tot hen: Hebbet ghy niet ghelezen ^* dat die dar van beghinne [den mensch] maeckte, hy ze mann end wijf maeckte?

* Gen.1.d.17.

5

^* End zeyde: Hierom zal eęn mensch vader end moeder verlaten, end zynem wijue anklijuen: ^‡ end zy tweę zullen tot eęn vleęsch zijn.

* Gen.2.d.24 Ephes.5.g.31

‡ 1.cor.6.d.16

6

Zo zijn zy dan nu niet meęr tweę mer eęn vleesch. ^* Daerom wat God t’zamen ⁺ gheknocht heeft, dat scheyde gheęn mensch.

* 1.Cor.7.b.10

+ Gr. onder eęn iock ghezet

7

Zy zegghen tot hem: ^* Waerom heeft dan Moses beuolen eęnen afscheydbrief te gheuen, end zick van hœr te scheyden?

* Deut.24.a.1 Ierem.3.a.1

8

⁺Hy zegt tot hen: Moses heeft v toeghelaten te scheyden van uwen wijuen van uwer herthardigheyt weghen: van beghinne auer was het niet alzo.

+ B

[p. 35r]

9

^* Ick auer zeg v zo wie zick van zynem wijue afscheydet, ten zy om hoerery willen, end eęn ander trauwet, die doet echtbrekery. End wie de afghescheydene trauwet, die doet echtbrekery.

* Matt.5.e.23 Marc.10.a.11 Luc.16.d.18 1.Cor.7.b.10

10

Zyne leęrionghers zegghen tot hem: Staet de zake des menschen mit dem wijue alzo, zo is het niet nutt te trauwen.

11

Hy auer zeyde tot hen: ^* Dit word vaten alle menschen niet, mer die, den het ghegheuen is.

* Sap.8.d.21

12

Want dar zijn ghesnedenen, die van des moeders lijue alzo gheboren zijn: end dar zijn ghesnedenen, die van den menschen gesneden zijn: end dar zijn ghesnedenen, die zick zeluen ghesneden hebben om des kœningkrijcks der hemelen willen. Wie het vaten kann, die vate het.

13

^* Doe wurden hem kinderkens toeghebracht, dat hy de handen op ze legghen end bidden zolde: de leęrionghers auer bestraften ze.

* Marc.10.b.13 Luc.18.c.15

14

Iesus auer zeyde: ^* Latet de kinderkens, end verhinderet hen niet tot my te kommen: want zulcker is het kœningkrijck der hemelen.

* Matt.18.a.3 1.cor.14.d.20 1.Pet.2.a.2.

15

End hy leyde de hand op ze, end toogh van daer.

16

^+* End zie, eęn toeghegaen, zeyde tot hem: Goede leęrmeęster, wat goeds zal ick doen dat ick het eęwigh leuen hebbe?

+ C

* Marc.10.b.17 Luc.18.d.18

17

Hy auer zeyde tot hem: Wat heetst du my goed? Niemand is goed dan

[p. 35v]

eęn, naemlick God. Wilt du ten leuen ingaen, zo hold de gheboden.

18

Hy zegt tot hem: Welcke? Iesus auer zeyde, ^* deze: Du zalt niet doodslaen Du zalt niet echtbreken. Du zalt niet stelen. Du zalt niet valschlick tuyghen.

* Exod.20.c.13 Deut.5.b.17 Rom.13.c.9

19

Eęr dynen vader end moeder, end: ^* Du zalt lief hebben dynen naesten als dy zeluen.

* Leui.19.d.17 Matt.22.d.38 Marc.12.c.31 Gala.5.b.14 Iacob.2.b.8

20

De ionghelingk zegt tot hem: Dit heb ick alles gheholden van myner iongher iœghde op, wat fælt my noch?

21

Iesus zegt tot hem: ^‡ Wilt du volkommen zijn, zo ga hén, verkoop wat du hebst, end gheef het den armen, ^* end du zalt eęnen schatt im hemel hebben, end komm, volgh my na.

‡ Luc.12.e.33 end .16.c.9

* Matt.6.c.19 1.Tim.6.d.19

22

Doe auer de ionghelingk deze rede hoorde, ghingk hy drouuigh hén: want hy had ⁺ veel bezitts.

+ verkreghene goeders

23

Iesus auer zeyde tot zynen leęriongheren: Amen ick zeg v, ^* eęn rijcke zal zwaerlick in’t kœningkrijck der hemelen ingaen.

* Marc.10.d.23 Luc.18.e.24 Prou.11.d.28

24

⁺End wederom zeg ick v: het is lichter dat eęn ⁺ kabel door eęner naeldenoogh doorga, dan dat eęn rijcke in’t kœningkrijck Godes inga.

+ D

+ Of. kameel

25

Doe auer dit zyne leęrionghers hoorden, wurden zy zeęr verslaghen, end zeyden: Wie kan dan zaligh werden?

26

Iesus auer zagh ze an, end zeyde tot hen: By den menschen is dit onmoghelick, ^* by Gode auer is alle dingk moghelick.

* Iob.42.a.2 Zacha.8.a.6 Sap.11 d.20 Luc.1.d.33 end .18.e.27

27

^‡ Doe andwordde Petrus, end zeyde

‡ Matt.4.c.20 Marc.10.c.28 Luc.5.b.11 end .18.e.28

[p. 36r]

tot hem: Zie, wy hebben’t alles verlaten, end zijn dy nagheuolght, wat zal ons dan ghewerden?

28

Iesus auer zeyde tot hen: Amen ick zeg v dat ghy, die my zijt nagheuolght, in der wedergheboorte als des menschen Zoon zal zitten op dem throon zyner heęrlicheyt, ^* oock zitten zullet op twælf throonen, end richten de twælf gheslæchten Israels.

* Sap.3.b.8 Luc.22.c.30 Apoc.3.d.21

29

^* End zo wie verlatet huyzen, of broeders, of zusters, of vader, of moeder, of wijf, of kinders, of ackers om mijns naems willen ^* die zal’t honderdfoldigh entfanghen, end het eęwigh leuen beæruen.

* Deu.33.b.9

* Iob.42.d.12

30

^* Auer vele eęrsten zullen de lesten zijn: end de lesten, de eęrsten.

* Matt.20.b.16 Marc.10.e.31 Luc.13.f.28