Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xvi.

1

⁺ ENd de Phariséers end de Sadducéers quamen tot hem: end verzouckende begærden van hem dat hy hen eęn teęken wt den hemel vertoonde.

+ Matt.12.c.39 Marc.8.b.11 Luc.11.d.29 Ioan.6.d.30

2

Hy auer andwordende zeyde tot hen: ^* Wanneęr het auend gheworden is, zegghet ghy: Schoon gheweder [zal’t zijn]: want de hemel is vuerrood.

* Luc.12.g.54

3

End des morghens [zegghet ghy]: Huyden ongheweder [zal’t zijn]: want de hemel is vuerrood end drouuigh. Ghy Huychlaers, des hemels ghestalteniß wetet ghy wel t’onderscheyden, konnet ghy oock de teękens der tijden niet [onderscheyden]?

4

^* Het booß end echtbrekigh gheslæchte zouckt eęn teęken: end hem zal gheęn teęken ghegheuen werden, dan het teę-

* Matt.12.c.39

[p. 29v]

ken des Propheten ^* Ione. End hy verliet ze, ende ghingk hén.

* Ione.2.a.2.

5

^* End zyne leęrionghers hénouer gheuaren, hadden vergheten brooden [mede] te nemen.

* Marc.8.b.14 Luc.12.a.1

6

Iesus auer zeyde tot hen: Ziet toe, end hoedet v voor den heuel der Phariséeren end Sadducéeren.

7

End zy ouerleyden by zick zeluen, end zeyden: Wy hebben gheęne brooden [mede] ghenomen.

8

D’welck Iesus bekent hebbende, zeyde tot hen: Wat ouerlegghet ghy by v zeluen ghy kleyngheloouighen, dat ghy gheęne brooden hebbet [mede] ghenomen?

9

^+* Uerstaet ghy noch niet, end zijt ghy niet indachtigh der vijf brooden der vijf duyzenden, end hoe vele koruen ghy opnamet?

+ B

* Matt.14.b.17 Marc 6.c.18 Luc.9.b.13 Ioan.6.a.9

10

^‡ Noch der zeuen brooden der vier duyzenden, end hoe vele koruen ghy opnamet?

‡ Matt.15.d.34.

11

Hoe verstaet ghy niet dat ick v dat niet zeyde vam broode dat hoedet v voor den heuel der Phariséeren end Sadducéeren.

12

Doe verstonden zy dat hy niet ghezegt had dat zy zick hoeden zolden voor den heuel des broods, mer voor der leęre der Phariséeren end Sadducéeren.

13

^* Iesus auer ghekommen in de landdeęlen Cesarea Philippi, vraeghde zyne leęrionghers end zeyde: Wie zegghen de menschen dat ick zy, die dar des menschen Zoon bin?

* Marc.8.c.27 Luc.9.c.18.

[p. 30r]

14

Zy auer zeyden: ^* Zommighe, Ioannes de Dooper: andere, Helias: andere, Hieremias, of der Propheten eęn.

* Matt.14.a.2

15

Hy zegt tot hen: Ghy auer, wie zegghet ghy dat ick zy?

16

Simon Petrus auer andwordde end zeyde: ^* Du bist ⁺ de Ghezalfde, ⁺ de Zoon des leuendighen Godes.

* Ioan.6.g.69

+ Of. Christus

+ C

17

End Iesus andwordende zeyde tot hem: Gheluckzaligh bist du Simon BarIona: want vleęsch end bloed heeft het dy niet ontdeckt ^* mer mijn Uader die in den hemelen is.

* Matt.11.d.25

18

Oock zeg ick dy: ^* du bist Petrus, ^‡ end op deze steęnrootß zal ick bauwen mijn Ghemeynte: ^* end de poorten der hellen zullen ze niet ouerweldighen.

* Ioa.1.f.42

‡ Esa 28.d.16 1.Corin.3.c.11

* Esa.33.d.20

19

^* End dy zal ick des kœningkrijcks der hemelen slœtels gheuen: end alles wat du op ærden binden zalt, zal in den hemelen ghebonden zijn: end alles wat du op ærden ontbinden zalt, zal in den hemelen ontbonden zijn.

* Matt.18.c.18 Ioan.20.e.23

20

Doe verbood hy zynen leęriongheren dat zy niemanden zegghen zolden dat hy Iesus ⁺ de Ghezalfde ware.

+ Of Christus.

21

^* Uan dier tijd an began Iesus zynen leęriongheren te kennen te gheuen, dat hy na Hierusalem hén moest gaen end veel lijden van den Olderlinghen end Ouerpriesteren, end Schriftgheleęrden, end ghedoodt, end ten derden daghe opgheweckt werden.

* Matt.17.d.22 end .20.b.18 Marc.8.d.31. end .9.e.31. end 10.e.33. Luc.9.c.22. end .18.f.31. end .24.a.6

[p. 30v]

22

⁺End Petrus nam hem tot zick, end begann hem te straffen, zeggende: Heęr [zy] dy ghenadigh: dit zal dy gheęnßins gheschiehen.

+ D

23

Hy auer omghewendt, zeyde tot Petro: Maeck dy achter my Satan: ^* du bist my eęn hinderniß: want du verzinnst niet wat Godes is, mer wat der menschen is.

* 2.Sa.19.d 22

24

Doe zeyde Iesus tot zynen leęriongheren: ^* Zo iemand na my wilt kommen, die verloochene zick zeluen, end neme zijn cruys op, end volghe my na.

* Matt.10.d.38 Marc.8.d.34 Luc.9.c.24 end .14.f.27

25

^‡ Want zo wie zijn ziel wil beholden, die zal ze verliezen: zo wie auer zijn ziel verliezet om mynent willen, die zal ze vinden.

‡ Matt.10.d.39 Marc.8.d.35 Luc.9.c.24 end .17.g.33 Ioan.12.d.25

26

Want wat batet den mensche dat hy de gansche wæreld wonne, end schade lede an zyner zielen? ^* Of, wat zal de mensch gheuen waermit hy zijn ziel weder losse?

* Psal.49.b.9 Marc.8.d.37

27

^* Want des menschen Zoon zal in zijns Uaders heęrlicheyt kommen mit zynen Enghelen: ^‡ end alsdan zal hy verghelden eęnen ieghelicken na zyner werckinghe.

* Matt.24.c.30 end .25.c.31. end .26.f.63

‡ Psal.62.d.13 Iere.32.c.19 Rom.2.a.6 end .14.c.12 2.Cor.5.b.10 Gala.6.a.5

28

^* Amen ick zeg v, hier staen’der zommighe die den dood gheęnßinns smaken zullen, tot dat zy zien kommen des menschen Zoon in zynen kœningkrijcke.

* Marc.9.a.1 Luc.9.d.27