Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiiij.

1

⁺ TEr dier tijd hoorde Herodes de vieruorst het gheruchte van Iesu:

+ Marc.6.b.15 Luc.9.a.7

2

End zeyde tot zynen knechten: Deze is Ioannes de Dooper: hy is van den dooden opgheweckt, end daerom wercken krachtlick in hem de krachtighe daden.

3

^* Want Herodes had Ioannem gheuanghen end ghebonden, end hem in de gheuanghenisse ghelegt, van weghen Heriodaß zijns broeders Philippi wijf.

* Marc.6.c.18 Luc.3.d.19

4

Want Ioannes had tot hem ghezegt: ^* Het is dy niet verorloft dat du ze hebbest.

* Leui.18.c.20

5

End als hy hem wolde dooden, entzagh hy zick voor den volcke: ^* om dat zy hem hielden voor eęnen Propheet.

* Matt.21.c.26 Marc.6.c.21

6

^* Doe auer Herodis gheboortendagh gheholden ward, danste Herodiaß dochter in d’midden: end het beuiel Herodi wel.

* Marc.6.c.22 Gen.40.d.20

7

Daerom beloofde hy hœr ^* mit eęnen eęde te gheuen zo wat zy begærde.

* Iudic.11.f.30

8

Zy auer te voren van hœrer moeder ⁺ toeghestoockt, zeyde: Gheef my hær in eęner schotel het hoofd Ioannis des Doopers.

+ Of. toeghedronghen.

9

End de Kœningk ward bedrouft, nochtans om der eęden willen, end der ghener die t’zamen ⁺ anzaten, beual hy dat men’t hœr gaue.

+ Gr. anlaghen

10

End hén gheschickt hebbende, onthoofde Ioannem in der gheuanghenisse.

[p. 26r]

11

⁺End zijn hoofd ward hær ghedraghen in eęner schotel, end den dochterken ghegheuen: end zy bracht het hœrer moeder.

+ B

12

End zyne leęrionghers toeghekommen, namen het lichaem wegh, end begrouuen’t: end hén ghegaen boodschapten’t Iesu.

13

^* End doe Iesus dit hoorde, entweeck hy van daer te schepe tot eęn woeste plaetß byzonder. End doe dit de scharen hoorden, volghden zy hem na te voete wt den steden.

* Marc.6.e.23 Luc.91.b.10

14

^* End Iesus hærwt ghegaen, zagh eęn groote schare, end hem iammerde hertgrondlick der zeluer, end heylde hœre krancken.

* Ioan.6.a.5

15

Auer doe het auend gheworden was ghinghen zyne leęrionghers tot hem, end zeyden: De plaetß is woest, end de vre is nu voorby ghegaen: laet de scharen van dy, dat zy hén gaen tot den vlecken, end zick spijß koopen.

16

Iesus auer zeyde tot hen: Het is hen niet noodigh dat zy hén gaen: ^* Gheuet ghy hen te eten.

* Marc.6.e.37 Luc.9.b.13

17

End zy zegghen tot hem: ^‡ Wy hebben hier niet meęr dan vijf brooden, end tweę visschen.

‡ Ioan.6.a.9

18

Hy auer zeyde: Bringhet my die hær.

19

End beual dat de scharen op’t graß neder zaten: end doe hy de vijf brooden end de tweę visschen ghenomen had, zagh hy op na den hemel ^* end zeyde lof: End brack de brooden, end gaf ze

* 1.Sam.9 b.13

[p. 26v]

den leęriongheren: ⁺ de leęrionghers auer den scharen.

+ C

20

End zy aten alle, end wurden verzaedt: end zy namen het ouerschot der brocken op, twælf koruen voll.

21

Die auer gheéten hadden, waren by vijfduyzend mannen, behaluen vrauwen end kinders.

22

^* End terstond dwang Iesus zyne leęrionghers in’t schip in te gaen, end voor hem hénouer te varen, tot dat hy de scharen van zick liete.

* Marc.6.f.45 Ioan.6.b.17

23

^* End doe hy de scharen van zick ghelaten had, klamm hy byzonder op den bergh om te bidden: auer doe het auend was gheworden, was hy aldaer alleęne.

* Marc.6.f.46 Ioan.6.b.15

24

Het schip auer was nu midden in der zeę, end leedt nood van den goluen: want het was teghenwind.

25

Auer in der vierder nachtwake ghingk Iesus hén tot hen end wandelde op de zeę.

26

End doe zyne leęrionghers hem op de zeę zaghen wandelen, verschrickten zy end zeyden: Het is eęn spoockghezicht: end kreeschen wt van vreęze.

27

Iesus auer sprack van stonden an tot hen, end zeyde: Zijt wel ghemoedt, ick bin’t, vreęzet niet.

28

⁺Petrus auer andwordde end zeyde tot hem: Heęr, bist du het, zo heet my tot dy kommen op den wateren.

+ D

29

End hy zeyde: Komm hær. End Petrus afghetreden wt den schepe, wandelde op den wateren, dat hy tot Iesu quame.

30

Doe hy auer eęnen stærcken wind

[p. 27r]

zagh, vreęßde hy: end doe hy begann neder te zincken, kreesch hy wt end zeyde: Heęr, behold my.

31

Iesus auer van stonden an de hand wtghestreckt hebbende, greep hem an: end zegt tot hem: Du kleyngheloouigher, waerom hebst du ghewanckelt?

32

End doe zy in’t schip ghetreden waren, stillde zick de wind.

33

Die auer in’t schip waren, quamen end ⁺ vielen voor hem neder end zeyden: Du bist waerachtlick Godes Zoon.

+ Gr. neyghden hem toe

34

^* End doe zy hénouer ghescheept waren, quamen zy in d’land Gennezareth:

* Marc.6.g.54

35

End doe de mannen der zeluer plaetsen hem kenden, schickten zy wt in dat gansche omligghende landbegrijp: end brachten alle krancken tot hem:

36

End baden hem dat zy alleęnlick zijns kleęds zoom anroerden: end alle die dar anroerden, wurden ghezond.