Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xj.

1

ENd het gheschiedde doe Iesus volendt had te beuelen zynen twælf leęriongheren, gingk hy van daer voord

[p. 18r]

te leęren end te prediken in hœren steden.

2

^* Doe auer Ioannes in der gheuangenisse hoorde de daden Christi, zand hy tweę zyner leęriongeren wt, end zeyde tot hem:

* Luc.7.c.19

3

Bist du die dar kommen zolde, of verwachten wy eęnen anderen?

4

End Iesus andwordende zeyde tot hen: Gaet hén, end boodschappet Ioanni wat gy hooret end ziet:

5

^* De blinden zien, end de krœpelen wandelen: de melaetschen werden gereynight, end de doouen hooren, de dooden werden opgheweckt, end de armen werden gheeuangelizeert.

* Esa.29.f.18 end .35.b.5 end .61.a.1

6

End gheluckzaligh is die an my niet gheærghert zal werden.

7

^* Doe auer deze hénwegh ghinghen, begann Iesus te zeggen tot den scharen van Ioanne: Wat zijt ghy hénwt ghegaen in de woestijne te beschauwen? eęnen riethalm vam winde beweeght?

* Luc.7.d.24

8

⁺Of wat zijt ghy hénwt ghegaen te zien? Eęnen mensch mit zachten kleęderen bekleędt? Zie, die zachte kleęders draghen, zijn in der kœninghen huyzen.

+ B

9

Mer wat zijt ghy hénwt ghegaen te zien? eęnen Propheet? Ghewißlick: ick zeg v, oock meęrder dan eęn Propheet.

10

Want deze is het van welcken gheschreuen is: ^* Zie, ick zende mynen Enghel hénwt voor dynen anghezichte, die dynen wegh voor dy toebereyden zal.

* Mala.3.a.1 Marc.1.a.2 Luc.7.d.27

11

Amen ick zeg v: onder [allen] die van

[p. 18v]

vrauwen gheboren zijn, is’er geęn grooter opghestaen dan Ioannes de Dooper: nochtans die kleyner is in den kœningkrijcke der hemelen, is grooter dan hy.

12

^* Auer van den daghen Ioannis des Doopers an, tot nu toe lijdt het kœningkrijck der hemelen gheweld, end de gheweldighen grijpen’t in.

* Luc.16.d.16

13

Want alle de Propheten end de Wet hebben ghepropheteert tot op Ioannem:

14

^* End zo ghij’t willet annemen, hy is Helias die dar toekomstigh was.

* Mala.4.b.5 Marc.9.b.13 Luc.1.b.13

15

Wie ooren heeft te hooren, die hoore.

16

^* Wien zal ick auer dit gheslæchte verghelijcken? Het is den kinderkens ghelijck, die op de marckten zitten, end hœren ghezellen toeroupen, end zegghen:

* Luc.7.e.31.

17

⁺Wy hebben v ghepepen, end ghy hebbet niet ghedanst: wy hebben v klaeghlieden ghezonghen, end ghy hebbet niet gheweęnt.

+ C

18

^* want Ioannes is kommen, noch etende noch drinckende, end zy zegghen: Hy heeft eęnen duuel.

* Matt.3.a.4 Marc.1.a.6

19

Des menschen Zoon is kommen, etende end drinckende, end zy zegghen: Zie, eęn vratigh mensch end eęn wijnzuyper, der tollenaren end zondaren vriend. End de wijßheyt is gherechtuærdight van hœren kinderen.

20

^* Doe began hy den steden schærplick te verwijten, in welcken zeęr vele zyne krachtighe daden gheschiedt waren, dat zy gheęn ghemoedbetering gedaen hadden

* Luc.10.c.13

[p. 19r]

21

Weę dy Chorazin: weę dy Bethsaidan: Want hadden in der stad Tyri end Sidons de krachtighe daden ghedaen gheweeßt die in v ghedaen zijn, zy zolden voortijden in zack end assche ghemoedbetering ghedaen hebben.

22

Doch ick zeg v: het zal Tyro end Sidon verdraghlicker zijn in den daghe des gherichtes, dan v.

23

⁺End du Capernaum, die du verheuen waerst tot an den hemel, du zalt tot in de helle hénaf ghestooten werden: Want hadden in ^* Sodoma de krachtighe daden ghedaen gheweeßt die in dy ghedaen zijn, zy waren ghebleuen tot op den huydighen dagh.

+ D

* Gene.19.e.24 Ezech.16.f.49

24

Doch ick zeg v, het zal den Sodomitischen lande verdraghlicker zijn in den daghe des gherichtes, dan dy.

25

^* Ter dier tijd andwordde Iesus, end zeide: Ick belijde dy, Uader, Heęr des hemels end der ærden, dat du deze dinghen den ^* wijzen end verstandighen verborghen, end de zelue den kindischen ontdeckt hebst.

* Luc.10.d.21

* Iob.5.b.12 Esa.29.e.14 Luc.10.d.21 1.Cor.1.c.19 end .2.b.7

26

Ia, Uader, want het is alzo welgheualligh gheweeßt voor dy.

27

^* Alle dingk is my ouerghegheuen van mynen Uader: ^‡ end niemand kent den Zoon, dan de Uader: end oock niemand kennt den Uader, dan de Zoon, end zo wien het de Zoon will ontdecken.

* Mat.28.d.18 Luc.10.d.22 Ioan.3.d.35

‡ Ioa.6.e.46 end .7.d.29. end .8.c.19. end 10.c.15

28

Kommet hær tot my alle die dar arbeydet end belast zijt, end ick zal v verquicken.

29

Nemet mijn iock op v, end leęrnet van my dat ick zachtmoedigh bin end

[p. 19v]

ootmoedigh van herten: ^* end ghy zullet verquicking vinden uwen zielen.

* Iere.6.d.16

30

^* Want mijn iock is lieflick, end mijn last is licht.

* 1.Ioan.5.a.3