Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

ENd in’t schip getreden, voer hy hén ouer, end quam in zijn eyghen stad.

2

^* End zie, men bracht tot hem eęnen ghichtighen die op eęnen bedde lagh: end doe Iesus hœr ghelooue zagh, zeyde hy tot den ghichtighen: Zy wel ghemoedt zoon, dyne zonden werden dy quijtghelaten.

* Marc.2.a.3 Luc.5.d.18 Ioan.5.a.5 Act.9.f.33

3

End zie, zommighe onder den Schriftgheleęrden zeyden by zick zeluen: ^* Deze lastert God.

* Iob.14.a.4 Psal.32.b.5. Esa.43.d.25

4

End doe Iesus hœre ghedachten zagh, zeyde hy: Waerom dencket ghy

[p. 14r]

booß in uwen herten?

5

Want welck is lichter te zegghen: Dy werden de zonden quijtghelaten: of te zegghen: Sta op, end wandel?

6

Op dat ghy auer wetet dat des menschen Zoon macht hebbe op ærden de zonden quijt te laten (zo zegt hy tot den ghichtighen,) Sta op, end neem dijn bedde op, end ga hén in dijn huyß.

7

End hy opghestaen, ghingk hén in zijn huyß.

8

Doe auer de scharen dit ghezien hadden, verwonderden zy zick, end prezen God, die zulckerley macht den menschen ghegheuen had.

9

^‡ End Iesus van daer voorby ghegaen, zagh eęnen mensch an den tolhuyze zitten, gheheeten Mattheus, end zegt tot hem: Uolg my na. End hy stond op, end volghde hem na.

‡ Marc.2.b.14 Luc.5.e.27

10

⁺End het gheschiedde, doe Iesus [ten dissche] ⁺ anzat in den huyze, zie, vele tollenaers end zondaers ghekommen, zaten t’zamen an mit Iesu end zynen leęriongheren.

+ B

+ Gr. anlagh

11

D’welck de Phariséers ghezien hebbende, zeyden tot zynen leęriongheren: waerom eett uwe leęrmeęster mit den tollenaren end zondaren?

12

Doe auer Iesus dat hoorde, zeyde hy tot hen: Die stærck zijn, behouuen des medicijnmeęsters niet, mer die kranck zijn.

13

Gaet auer hén, end leęrnet wat het zy: ^* Ick will barmhertigheyt, end niet offer. ^‡ Want ick bin niet kommen de

* Osee.6.c.6 Mich.6.b.8 Matth.12.a.7

‡ Marc.2.c.17 Luc.5.f.32 end .19.b.10 1.Timo.1.c.15

[p. 14v]

gherechtighen te roupen, mer de zondaers ter ghemoedbeteringhe.

14

^* Doe ghinghen de leęrionghers Ioannis tot hem, end zeyden: Waerom vasten wy end de Phariséers zo veel, dyne leerionghers auer vasten niet?

* Marc.2.c.18 Luc.5.f.33

15

End Iesus zeyde tot hen: ^‡ Konnen oock der bruyloft zoons trœrigh zijn zo lang de Bruydegom by hen is? De daghen auer zullen kommen wanneęr de Bruydegom van hen afghenomen zal werden, end dan zullen zy vasten.

‡ Esa.62.b,5 2.Cor.11.a.2

16

Niemand zett eęnen lap rauwen lakens op eęn old kleęd: want de lap des zeluen neemt [wat] van den kleęde af, end de schœre werdt ærgher.

17

^* Men doet oock gheęnen nieuwen wijn in olde lederzacken: anders zo bærsten de lederzacken, end de wijn werdt wtghestortt, end de lederzacken verdæruen: mer men doet den nieuwen wijn in nieuwe lederzacken, end zy werden beyde t’zamen beholden.

* Sap.1.a.4 Act.2.a.4

18

^+* Doe hy deze dinghen mit hen sprack, zie, dar quam eęn Ouerste, end ⁺ viel voor hem neder, zegghende: Mijn dochter is nu ghestoruen, mer komm, end leg dijn hand op ze, end zy zal leuen.

+ C

* Marc.5.b.22 Luc.8.f.41

+ Gr. neyghde hem toe

19

End Iesus opghestaen, volghde hem na, end zyne leęrionghers.

20

^* (End zie, eęn vrauw die twælf iaren lang ^‡ bloedganghigh gheweeßt had, van achter byghekommen, roerde zijns kleęds zoom an.

* Marc.5.c.25 Luc.8.f.43

‡ Leui.15.c.25

21

Want zy had by hœr zeluen ghezegt: Zo ick alleęnlick zijn kleęd anroere,

[p. 15r]

ick zal ghezond werden.

22

Iesus auer wand zick om, end doe hy ze zagh, zeyde hy: Zy wel ghemoedt, dochter, dijn ghelooue heeft dy beholden. End van dier vren an ward de vrauw ghezond.)

23

^* End doe Iesus in des Ouersten huyß kommen was, end zagh de pijpers end de woelende schare, zeyde hy tot hen:

* Marc.5.d.38 Luc.8.g.51

24

Wijcket: want het dochterken is niet dood, mer het ^* slaept. End zy belachtden hem.

* Ioan.11.b.11

25

Als auer de schare hærwt ghedreuen was, ghingk hy hénin, end namm het by der hand: end het dochterken stond op.

26

End dit gheruchte ghingk wt ouer dat gansche land.

27

End doe Iesus van daer voorby ghingk, volghden hem tweę blinden na, roupende end zegghende: Du Zoon Dauids, erbarm dy onzer.

28

⁺End doe hy in huyß kommen was, ghinghen de blinden tot hem: End Iesus zegt tot hen: Gheloouet ghy dat ick dit doen kan? Zy zegghen tot hem: Ia, Heęr.

+ D

29

Doe roerde hy hœre ooghen an, end zeyde: U gheschiehe na uwen ghelooue.

30

End hœre ooghen wurden gheopent: ^* end Iesus verbood hen dreyghelick, end zeyde: Ziet toe dat het niemand wete.

* Matt.12.b.16 Luc.5.c.14

31

Zy auer hénwegh ghegaen, ^* maeckten hem ruchtbaer ouer dat gansche land.

* Marc.7.d.36

32

^* Doe zy auer hénwt ghinghen, zie, zo bracht men tot hem eęnen stommen be-

* Mat.12.b.22 Luc.11.b.14

[p. 15v]

zetenen mensch.

33

End doe de duuel was wtgheworpen, sprack de stomme: end de scharen verwonderden zick, end zeyden: Zulcks verscheen noyt in Israel.

34

De Phariséers auer zeyden: ^* Hy wærpt de duuels wt door der duuelen ouersten.

* Mat 12.b.24 Marc.3.c.22 Luc.11.b.15

35

^‡ End Iesus ghingk alle de steden end de vlecken omhær, leęrende in hœren Synagoghen, end predikende het Euangelium des Kœningkrijcks, end heylende allerley zieckte end allerley quale onder t’volck.

‡ Marc.6.a.6 Luc.13.e.20

36

^* Doe hy auer de scharen ghezien had, iammerde hem hœrer hertgrondlick, om dat zy ontbonden end verworpen waren als ^* schapen die gheęnen hærder hebben.

* Marc.6.e.34

* Iere.23.a.1 Ezech 34.a.2

37

Doe zeyde hy tot zynen leęriongheren, ^‡ De ooghst is wel groot, auer weynigh zijn de arbeyders.

‡ Luc.10.a.2 Ioan.4 e.35

38

^* Daerom biddet den Heęr des ooghsts dat hy arbeiders in zynen ooghst ⁺ wtstoote.

* 2.Thes.3.a.1

+ Of, wtzende