Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.viij.

[p. 12r]

1

DOe hy auer van den berghe hæraf ghegaen was, volghden hem vele scharen na.

2

^* End zie, dar quam eęn melaetsch, end ⁺ bad hem an, zegghende: Heęr, zo du wilt, kanst du my reynighen.

* Marc.1.d,40 Luc.5 c.12

+ Of, neyghde hem toe

3

End Iesus de hand wtghestreckt hebbende, roerde hem an, end zeyde: Ick wil, zy ghereynight. End van stonden an ward zijn melaetscheyt ghereynight.

4

End Iesus zegt tot hem: Zie toe dat du het niemanden zegghest: mer ga hén, vertoon dy zeluen den Priester, end offer de gaue ^* die Moses verordent heeft, hen tot ghetuyghniß.

* Leui.13.a.2 end .14.a.2

5

^* Doe auer Iesus hénin ghegaen was te Capernaum, ghingk eęn Honderdhoofdmann tot hem, hem biddende,

* Luc.7.a.1

6

End zegghende: Heęr, mijn knecht ligt t’huyß ghichtigh, zwaerlick ghepijnight.

7

End Iesus zegt tot hem: Ick zal kommen end hem ghezond maken.

8

End de Honderdhoofdmann andwordde end zeyde: Heęr, ick bin niet bequaem dat du onder mijn dack hénin gaest: ^* mer spreeck ⁺ eęn eęnlick word, end mijn knecht zal ghezond werden.

* Psal.107.b.20 Sap.16.b.12

+ Of, alleęnlick eęn word

9

⁺Want oock ick bin eęn mensch onder [eęns anders] macht, hebbende onder my krijghsknechten, end ick zeg tot dezen: Ga hén, end hy gaet: end tot den anderen, Komm hær, end hy kommt: end tot mynen knecht, Doe dit, end hy doet het.

+ B

10

Doe auer Iesus dit ghehoort had, verwonderde hy zick, end zeyde tot den

[p. 12v]

die hem nauolghden: Amen ick zeg v, zo grooten ghelooue heb ick ia in Israel niet vonden.

11

^* Auer ick zeg v, dat’ter vele kommen zullen vam Oosten end Westen, end mit Abraham end Isaac end Iacob im kœningkrijcke der hemelen anzitten:

* Esa.41.f.25 Luc.13.f.27

12

^* Auer de kinders des kœningkrijcks zullen hénwt gheworpen werden in de wterste duysterniß: ^* daer zal zijn gheweęn end tanden knærsseling.

* 4.Esd.1.c.24 Mat.21.d.43

* Mat.13.f.42 end .22.b.13. end 24.d.51. end 25 c.30 Luc.13.f.26

13

End Iesus zeyde tot den Honderdhoofdman: Ga hén, end dy gheschiehe als du ghelooft hebst. End zijn knecht ward ter zeluer vren ghezond.

14

^* End Iesus ghekommen in’t huyß Petri, zagh des zeluen wijfs moeder [te bedde] ligghen, end kortszuchtigh.

* Marc.1.c.29 Luc.4.f.38

15

End roerde hœr hand an, end de kortß verliet ze, end zy stond op, end diende hen.

16

^* Auer als het nu auend gheworden was, bracht men vele bezetenen tot hem, end hy warp de gheęsten wt mit den worde, end heylde alle krancken:

* Marc.1.c.32 Luc.4.g.40

17

⁺Op dat veruult wurde dat dar ghezegt was door den Propheet Esaiam, die dar spreeckt: ^* Hy heeft onze zwackheyden [op zick] ghenomen, end onze zieckten ghedraghen.

+ C

* Esa.53.a.4 1.Pet.2.d.24

18

Doe auer Iesus vele scharen rond om zick zagh, hiet hy ze hénouer varen.

19

^* End eęn Schriftgheleęrder bygekommen, zeyde tot hem: Leęrmeęster, ick zal dy volghen waer du oock hén gaest.

* Luc.9.g.57

[p. 13r]

20

End Iesus zegt tot hem: De vossen hebben holen, end de voghels des hemels nesten: auer des menschen Zoon heeft niet waer hy t’hoofd nederlegghe.

21

Auer eęn ander zyner leęriongheren zeyde tot hem: Heęr, verorlof my dat ick eęrst hén ga, end mynen vader begraue.

22

Iesus auer zeyde tot hem: Uolg du my na, end laet ^* de dooden hœre dooden begrauen.

* Leuit.21.b.11

23

^* End als hy in’t schip inghetreden was, volghden hem zyne leęrionghers na:

* Marc.4.d.34 Luc.8.c.22

24

End zie, dar ward eęn groot stormm in der zeę, alzo dat het schip mit goluen bedeckt ward: hy auer sliep.

25

End zyne leęrionghers byghekommen, weckten hem op, end zeyden: Heęr, behold ons, wy vergaen.

26

End hy zegt tot hen: Wat zijt ghy versaeght, ghy kleyngheloouighen? Doe stond hy op, ^* end bestrafte de winden end de zeę: end dar ward eęn groote stilheyt.

* Iob.26.c.8 Psal.107.c.25 Esa.51.d.20

27

⁺De menschen auer verwonderden zick, zegghende: Wat is deze vœr eęn, dat hem oock de winden end de zeę ghehoorzaem zijn?

+ D

28

^* End doe hy hénouer ghekommen was in d’landbegrijp der Gergeseneren, entmoetden hem tweę bezetenen, wt den grafsteęnen kommende, zeęr wreęd, alzo dat niemand konde ouer dien wegh voorby gaen.

* Marc.5.a.1. Luc.8.d.26

29

End zie, zy kreeschen, zegghende:

[p. 13v]

⁺ Wat is ons end dy Iesu Zoon Godes? bist du hær kommen ons te pijnighen eęr het tijd is?

+ Of. wat hebben wy mit dy te doen

30

Dar was auer verr van hen eęn kudde veler zwijnen dat dar weydde.

31

De duuels auer baden hem, zegghende, Zo du ons wtwærpst, zo verorlof ons in het kudde zwijnen te varen.

32

End hy zegt tot hen: Uaret hén. Zy auer wtgheuaren, voeren in het kudde zwijnen. End zie, het gansche kudde zwijnen ward mit eęnen stormm van bouen af in de zeę ghedreuen, end zy storuen in den wateren.

33

De hærders auer vlohen wegh: end in de stad ghekommen, boodschapten alle dinghen, end wat den bezetenen gheschiedt was.

34

End zie, de gansche stad ghingk hærwt Iesu enteghen: end doe zy hem zagen, ^* baden zy dat hy vertrecken wolde van hœren palen.

* Act.16.g.39