Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

DOe ^‡ ward Iesus van den Gheęste in de woestijne gheuoert, op dat hy van den duuel verzocht wurde.

‡ Marc.1.b.12 Luc.4.a.1

2

End doe hy ^* viertigh daghen end viertigh nachten gheuast had, ten lesten hongherde hem.

* Ex.34.d.28 1.Reg.19.b.8

3

End de verzoucker tot hem ghetreden, zeyde: Bist du Godes Zoon, zo zeg dat deze steęnen brooden werden.

4

Hy auer andwordde end zeyde: Dar is gheschreuen: ^* De mensch zal niet van den broode alleęne leuen, mer van allen worde dat door den mond Godes wtgaet.

* Deut.8.a.3. end 32 g 47. Sap.16.d.26

[p. 5r]

5

Doe nam hem de duuel mede in de heylighe Stad, end stelt hem op de tinne des tempels.

6

End zegt tot hem: Bist du Godes Zoon, zo wærp dy zeluen hénaf: want dar is gheschreuen: ^* Hy zal zynen Enghelen van dy beuel gheuen, end zy zullen dy op den handen draghen: op dat du dynen voet te gheęner tijd an eęnighen steęn stootest.

* Psal.91.b.12

7

Iesus zeyde tot hem: Wederom is gheschreuen: ^* Du zalt den Heęr dynen God niet verzoucken.

* Deut.6.c.16

8

Wederom neemt hem de duuel mede op eęnen zeęr hooghen bergh, end toont hem alle kœningkrijcken der wæreld, end hœre heęrlicheyt:

9

End zegt tot hem: Dit alles zal ick dy gheuen, zo du nederuallest end my anbiddest.

10

Doe zeyde Iesus tot hem: Maeck dy wegh Satan, want dar is gheschreuen: ^* Du zalt den Heęr dynen God anbidden, end hem alleęne ⁺ dienen.

* Deut.6.b.13 end 10.d.20 1.Sam.7.a.3

+ Of, vereęren

11

Doe verliet hem de duuel: end zie de Engels quamen toe end dienden hem.

12

^* Doe auer Iesus ghehoort had dat Ioannes ouergheleuert was, entweeck hy in Galiléam:

* Marc.1.b.14 Luc.4.b.14 Ioan.4.f.43

13

End Nazareth verlaten hebbende, ^* ghingk hy wonen te Capernaum, die dar ligt by der zeę in den palen Zabulon end Nephthalim:

* Luc.4.e.31

14

Op dat veruult wurde dat dar ghezegt was door den Propheet Esaiam, die dar spreeckt:

[p. 5v]

15

^* Het land Zabulon end het land Nephthalim [am] weghe der zeę, ouer den Iordaen, Galiléa der Heydenen.

* Esa.9.a.1

16

Het volck dat in duysternisse zat, heeft eęn groot licht ghezien: end die dar zaten im landbegrijp end schaduwe des doods, hen is eęn licht opghegaen.

17

^* Uan dier tijd an begann Iesus te prediken end te zegghen ^‡ Doet gemoedbetering, want het kœningkrijck der hemelen is naby kommen.

* Marc.1.b.15

‡ Matt.3.a.2

18

^* Iesus auer wandelende by den Galileeschen meer, zagh tweę ghebroeders, Simon die dar gheheeten werdt Petrus, end Andréam zynen broeder, het nett in d’meer wærpen, (want zy waren visschers.)

* Marc.1.b.16 Luc.5.a.1

19

End zegt tot hen: Kommet hær na my, end ick zal v tot ^* menschen visschers maken.

* Iere.16.c.16 Ezech.47.b.9

20

^* Zy auer van stonden an hœre netten verlaten hebbende, volghden hem na.

* Mat.19.d.27 Marc.10.d.28. Luc.5.b.11. end 18.e.28

21

^‡ End van daer voord ghegaen, zagh hy tweę andere ghebroeders, Iacobum den zoon Zebedéi, end Ioannem zynen broeder, ⁺ in’t schip mit hœren vader Zebedéo hœre netten vermaken: end riep ze.

‡ Marc.1.b.19

+ D

22

Zy auer van stonden an verlaten hebbende het schip end hœren vader, volghden hem na.

23

End Iesus ghingk het gansche Galiléenland omhær, leęrende in hœren Synagoghen, end predikende het Euangelium des Kœningkrijcks, end heylende allerley zieckte end allerley quale onder den volcke.

[p. 6r]

24

End zijn gheruchte ghingk ouer t’gansche Syrienland: end zy brachten tot hem allerley krancken die mit meynigherley zieckten end pijnen beuanghen waren: end bezetenen, end maenzuchtighen, end ghichtighen: end hy maeckte ze ghezond.

25

^* End vele scharen volghden hem na van Galiléa, end van den Tienstedenlande, end van Hierusalem, end den Iœdschen lande, end [van den lande] ouer den Iordaen.

* Marc.3.a.7 Luc.6.c.17