Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

⁺ DOe auer Iesus gheboren was te Bethleem des Iœdschen lands, ten daghen des kœnings Herodis: zie, dar quamen Wijzen vam Oosten tot Hierusalem,

+ Luc.2.a.6

2

End zeyden: Waer is die dar ⁺ gheboren is eęn Kœningk der Iœden? want wy hebben zijn sterr ghezien in d’Oosten, end zijn kommen hem an te bidden.

+ Gr. ghebaerd

3

De kœningk Herodes auer dat ghehoort hebbende, ward beroert, end

[p. 2v]

mit hem het gansch Hierusalem.

4

End verzamelt hebbende alle de Ouerpriesters end de Schriftgheleęrden des volcks, vraeghde van hen waer ⁺ Christus zolde gheboren werden.

+ Of, de Ghezalfde.

5

End zy zeyden tot hem: Te Bethleem des Iœdschen lands: want alzo is gheschreuen door den Propheet:

6

^* End du Bethleem eęn ærde Iuda, bist gheęnßinns de kleynste onder den Uorsten Iuda. Want wt dy zal [my] voordkommen eęn Leydsheęr, die mijn volck Israel ⁺ weyden zal.

* Michee.5.a.2 Ioan.7.f.42

+ Of, regieren

7

Herodes als dan de Wijzen heymelick gheropen hebbende, onderzocht nærstlick van hen de tijd wanneęr de sterr verschenen ware.

8

⁺End hy zand ze na Bethleem, end zeyde: Gaet hén end onderzoucket nærstlick na den kindeken: wanneęr ghy het auer zullet vonden hebben, zo zegghet’t my weder, op dat ick oock komme, end het anbidde.

+ B

9

Als zy auer den kœningk ghehoort hadden, reyßden zy hén: end zie, de sterr die zy in d’Oosten ghezien hadden, gingk hen voor, tot dat zy quam, end stond bouen [de plaetß] daer’t kindeken was.

10

Doe zy auer de sterr zaghen, verurœghden zy zick zeęr mit grooter vrœghden.

11

End ghinghen hénin in’t huyß, end vonden het kindeken mit Maria zyner moeder: end ^* nedergheuallen, baden hem an. End openden hœre schatten, end offerden hem gheschencken, gold,

* Psal.72.b.10 Esa.60.a.6

[p. 3r]

end wieroock, end myrrhe.

12

End door eęn Godlicke ansprake im droom vermaent, dat zy niet zolden weder tot Herodes keęren, toghen zy hén door eęnen anderen wegh in hœr land.

13

Doe zy auer hénwegh ghetoghen waren, zie, eęn Enghel des Heęren verschijnt den Ioseph im droom, zegghende: ⁺ Sta op, neem het kindeken end zijn moeder tot dy, end vliehe hén in Egypten, end zy aldaer tot dat ick het dy zegghe: want het is toekomstigh dat Herodes het kindeken zoucken zal, t’zelue omm te bringhen.

+ C

14

Hy auer opghestaen, namm het kindeken end des zeluen moeder tot zick in der nacht, end entweeck in Egypten.

15

End was aldaer tot na den dood Herodis: op dat veruult wurde dat de Heęr door den Propheet ghezegt had, die dar spreeckt: ^* Wt Egypten heb ick mynen zoon gheropen.

* Num.24.b.8 Osee.11.a.1

16

Doe Herodes nu zagh dat hy van den Wijzen bespott was, ward hy zeęr verbolghen: end wtgheschickt hebbende, doodde alle de kinders die dar waren te Bethleem end in allen hœren palen, van den tweęiarighen an end daer onder, na der tijd die hy nærstlick van den Wijzen vernomen had.

17

⁺Doe ward veruult dat ghezegt was van den Prophete Hieremia, die dar spreeckt:

+ D

18

^* In Rhama is eęn stemm ghehoort, gheklagh end gheweęn end veel huylens: Rachel beweęnende hœre kinders,

* Hiere.31.c.15

[p. 3v]

end wolde niet ghetroost werden, ouermids zy niet zijn.

19

Doe auer Herodes ghestoruen was, zie, eęn Enghel des Heęren verschijnt den Ioseph im droom in Egypten,

20

Zegghende: Sta op, neem het kindeken end zijn moeder tot dy, end ga hén in d’land Israel: want zy zijn ghestoruen die des kindekens ziel zochten.

21

Hy auer opghestaen, namm het kindeken end des zeluen moeder tot zick, end quam in d’land Israel.

22

Doe hy auer ghehoort had dat Archelaus im Iœdschen lande regneerde in der stede zijns vaders Herodis, vreeßde hy daerhén te gaen. End im droom door eęn Godlicke ansprake vermaent, entweeck hy in de oorden des Galileeschen lands.

23

End ghekommen, woonde hy in der stad ghenaemt Nazaret: op dat veruult wurde dat dar ghezegt was door de Propheten. ^* Hy zal Nazareus gheheeten werden.

* Iudic.13.b.7