Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

de thien Geboden, de artikels des Gheloofs, t’ghebed des Heeren &c. ouerghesett in Nederlandschen dichte

[fol. 153r]

§ Het ghesangk Zacharie. Lucę i.

§ Op die wyse des xlj. Psalms.

GHelooft sy de Heer God van Israel,
Die daer besocht heeft wel,
End heeft synen volcke fyn toeghestaen,
End verlossing ghedaen.
End heeft ons op-ghericht end toebereyt
Den hoorn der saligheyt,
In den huyse Dauids des knechten syn,
Mit vroeylicken aenschyn.

So hy daer heeft ghesproken end verkondt
Duydelick, door den mond
Syner heylghen Propheten, so men leest,
Die voortyds syn gheweest:
Naemlick dat wy van onß vyanden fyn,
Behouden souden syn,
End van aller hand, die aen alle syn,
Ons draghen haet end nyd

Om mit onsen vadern voor eewigheyt
Te doen bernhertigheyt,
End te wesen syns heylighen verbonds
Ghedachtigh op der stond.
Om t’selue welck hy, die daer eewigh leeft,
Mit eed ghesworen heeft,
Tot Abraha-men onsen vader frisch
Ons te gheuen ghewiß.

[fol. 153v]

 

Op dat wy van onser vyanden hand

 

Verlost aen allen kant,

 

Hem dienden vry, na synen goeden wil,

 

Oock sonder vreese stil:

 

Al voor hem, in alderley heyligheyt,

 

Ende gherechtigheyt,

 

Alle de daghen onses leuens langk,

 

Buyten eenigh bedwangk.

 

 

 

End du kind, du salt d’Alderhooghsten fyn

 

Propheet gheheeten syn,

 

Want du salt voor s’Heeren aenschyn gaen, dat

 

Du syn weghen maeckst plat.

 

Om te gheuen kentschap der saligheyt

 

Synen volckɇ ouer breyd,

 

Ia quytlatinghe syner-sonden al,

 

Op desen ęrdschen dal.

 

 

 

Door die hertgrond-licke bermhertigheyt

 

Onses Gods vol goedheyt,

 

Waermit ons heeft besocht die Opgangk groot,

 

Wt der hooghden in nood.

 

Op dat hy ver-schyne die in duysterheyt

 

Sitten, end in s’doods leyd,

 

Om onß voeten te beschicken alwegh

 

Fyn op des vredes wegh.