Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

(1561)–Jan Utenhove– rechtenstatus


De lofsangk Marie. Lucae. I. § Op de wyse des Cv. Psalms. MYn siele maeckt groot den Heere, Daer beneuen de gheest myn Heeft sick verhueght in God seere, Mynen salighmaker reyn. Want hy heeft schoon aenghesien Synr dienstmaeghd nederheyt fyn, Dies sullen alle gheslachten
[Folio 152v]
My saligh segghen end achten. Want aen my heeft groote dinghen Ghedaen die daer maghtigh is. End syne naem (ick moett singhen) Is gaer heyligh ende frisch. End syne bermhertigheyt Blyft tot den, in eewigheyt, Van gheslachte tot gheslachten, Die hem vreesen end groot achten. Hy heeft groot gheweld op ęrden, Door synen arem ghedaen, End verstroeyt, die mit hoouęrden, In huer hert, waren beuaen. Hy heeft afghetoghen schoon Die maghtighe vanden throon: Die nederighe van stande Heeft verhooght, wt smaed end schande. Die hongherighe mit goede Hy heeft veruult ryckelich, De ryckɇ in hueren ghemoede, Hy heeft oock versent ledigh. End Israel synen knecht Hy heeft opghenomen slecht, Op dat hy ghedachtigh ware Syner bermhertigheyt klare. So hy toegheseyt wt gnade Heeft tot onsen vaderen, Abraham end synen sade, In eewigheyden, Amen