Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

de thien Geboden, de artikels des Gheloofs, t’ghebed des Heeren &c. ouerghesett in Nederlandschen dichte

Verba mea auribus. Psal.v.

§ Dauid ballingk, veel gheleden hebbende van Saul: vreesende oock noch meer te lyden door de vleyers die ontrent Saul waren, doet syn ghebed tot God, daerna vertroost hy sick, als hy denckt dat God de godloosen haett, end den vroomen gunstigh is.

VErneem doch myn woorden, O Heere,

[fol. 9v]

 

 

Wil myn betrachten wel verstaen,

 

End myns gheschreys stem męrcken aen,

 

Want ick myn God, Koningk vol eere,

 

Bid tot dy seere.

 

 

 

S’morghens seer vrough, ia voor den daghe

 

Du salt, O Heer, verhooren my,

 

Want ick sal my s’morghens tot dy

 

Voughen, troost wachtendɇ, op myn klaghe,

 

Die my behaghe.

 

 

 

Want du een God (niet te verschoonen)

 

Bist, den die boosheyt niet behaeght,

 

Dien oock die godloose mishaeght:

 

Welck sick mit God niet sal ghewonen,

 

Noch by hem wonen.

 

 

 

Gheenßins sullen die dwase lieden

[fol. 10r]

 

Voor dyn ooghen konnen bestaen,

 

Want du haetsɇ alle die begaen

 

End węrcken boosheyt t’allen tyden,

 

Mit een verblyden.

 

 

 

Du salt oock gant-slick die daer lieghen

 

Bringhen tot verdęrf end in pyn,

 

De Heer haett die bloedghierigh syn,

 

End die daer altyd mit bedrieghen

 

Om te gaen pleghen.

 

 

 

Ick auer op dyner ghenaden

 

Veelheyt, eendeels aen my ghedaen,

 

Sal in dyn heyligh huys vry gaen

 

T’aenbidden, door dyn vreeß beraden,

 

Oock vrough end spade.

 

 

 

O Heer end God, will my doch gheuen

 

Door dyn trauwe gherechtigheyt,

 

Om mynr vyanden will, gheleyd,

 

End bereyd my dyn wegh te deghen,

 

Voor allɇ afweghen.

 

 

 

Want niets vast is in hueren monde,

 

Huer hert is gaer beueynst, kuraf,

 

Huer kelɇ is recht een open graf,

 

Huer tonghe werdt oock t’allen stonden

 

Vol smeeckens vonden.

 

 

 

Verdrayse, O God, laetse veruallen

 

Van den raedslaghen die sy doen,

 

Verdęrfse om huere swaer misdoen,

 

Want sy syn oproerigh gheuallen

 

Teghen dy allen.

[fol. 10v]

 

End laetsɇ alle vroo syn van sinnen,

 

Die sick gaer vertrauwen op dy,

 

Laetsɇ, eewlick mit vrueghdstemme vry

 

In dy vroo syn, mit den die dynen

 

Naem recht beminnen.

 

 

 

want du bewyst veel goeds, O Heere,

 

Den gherechten mensche mit spoed,

 

Du salt hem mit dyn gunste goed,

 

Euen als mit een schild end spęre,

 

Seer fyn bewęren