Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

de thien Geboden, de artikels des Gheloofs, t’ghebed des Heeren &c. ouerghesett in Nederlandschen dichte

Coloss. 3.c.16.

Het woord Christi wone in v ryckelick, in allerley wysheyt: leert end vermaent malkanderen, mit Psalmen, end lofsanghen, end gheestelicke liedekins, in ghenaede, singhende den Heere in uwen herten.

Iacob. 5.c.13.

Is yemand in lyden onder v? die bidde Is yemand goeds moeds? die singhe Psalmen.

[fol. 2r]

De Ouersetter tot den Christelicken Leser.

CHRISTELICKE Leser, de veranderinghe, die in velen deser Psalmen alsnv, door my ghedaen is, is in somighen der seluen eensdeels ghedaen, wt oorsaken dat sy, in onser verstroeyinghe, menigherley wyse gheschonden, end van der eerster myner ouersettinghe verandert syn gheweest, buyten mynen weten end wille. Eensdeels auer end aldermeest, in somighen anderen (die ick ouer thien iaren ongheuęrlick, wt hoogher spraken, legher ghesett hadde) wt oorsaken der grofuer licency of vryheyt, die ick namaels beuonden hebbe dat daerinne ghebruyckt was. Welcke sonderlickste oorsaken, beneuen meer andere, nademael sy niet lichtwightigh syn, ick verhope dat du dy niet salt laten verwonderen, of bemoeyen, ouer de selue veranderinghe dewyle sy dy grootelicks ten besten ghedyen sal, so vele als daer aengaet de reynicheyt ende louterheyt der eewigher end salighmakender waerheyt Godes: aenghesien dat de selue hier alleenlick ghesocht end gheuoordert werdt. Om welcker onderhoudinghe wille ick somwylen het dicht lieuer hebbe willen versuymen end naelaten, in der ouer-

[fol. 2v]

settinghe, dan dat ick der selue te kort dede, of dat ick des dichts haluen eenighe lichtuęrdigheyt, in so swaerwightighen handel des heylighen Gheestes, soude bruycken, so verre emmers alst my moghelick is gheweest. Derhaluen bidde ick dy hertgrondelick, du willest desen mynen trauwen aerbeyd my danckelick afnemen, end in’t goede keeren, so wat daer te gheringhe, end niet nae der węrdigheyt des teghenwoordighen handels, in der ouersettinghe, moghte beuonden werden. So du sulckes doest, so magh ick veroorsaeckt werden mit der tyd, in meer andere Psalmen te arbeyden, so verre als God my de ghenaede daertoe gunne. Dit auer wil ick hierentusschen ghebeden hebben, in den name Christi des Heeren, dat sick niemand lichtuęrdelick veruoordere dese myne ouersettinghe eenigerley wyse te veranderen, onder wat voorwendinghe het selue oock gheschien moghte: Waerdoor (also ick alrede wel voortyd eruaren hebbe) so wel de meyninghe des heylighen Gheestes, als oock de kracht der composicy, in der ouersettinghe, ghekranckt end gheschonden moghte werden ten naedeele der waerheyt. So daer yemand beghenadight werde van den Heere, de selue Psalmen van nieus aen ouer te setten, mit meerder ghenaede end stichtinge, die magh hier in synen aerbeyd oock aenwenden ten nutte der Ghemeynten Gods, in onsen Nederlandschen Vaderlande, also hy ghehou-

[fol. 3r]

den is te doene: op dat hy het talentpond vanden Heere ontfangen, niet begraue, męr meer wtgheue tot winnighe, ter eeren onses ghemeenen Heeren Christi Iesu, end ten nutte syner ledematen. My is ghenough dat myne aerbeyd in syn wesen ghelaten werde: ten ware mit mynen weten end bewillinghe, tot meerder beteringhe end stichtinghe, welcker haluen men moet sick gantslick te buyten gaen, op dat Gode alleene de eere blyue in der onbeuleckter eewigher waerheyt syns woords. Anders, dewyle ick aenmęrcke de onuersaedde ghierigheyt veler bouckdruckeren, die daer een onwtsprekelicke schade daeghelicks aen bringhen der ghemeyner weluaert, so heb ick Meester Ian Day, wiens vroomicheyt ghenoughsamelick bekent is, voor mynen drucker verkoren, end hebbe betuyght end betuyghe mits desen, dat ick dese teghenwoordighe ouersettinghe end composicy in hueren stand end mit huere maten alleene voor de myne bekenne end gheen andere, op dat niemands ghierigheyt onder mynen name gheuoedt werde ten achterdeele der goddelicker waerheyt.

Gheschreuen te Londen den 20. Iunii. 1561.