Kleyn liedtboecxken
(1633)–Pieter Jansz. Twisck–
Auteursrechtvrij
[pagina 420]
| |
Na de wijse: Ghelijck die sterren vercieren claer. Ofte: Die Heer wil u al van u jeught.
MYn lieve Suster in den Heer,
Al zijt ghy somtijdts swack,
Houdt u altijdt aen Godes leer,
Wilt door gheen onghemack,
Verflouwen of mistrouwen yet,
Want Godt den sijnen noyt en verliet.
Ghy hebt verloren uwen hooft,
Maer hout u stijf daer an,
Dat Godt den weduwen belooft
Te wesen haren man,
Ende de weesen eenen vaer,
Christus het hooft ende middelaer.
In schade steeckt 'tmeeste profijt,
Wt verlies comt ghewin,
Worden wy aertsche dinghen quijt,
'tHemels daelt daer weer in,
Die tranen van een Wedu-vrou
Die vallen wel nederwaerts met rou:
| |
[pagina 421]
| |
Maer sy keeren opwaerts tot Godt,
Die haer vertoosten sal,
Houdt hem gantsch voor u deel en lot,
En blijft in sijn Schaep-stal,
Hoopt vast op hem, soo wordt ghy sterck,
En denckt het is Godes eyghen werck.
Die gheeft, weder ghenomen heeft,
Hier gheschiet gheen ghewelt,
Wie leende goeden weder gheeft,
Veeltijdt hem danckbaer stelt,
Godt wil stercken uwe ghemoedt,
En maken u het bitter tot soet.
In 't midden van u lijden swaer,
Laet Godt wesen u schat,
Soo sult ghy verblijden hier naer
In die Hemelsche stadt,
Hy slaet als of hy 't meynde quaet
Nochtans ist enckel goet inder daet.
Hierom loopt in u Vaders schoot,
Als u die noot druckt sweer.
Siet op het leven nae de doodt,
Daer gheen scheyden is meer,
En altijdt t'samen vrolijck zijn
Sonder druck ofte eenigh ghepijn
Hier op soo set al uwen troost,
| |
[pagina 422]
| |
V leyt wordt haest ghe-endt,
Wijckt noch wanckelt van dit propoost
Godt u niet quaets toe sendt,
Want 't zy gheluck of teghenspoet,
Van hem en comt anders niet dan goet.
Na beter. |
|