Kleyn liedtboecxken

[Wilt ghy een Christen zijn ghenaemt]

Na de wijse: Ick ben een arme Pilgrom siet.

WIlt ghy een Christen zijn ghenaemt,
Ghy moet Christum na treden,
Leven Christ'lijck soo het betaemt,
In liefde, rust en vrede.

Een Christen kent gheen haet noch nijt,

Wraeck giericheyt, oneere,

[p. 243]

 

Twist, tweedracht krackelen en strijt,

 

Sal hy veer van hem weeren.

 

Een Christen is van sulcken aert,

 

In druck kruys, noot en lijden,

 

Tgemoet houden gantsch onbeswaert,

 

Om in Godt te verblijden.

 

Een Christen die sijn goet verliest,

 

Dat schaet hem niet met allen:

 

Het Hemels hy voort aertsche kiest,

 

Dat sal hem niet ontvallen.

 

Een Christen is so vry en los,

 

Hanght aen geen aertsche dinghen,

 

Al zijnse hoogh sterck ofte bros,

 

Hy can daer over springhen.

 

Een Christen hier niet veel behoeft,

 

Hy can hem haest gheneren,

 

In wel te doen, hy niet vertoeft,

 

Hy mach wel wat omberen.

 

Een Christen die dult, doocht en lijt

 

In al sijn druck en saken,

 

Verwacht met lijdtsaemheyt den tijt,

 

Die hem weer sal vermaken.

 

Een Christen leven duert niet langh

 

Waer toe veel eer en goeden,

 

Noordruft maeckt wel de beste gangh,

[p. 244]

 

Na het Hemels te spoeden.

 

Een Christen soeckt het Hemels goet

 

Wt al sijn hert en krachten,

 

Tot 'taertsche heeft hy lust noch moet,

 

Hoe soud hy daer op wachten.

 

Een Christen heeft Godt tot sijn loon,

 

Stelt op Godt sijn betrouwen,

 

En acht niet al des werelts hoon,

 

Ten mach hem niet benouwen.

 

Een Christen draeght een goet ghemoet,

 

Over die hem verdrucken,

 

Hy doet geeren voor quaedt, het goet,

 

En 'tsal hem wel ghelucken.

 

Een Christen leeft nae Christi aerdt,

 

Lieflijck, soet van nature,

 

Sijn vyandt heeft hy lief en waerdt,

 

Is niet wreet, hart noch sture.

 

Een Christen neemt sijn eynde hier,

 

Met Christum by den Vader,

 

Christi weldaden goedertier

 

Brenght ons daer allegader.

Na beter.