Kleyn liedtboecxken
(1633)–Pieter Jansz. Twisck–
AuteursrechtvrijNa de wijse: 'tIaer is langher als den dagh, Ofte: Een goet nieuw liedt heb ick bedacht.
ICk wil beginnen een nieu liedt,
Dat sal ick u gaen singhen
Wt goeder meyningh het geschiet
Aen u ghy Ionghelinghen.
En weest u ouders ghehoorsaem
Nu en tot aller stonden,
Lief kinderen, leeft doch bequaem,
Weest niet spijtigh van monden.
Haet, nijt laet verre van u sijn,
Weest vriendelijck niet stuere,
Ghedencket om de helsche pijn,
Daer het eeuwigh sal dueren.
| |
[pagina 171]
| |
O jonghe jeught, schickt u tot deught,
V quaden aerdt wilt breecken,
En u na Godes woorden veught,
Wilt quaet met quaet niet wreecken.
Wacht u al van gheselschap quaet
En wilt doch van haer scheyden,
Die altijdt gaen over de straet,
Om niet goets te verbreyden.
Comt in tijts by u ouders t'huys,
En doolt niet achter straten,
En stelt u altijdt sonder kruys
Tot onderwijs ghelaten.
Siet wel toe ende verwerpt niet
'Tcastijden van u Vader,
Laet u leeren sonder verdriet
Al met Godts woort te gader.
Van jonghs op schickt u algelijck
Na Godes wil te leven,
Op dat ghy wort al in sijn rijck
In eeuwicheyt verheven.
Godts uytvercoren sullen sijn:
Ghelijck de sonne blincken,
Als de quade in pijne sijn.
O Ieught wil dit ghedincken.
Oorlof hier me, jonckheyt in't slot,
| |
[pagina 172]
| |
De Heer wil ons bewaren,
Op dat wy hier namaels by Godt
Eeuwigh mochten vergaren.
Na beter. |
|