Kleyn liedtboecxken
(1633)–Pieter Jansz. Twisck–
Auteursrechtvrij
[pagina 126]
| |
Na de wijse: Gelijck die Sterre vercieren claer.
DIe Heer wil u al van u jeught,
Tot in u oudtheyt grijs
Optrecken tot u ouders vreught
Aen siel en lichaem wijs,
Wast op in deughden ghehoorsaem,
Leeft vreedtsaem lieffelijck en bequaem.
Weest vriendelijck van woorden soet,
En toont een goet ghelaet,
Schou onrust, onlust en onmoet,
En bewijst metter daet,
Dat ghy oprecht goet aerdich zijt
Vroom en wel leeft sonder twist of strijt
Sijt geern die minst in alle verscheel,
En weest selven die best,
Hout u te vreen met 'tcleynste deel,
'tSal wel comen in't lest,
Sijn u speelinnen niet te vreen,
Comt haestelijck met haer over een.
Toe geven stilt groot ongheluck,
Schept altijt u vermaeck,
| |
[pagina 127]
| |
In wel doen want des Heeren juck,
Geeft een soete na smaeck,
Maer uyt des werelts wesen mal
Volgt altijt na d'een, d'ander misval.
Daerom bemint die werelt niet,
Vliet die lust die jonckheyt,
Schickt u na 'tgeen dat Godt ghebiet,
Na sijn wil u bereyt,
Weest vernoeght met een slecht ghewaet,
Hout deughde voor u beste cieraet.
Een jonghe dochter ghemaniert,
Sedich bequaem niet wilt,
Haer op het alderbest verciert,
Met een goet leven milt,
Draeght u alsoo, ghy komt hier naer
By Godt en sijnen Hemelsche schaer.
Na beter. |
|