Kleyn liedtboecxken

[Hoort toe ghy jonghe ghesellen]

Na de wijse: Van Aerjan-maet,

HOort toe ghy jonghe ghesellen,
En merckt wel op mijn reden,
Ick moet u eens vertellen,

[p. 108]

 

Hoe seer veel quade seden

 

Comen uyt dronckheden.

 

Al wordt u sulcx verclaert

 

Weest daerom niet t'onvreden,

 

Veel quaets doet een dronckaert.

 

Vloecken ende oock sweeren

 

Hoortmen daer veel gheschieden,

 

Versmaedtheydt en oneeren

 

Krijghen sy by de lieden,

 

Elck een gaet van haer vlieden,

 

Men is voor haer vervaert,

 

'Tmoet sijn soo sy't ghebieden,

 

Veel quaets doet een dronckaert.

 

Lasteren ende schelden,

 

Spotten ende quaet spreecken,

 

Elck een sijn leet te melden,

 

Verderven en te breecken,

 

Malcander doot te steecken,

 

'tSchiet veel by desen aert,

 

Dat wederom te wreecken,

 

Veel quaets doet een dronckaert.

 

Vechten, kijven, quaet wesen

 

Dobblen ende speelen,

 

Haet nijt en twist mispresen:

 

Clammen ende kraekelen,

[p. 109]

 

Ontrouwicheyt en stelen

 

Worter oock uyt ghebaert,

 

'Tverholen niet te heelen,

 

Veel quaets doet een dronckaert.

 

Ydel ende lichtvaerdich,

 

Dansen ende oock springen,

 

Tot boevery heel vaerdich,

 

Onbequaemheyt te singhen,

 

Dit sietmen van jonghelinghen

 

En ouden wel ghebaert,

 

Een yeghelijck te dwinghen,

 

Veel quaets doet een dronckaert.

 

Stout ende onbedachtich

 

Listich om quaet te ramen,

 

Menedich leughenachtich,

 

Gelt goet, eer ende fame

 

Verliesen sy te samen

 

Door dronckenschap eenpaert.

 

Dit al sy haer niet schamen,

 

Veel quaets doet een dronckaert.

 

Ghemeynlijck is haer temen,

 

Dattet is eerelijcken,

 

Wat sy voor handen nemen:

 

'Tverstandt gaet haer ontwijcken,

 

Out, jongh, arm ofte rijcken,

[p. 110]

 

Niemant en wort ghespaert.

 

Op hoerdery sy kijcken,

 

Veel quaets doet een dronckaert.

 

Alle vrientschap sy vergeten

 

Trou en liefde met eenen:

 

Van schult willen sy niet weten,

 

Veel borghen ende lenen,

 

Wijf, Kinders comen in wenen.

 

Dickmael het dient vercklaert,

 

De vrienden tot verclenen,

 

Veel quaets doet een dronkaert.

 

Niet alleen sy verliesen

 

Gesontheyt eer en fame,

 

Maer die dronckenschap kiesen

 

Verliest de siel te samen,

 

Tot Godts rijck onbequame,

 

Ter hellen streckt haer vaert,

 

Soo sy gheen boete ramen,

 

Veel quaets doet een dronckaert.

 

Oorlof, ghy droncken bouten,

 

'Tmach soo niet wel heen strecken,

 

Ick waerschou u seer stoute

 

Wilt met Godt niet langh gecken,

 

Wat sal ick veel vertrecken,

 

Een put die water gaert,

[p. 111]

 

Daer kan het haest uytlecken,

 

Veel quaets doet een dronckaert.

Na beter.