Kleyn liedtboecxken
(1633)–Pieter Jansz. Twisck–
Auteursrechtvrij
[pagina 7]
| |
Na de wijse: Lief uytvercoren, lief triumphant.
HOorn wilt wel hooren, 't hoorende woort,
Wie ooren heeft om te horen, hoort,
Horen beleven, moet ghemeen gaen,
Door't gheloof even, na Schrifts vermaen:
Sijn schapen tem, hooren sijn stem:
Maer wijcken hem
Die vreemt gheluyt uyt slaen.
God wil hem keeren, na Davids reen
Die hem met eeren, hooren ghemeen,
Met ghehoorsame, ooren bequaem,
En haer niet schamen, des Heeren naem:
Wie wijsheyt mint, is hoorens sint
Als een Godts kindt
Te leven nae't betaem.
Een tongh twee ooren, heeft Godt ghestelt,
| |
[pagina 8]
| |
Om veel te hooren, maer als een helt
Weynich te spreken, en veel te doen,
Veel tijdt uytbreken, om het sermoen
Te hooren aen, nae het vermaen,
In deught voort gaen
Oprecht lieflijck en groen.
Bewaert u voeten, als ghy sult treen
In't huys Godts soete, hooren met een
T woort Godts verclaren, soo het betaemt,
Hooren bewaren, is best befaemt:
Maer die onvroet, al sonder boet,
Hoort en niet doet,
Werdt ten laetsten beschaemt.
Na beter. |
|