De schadt-kiste der philosophen ende poeten

[p. 313]

Nievw liedeken; op de wyse:
Den tijt is hier

WEest nu verblijt
Al ghy Venus dienaeren
Den soeten tijt
Die is nu voor de hant
Dus al v druck laet vaeren
VVant die v te beswaeren
Placht, moet het lant
Nu ruymen door t'bystant
Van Phoebus want
Hy compt heel onuersaecht
Al met sijn gulden straelen, an
Die hy lieflijck laet daelen, van
Den Olimp dus niet faelen, kan
Of Hijms wort heel ver-jaecht.

De Nimphen spoen

Haer nu om te vermeyden
In tempe groen
T'lustich verheuen pleyn
Flora sietmen wt spreyden
En Selenus kompt weyden
Syn geytgens kleyn
Om voeden in t'gemeyn
Diana reyn
Haer tot Iaeghen seer snelt
In bosschen ende weghen, siet
Dus Hebe weest verleghen, niet
Maer v ter-jacht ter deghen, biet
Met Minph Najaed in t'velt.

Melpomene

Laet staen dijn truerich dichten
En wilt in ste
Verhaelen s' Meys viertuijt
VVant die eerst mosten swichten
Voor Boriams booswichten
En in der muijt
Laeghen comen nu uijt
Baucus nu spruijt
Met Philemon heel schoon
Door dat Aurora Iuechdich, blinckt
Herse die sy vruechdich, schinckt
Ops, waer op dat duechdich, blinckt
Phebus uyt sijnen troon.

Sephirus blaest

Seer liefelijck en lustich
En maeckt verbaest
Eolus dat hy vlucht
Aura toont haer me rustich
En Bachus laeft die dustich
Sijn, dus niet ducht
Oock voor gheen nootdruft sucht
VVant Cerus vrucht
Nu lustich lieflijck bloijt
Napeen born Godinnen, vroet
Satieren sietmen minnen, soet
Apollo soeckt te winnen, goet
Daphne dies hy hem spoijt.

Prince.

Looft ende prijst

Iupijn die t'al kan geuen
En eer bewijst
Hem elcken Mercurist
Looft hem met const verheuen
En toont v in dit leuen
Als een Artist
Of een recht Peonist
Nijt haet en twist
En alle druck en rauw
Van v met goe manieren, drijft
En tot des s'Meys verchieren, schrijft
Hem, eer als angieren, blijft
Vast in liefde getrouw.

In Liefde Getrouwe.

Omhelst de Deucht: